LILEMONG tse seng kae tse fetileng, Cesar le mosali oa hae Rocio, ba ne ba iphelela hamonate California, moo Cesar a neng a iphelisa ka ho kenya li-air-conditioner ’me Rocio a sebeletsa ngaka e ’ngoe ka matsatsi a itseng. Ba ne ba e-na le ntlo, ’me ba se na bana. Empa ho ile ha etsahala ntho e ’ngoe e ileng ea fetola bophelo ba bona. Ho ile ha etsahala’ng?

Ka October 2009, ofisi ea lekala ea United States e ile ea romela mangolo liphuthehong tsohle naheng eo, e khothalletsa baithaopi ba nang le tsebo hore ba tl’o thusa ka nakoana Bethele ha ho atolosoa mehaho ea lekala e Wallkill, New York. Esita le ba seng ba fetile lilemo tseo ka tloaelo batho ba lumelloang ho tla Bethele ka tsona, ba ile ba khothalletsoa hore ba kenye likōpo. Cesar le Rocio ba re: “Kaha re ne re se re fetile lilemo tseo, re ne re tseba hore haeba re tlohela monyetla ona oa ho sebeletsa Bethele, re ke ke ra hlola re fumana o mong. Re ne re sa batle hore monyetla ona o re fete!” Banyalani bao ba ile ba kenya kōpo ea bona hang-hang.

Ho ile ha feta selemo pele Cesar le Rocio ba bitsoa Bethele. Leha ho le joalo, ba ile ba nka mehato e tla ba nolofalletsa ho finyella pakane ea bona. “Re ile ra fetola karache hore e be kamore eo re ka lulang ka ho eona, e le hore re hirise ntlo. Kahoo, re ile ra tsoa ntlong ea rōna e khōlō eo re e ratang eo re neng re e hahile lilemong tse seng kae tse fetileng, eaba re fallela ka karacheng.” Cesar o re: “Ho etsa liphetoho tsena ho ile ha re thusa hore re itokisetse ho ea sebeletsa Bethele, ha re ka bitsoa.” Ho ile ha etsahala’ng ka mor’a moo? Rocio o re: “Khoeli ka mor’a hore re fallele kamoreng e nyenyane, re ile ra kōptjoa ho tla thusa ka nakoana Wallkill. Ho hlakile hore ho etsa liphetoho tseo ho ile ha re bulela monyetla oa hore Jehova a re hlohonolofatse.”

Ho tšoana le Cesar le Rocio, bara le barali babo rōna ba makholo ba entse boitelo e le hore ba ka  kenya letsoho mosebetsing oa kaho o ntseng o tsoela pele New York State. Ba bang ba thusa katolosong ea mohaho Wallkill, ha ba bang ba bangata ba thusa kahong ea ntlo-khōlō, Warwick. * Banyalani ba bangata ba siile mahae a bona a matle, ba tlohela mesebetsi e lefang hantle le ho siea liphoofolo tsa bona e le hore ba sebeletse Jehova haholoanyane. Na Jehova o ba hlohonolofalitse ka lebaka la boitelo ba bona? Ruri o ba hlohonolofalitse!

Ka mohlala, Way, eo e leng setsebi sa motlakase le Debra, bao ka bobeli ba leng lilemong tse ka holimo ho 50, ba rekisitse ntlo ea bona e Kansas le thepa e ’ngoe e ngata ’me ba fallela Wallkill, e le hore ba sebeletse Bethele ba ntse ba tloha hae. * Ba thabetse boitelo boo ba bo entseng, le hoja ho ile ha hlokahala hore ba etse liphetoho bophelong ba bona. Ha Debra a bua ka mosebetsi oo a o etsang Bethele, o re: “Ka linako tse ling ke ee ke utloe eka ke se ke ntse ke haha o mong oa mehaho e tla ahoa Paradeiseng, e hlahang libukeng tsa rōna!”

Melvin le Sharon ba ile ba rekisa ntlo ea bona e South Carolina le thepa, e le hore ba ka ithaopela ho ea thusa Warwick. Le hoja ho ne ho se bonolo ho itela ka tsela eo, banyalani bao ba thabela hore ebe ba kentse letsoho mosebetsing ona oa bohlokoa. Ba re: “Ho thabisa haholo ho tseba hore re etsa ntho e tla ruisa bara bohle babo rōna molemo.”

