Ntho e ka sehloohong e ka re thusang ho mamella ke matšeliso a tsoang ho beng ka rōna, metsoalle le balumeli-’moho le rōna.

Mantsoe a mosa a tsoang ho motsoalle le a bontšang hore oa re rata, e ka ba moriana o thobang o re folisang le o re khathollang. (Liprov. 16:24; 18:24; 25:11) Empa Bakreste ba ’nete ha baa ameha ka ho tšelisoa feela. Ba etsa boiteko ba ‘ho tšelisa ba matšoenyehong a mofuta leha e le ofe ka matšeliso ao bona ka bobona ba ntseng ba tšelisoa ka ’ona ke Molimo.’ (2 Bakor. 1:4; Luka 6:31) Antonio eo e leng molebeli oa setereke naheng ea Mexico, o ile a ba le phihlelo ea sena.

Ha ho ne ho fumanoa hore Antonio o tšoeroe ke lefu la lymphoma, e leng mofuta o mong oa kankere ea mali, o ile a sithabela haholo. Ho ntse ho le joalo, o ile a loanela ho laola maikutlo a hae a fosahetseng. Joang? O ne a ee a leke ho hopola lipina tsa ’Muso le ho li bina e le hore a ka utloa mantsoe a tsona ebe o thuisa ka ’ona. Ho rapela ka lentsoe le phahameng le ho bala Bibele le hona ho ile ha mo tšelisa haholo.

Leha ho le joalo, hona joale Antonio oa hlokomela hore balumeli-’moho le eena ke bona ba mo thusitseng haholo. O re: “Ha ’na le mosali oa ka re ne re ikutloa re nyahame, re ne re ee re bitse mong ka rōna eo e leng moholo ka phuthehong hore a tl’o rapela le rōna. Sena se ile sa re tšelisa sa ba sa etsa hore re khobe matšoafo.” O phaella ka ho re, “Haele hantle, ka lebaka la tšehetso ea beng ka rōna le bara le barali babo rōna, ka mor’a nako e seng kae re ne re se re khona ho hlōla maikutlo a fosahetseng.” Ruri o ile a leboha haholo hore ebe o ne a e-na le metsoalle e lerato le e bileng e tsotellang joalo!

Ntho e ’ngoe e ka re thusang nakong ea mahlomola ke moea o halalelang oo re o tšepisitsoeng. Moapostola Petrose o ile a re moea oa Molimo ke “mpho e sa lefelloeng.” (Lik. 2:38) Ho ile ha bonahala hore seo ke ’nete ha ho ne ho tlotsoa batho ba bangata ka Pentekonta ea 33 C.E. Empa le rōna re ka fumana mpho eo ea moea o halalelang. Kaha mpho ena ha e fele, e ka ba hantle hore re kōpe hore re e fuoe ka bongata.—Esa. 40:28-31.

Moapostola Pauluse o ile a mamella mathata a mangata, ’me ka linako tse ling o ile a ba makhatheng a lefu. (2 Bakor. 1:8-10) Leha ho le joalo, Pauluse ha aa ka a tšoha lefu. O ile a tšelisoa ke ho tseba hore Molimo o mo tšehelitse. O ile a ngola a re: “Ho bokoe Molimo le Ntate oa Morena oa rōna Jesu Kreste, Ntate oa mehauhelo e bonolo le Molimo oa matšeliso ’ohle, ea re tšelisang matšoenyehong ’ohle a rōna.” (2 Bakor. 1:3, 4) Pauluse ha aa ka a iqenehela ho tlōla. Ho e-na le hoo, liteko tseo a ileng a li mamella li ile tsa mo thusa ho loanela ho ba le kutloelo-bohloko, e le hore a ka lula a loketse ho tšelisa ba bang nakong eo ba hlokang ho tšelisoa.

Antonio o ile a khona ho khutlela mosebetsing oa ho ba molebeli oa setereke ka mor’a hore a fole. O ne a lula a bontša balumeli-’moho le eena hore oa ba tsotella, empa ka nako eo eena le mosali oa hae ba ile ba etsa boiteko bo khethehileng ba ho etela le ho khothatsa batho ba kulang. Ka mohlala, ka mor’a hore Antonio a etele Mokreste e mong, o ile a hlokomela hore mora eo oabo rōna o ne a sa batle ho ea libokeng. Antonio o re: “Hase hore o ne a sa rate Jehova kapa bara babo, empa bokuli ba hae bo ile ba mo ama maikutlong hoo a ileng a ikutloa eka ha a na thuso.”

Ntho e ’ngoe eo Antonio a ileng a e etsa ho khothatsa mora eo oabo rōna ea kulang, ke ho mo kōpa hore a rapele ’mokeng oo ba neng ba sa tsoa ba le oona. Le hoja mora eo oabo rōna a ne a ikutloa a se na thuso, o ile a amohela kōpa eo. Antonio o re: “O ile a rapela hamonate eaba ka mor’a moo, o ikutloa eka ke motho e mocha. O ile a boela a ikutloa a e-na le thuso.”

Ka sebele, ho sa tsotellehe hore na ke ka tsela e khōlō kapa e nyenyane, kaofela ha rōna re kile ra mamella mathata a itseng. Empa, joalokaha Pauluse a boletse, mathata ana a re thusa hore re khone ho tšelisa batho ba bang nakong eo ba leng matšoenyehong. Kahoo, a re nahaneleng Bakreste-’moho le rōna ba nang le mathata ’me re etsise Molimo oa rōna Jehova, ka ho ba mohloli oa matšeliso ho bona.