Ha ba e-na le mathata batho ba bang ba iphoufaletsa ’nete ’me ba qoba ho sebelisa likelello; ba ithetsa ka ho etsa lintho tse tla ba imolla mathateng a bona ka nakoana. Ka mohlala, batho ba bang ba itebatsa mathata a bona ka ho noa joala. Qalong, joala bo ka etsa hore ba ikutloe ba le sebete haholoanyane ’me ba bone eka ba ka khona ho sebetsana le mathata a bona. Empa ha nako e ntse e e-ea, batho ba itšetlehileng ka joala ba kotula litholoana tse bohloko. Na ho ka boleloa se tšoanang le ka ho ba le tumelo?

Batho ba bang ba nka hore ho ba le tumelo ke ho lumela lintho feela ka hlooho e ntšo. Ba bolela hore batho ba itšetlehang ka tumelo ha ba batle ho inahanela kapa ho lumella hore bopaki ba sebele bo ba susumetse. Batho ba nahanang ka tsela eo ba nka hore ho ba le tumelo e matla ke ho iphapanyetsa ’nete.

Bibele e bua haholo ka tumelo. Empa ha ho na moo e re khothalletsang hore re lumele lintho ka hlooho e ntšo feela. Kapa hona hore e khothalletsa batho hore ba be botsoa ho nahana. Ho fapana le hoo, e bolela hore batho ba behang tumelo lentsoeng le leng le le leng leo ba le utloang ha ba na phihlelo ebile ke maoatla. (Liproverbia 14:15, 18) Ruri, e ne e tla ba booatla ho lumela hore taba e itseng ke ’nete empa re sa batlisisa bonnete ba eona! Ho etsa joalo ho ne ho tla tšoana le ho ikoala mahlo ebe u leka ho feta ’mileng o phetheselang hobane feela motho e mong a itse u etse joalo.

Ho e-na le hore re lumele lintho feela ka hlooho e ntšo, Bibele e re khothalletsa hore re lule re butse mahlo a rōna a tšoantšetso e le hore re se ke ra qhekelloa. (Matheu 16:6) Re lula re butse mahlo a rōna ka hore re sebelise “matla a [rōna] a ho nahana.” (Baroma 12:1) Bibele e re ruta hore re bue lintho tseo re nang le bopaki ba tsona le hore re etse liqeto tse utloahalang tse thehiloeng linthong tsa ’nete. Nahana ka mehlala e meng e hlahang mangolong a moapostola Pauluse.

Ha Pauluse a ne a ngolla phutheho ea Roma, o ne a sa batle hore ba lumele ho Molimo hobane feela a ba boleletse hore ba etse joalo. Ho e-na le hoo, o ile a ba khothalletsa hore ba hlahlobe bopaki ba hore Molimo o teng. O ile a ngola a re: “Litšobotsi tsa hae [Molimo] tse sa bonahaleng li bonoa ka ho hlaka ho tloha pōpong ea lefatše ho ea pele, hobane li lemohuoa ka lintho tse entsoeng, esita le matla le Bomolimo ba hae ba ka ho sa feleng, hoo [ba latolang bolaoli ba Molimo] ba se nang boikemelo.” (Baroma 1:20) Pauluse o ile a sebelisa mokhoa o tšoanang oa ho beha mabaka ha a ne a ngolla Baheberu. O ile a re: “Ka ho hlakileng, ntlo e ’ngoe le e ’ngoe e hahoa ke motho ea itseng, empa ea hahileng lintho tsohle ke Molimo.” (Baheberu 3:4) Ha a ne a ngolla Bakreste ba neng ba lula motseng oa Thesalonika, Pauluse o ile a ba khothalletsa hore ba se ke ba lumela feela ntho e ’ngoe le e ’ngoe. O ne a batla hore ba ‘nepisise lintho tsohle.’—1 Bathesalonika 5:21.

Ha batho ba lumela lintho tse se nang bopaki bo utloahalang seo se ka etsa hore ba ithetse ’me sa etsa hore ba khelosoe le ho khola litholoana tse bohloko. Ha a bua ka batho ba bang ba bolumeli ba mehleng ea hae, Pauluse o ile a ngola a re: “Kea ba pakela hore ba chesehela Molimo; empa eseng ho ea ka tsebo e nepahetseng.” (Baroma 10:2) Kahoo, ruri ke habohlokoa hore re sebelise keletso ea Pauluse eo a e fileng phutheho ea Roma! O ile a ngola a re: “Le fetohe ka ho fetola likelello tsa lōna, e le hore le ka ipakela e le lōna thato ea Molimo e molemo le e amohelehang le e phethahetseng.” (Baroma 12:2) Haeba tumelo ea rōna e thehiloe tsebong e nepahetseng ea Molimo, tumelo e joalo e ke ke ea e-ba ho ea le khongoana holimo, empa e tla ba “thebe e khōlō” e re sireletsang maikutlong le linthong tse ka senyang kamano ea rōna le Molimo.—Baefese 6:16.