Kenneth, eo e neng e le sehahi, le Maureen, ba lilemo li ka bang 55, ba ile ba falla California ho ea thusa mosebetsing oa kaho Warwick. E le hore ba khone ho falla, ba ile ba kōpa morali’abo rōna e mong ka phuthehong hore a sale le ntlo ea bona, ’me ba kōpa beng ka bona hore ba hlokomele ntate oa Ken ea seng a hōlile. Na baa ikoahlaea ka boitelo boo ba bo entseng hore ba sebeletse Bethele? Che! Ken o re: “Ho re tsoela molemo haholo. Ke ’nete hore mathata ’ona a teng, empa re phela bophelo bo khotsofatsang haholo, ebile re khothalletsa ba bang ho kenela tšebeletso ena.”

Ba bangata ba baithaopi bana ba ile ba tlameha ho hlōla mathata a itseng. Ka mohlala, William le Sandra, ba sa tsoa feta lilemo tse 60, ba ne ba ituletse ka khotso Pennsylvania. Ba e-na le k’hamphani e atlehileng e etsang mechine ’me ba hirile batho ba 17. Ba ne ba kopanela phuthehong eo esale ba kopanela ho eona ho tloha ha e le bana, ’me beng ka bona ba bangata ba lula sebakeng  seo. Kahoo, ha ho hlaha monyetla oa hore ba il’o thusa Wallkill ka matsatsi a itseng, ba ile ba elelloa hore ba lokela ho siea metsoalle le lintho tsohle tsa bona. William o re: “Ntle ho pelaelo, ntho e ileng ea re thatafalla ka ho fetisisa ke ho tloha sebakeng seo re se tloaetseng.” Empa ka mor’a ho rapela ka taba ena, banyalani bao ba ile ba etsa qeto ea ho falla—e leng bohato boo ba sa ikoahlaeleng bona. William o re: “Ha ho letho le ka bapisoang le thabo eo motho a e fumanang ha a sebetsa le lelapa la Bethele. ’Na le Sandra re thabile ho feta pele!”

Ricky ea neng a tsamaisa mosebetsi oa kaho Hawaii, o ile a kōptjoa ho tla thusa ka mosebetsi Warwick, a ntse a lula hae. Mosali oa hae Kendra o ne a mo khothalletsa hore a amohele kōpo eo. Empa ba ne ba amehile haholo ka mora oa bona Jacob ea lilemo li 11. Ba ne ba ipotsa hore na e tla ba qeto e bohlale ho fallela New York State le hore na mora oa bona o tla khona ho tloaela bophelo sebakeng se secha.

Ricky o re: “Ntho e ka sehloohong eo re neng re e batla ke ho fumana phutheho e nang le bacha ba bangata ba matla moeeng. Re ne re batla hore Jacob a be le metsoalle e molemo.” Empa phutheho eo ba ileng ba qetella ba ile ho eona, e ne e e-na le bana ba seng bakae le litho tse ’maloa tsa lelapa la Bethele. Ricky o re: “Ka mor’a seboka sa pele, ke ile ka botsa Jacob hore na o ikutloa joang ka phutheho eo, kaha ha ho na lithaka tsa hae. O ile a re ho ’na: ‘U se ke ua khathatseha Ntate. Metsoalle ea ka e tla ba bacha ba sebeletsang Bethele.’”

Ka sebele bara bao babo rōna e ile ea e-ba metsoalle ea Jacob. Phello e bile efe? Ricky o re: “Bosiung bo bong ha ke feta haufi le kamore ea mora oa ka, ke ile ka hlokomela hore o ntse a khantšitse. Ke ne ke nahana hore ke tla mo fumana a ntse a bapala lipapali tsa elektronike, empa ka mo fumana a bala Bibele! Ha ke mo botsa hore na o ntse a etsa’ng, o ile a re: ‘Le ’na ke sebeletsa Bethele, ke batla ho qeta Bibele ka selemo.’” Ha ho pelaelo hore Ricky le Kendra ba thabisoa ke hore Ricky o thusa mosebetsing oa kaho Warwick le hore ho falla ho thusitse mora oa bona hore a hōle moeeng.—Liprov. 22:6.

Mosebetsi oa kaho o Wallkill le Warwick o tla fihla qetellong, kahoo ba kōpiloeng ho tla thusa baa hlokomela hore mosebetsi oa bona ke oa nakoana. Na bara le barali baa babo rōna ba tšoenyehile ka hore na ba tla ea kae kapa ba tla etsa’ng? Le hanyenyane! Ba bangata ba ikutloa joaloka banyalani ba bang ba Florida. John ea tsamaisang mosebetsi oa kaho le mosali oa hae Carmen, ke baithaopi  ba nakoana Warwick, ’me ba re: “Re bone kamoo Jehova a hlokometseng litlhoko tsa rōna ho tla fihlela joale. Re lumela hore Jehova o ne a ke ke a re tlisa mona ebe ha a qeta o oa re lahla.” (Pes. 119:116) Luis ea sebetsang ka thepa ea litima-mollo le mosali oa hae Quenia, ba sebeletsa Wallkill. Ba re: “Re bone ha Jehova a fuparolla seatla sa hae ’me a re fa lintho tseo re li hlokang. Le hoja re sa tsebe hore na o tla re fa tsona neng, joang kapa hokae, re kholisehile hore o tla tsoela pele ho re hlokomela.”—Pes. 34:10; 37:25.

Batho ba bangata ba thusitseng mosebetsing oa kaho New York ba ka be ba ipehetse mabaka a mangata a hore ba se ke ba ithaopa. Empa ba ile ba leka Jehova—feela joalokaha a re khothalletsa: “Ka kōpo, ntekeng, . . . hore na ebe nke ke ka le bulela likhoro tsa moroallo tsa maholimo ’me ke le tšollele tlhohonolofatso ho fihlela ho se ho se letho le hlokoang.”—Mal. 3:10.

Na le uena u tla leka Jehova ’me u latsoe tlhohonolofatso ea hae? Hlahloba maemo a hao ka thapelo, ho bona hore na u ka kenya letsoho joang mosebetsing ona o thabisang, ebang ke ka ho thusa New York kapa kahong ea mehaho e meng ea ’Muso, ’me u bone kamoo Jehova a tla u hlohonolofatsa kateng.—Mar. 10:29, 30.

Dale, moenjiniere oa litsela le marokho le Cathy ba Alabama, ba khothalletsa batho ho kenela tšebeletso ena. Ke baithaopi Wallkill, ’me ba re: “Haeba u e-na le sebete sa ho tloha moo u tloaetseng, u tla ba le monyetla oa ho bona ha moea oa Jehova o sebetsa.” Ho hlokahala eng e le hore u ithaope? Dale o re: “Fokotsa lintho tse sa hlokahaleng bophelong. U ke ke ua ikoahlaea!” Gary ea tsoang North Carolina, o qetile lilemo tse 30 a tsamaisa mosebetsi oa kaho. Eena le mosali oa hae Maureen ba re ntho e ’ngoe eo ba e thabetseng ka ho sebeletsa Warwick ke “ho kopana le ho sebetsa le bara le barali babo rōna ba ratehang ba sebelelitseng Jehova ka lilemo tse ngata Bethele.” Gary o phaella ka ho re: “E le hore motho a sebeletse Bethele, ho hlokahala hore a fokotse lintho tse sa hlokahaleng bophelong, e leng tsela e molemo ea ho phela tsamaisong ena ea lintho.” Jason ea neng a sebetsa konterakeng e kenyang motlakase le Jennifer ba Illinois, ba re ho thusa katolosong ea Bethele ea Wallkill “ke e ’ngoe ea lintho tse ka etsang hore u ikutloe eka u se u ntse u phela lefatšeng le lecha.” Jennifer o eketsa ka ho re: “Ho thabisa haholo ho tseba hore Jehova o ananela ntho e ’ngoe le e ’ngoe eo re e etsang le hore seo se re lokiselletsa bokamoso boo a re reretseng bona. Jehova o etsa bonnete ba hore o re hlohonolofatsa ho fihlela ho se ho se letho leo re le hlokang.”