BATHO ba bang ba re ho fosahetse ho botsa Molimo lipotso. Ba ka ’na ba nahana hore ke ho se hlomphe ho botsa hore na ke hobane’ng ha Molimo a lumella lintho tse itseng ho etsahala. Na le uena u ikutloa ka tsela eo?

Haeba u ikutloa ka tsela eo, u ka ’na ua makatsoa ke ho tseba hore batho ba bang ba lokileng ba ile ba botsa Molimo lipotso. Hlokomela tse ling tsa lipotso tse latelang tseo ba ileng ba li botsa Molimo:

Monna ea tšepahalang Jobo, o ile a botsa: “Ke hobane’ng ha ba khopo ba ntse ba phela, ba tsofetse, hape ba phahame leruong?”—Jobo 21:7.

Moprofeta ea tšepahalang Habakuke, o ile a botsa: “Ke hobane’ng ha u talima ba sebetsang ka bolotsana, hore u khutse ha ea khopo a metsa ea lokileng ho mo feta?”—Habakuke 1:13.

Jesu Kreste, o ile a botsa: “Molimo oa ka, Molimo oa ka, u ntloheletse’ng?”—Matheu 27:46.

Ha u bala litemana tse potolohileng mangolo ao a qotsitsoeng ka holimo, u tla hlokomela hore ha ho moo ho bontšoang hore Jehova * Molimo o ile a halefa ha batho ba batlang ho tseba e le kannete ba mo botsa lipotso. Ka sebele ha ho makatse hore ebe Jehova o ile a ikutloa ka tsela eo. Ka mohlala, Molimo ha a halefe ha re mo kōpa hore a re fe lintho tseo re li hlokang e le hore re phele hantle ’meleng. O thabela ho re fa lintho tseo. (Matheu 6:11, 33) Ka ho tšoanang, ka ho rata o re fa boitsebiso bo tla etsa hore re imolohe likelellong le maikutlong. (Bafilipi 4:6, 7) Ha e le hantle, Jesu o ile a bolella barutuoa ba hae sena: “Le ’ne le kōpe, ’me le tla fuoa.” (Matheu 7:7) Litemana tse potolohileng tšepiso ena ea Jesu li bontša hore o ne a sa bue feela ka ho fumana lintho tseo re li hlokang empa hape le ka ho fumana likarabo tsa lipotso tsa bohlokoa.

Haeba u ne u ka ba le monyetla oa ho botsa Molimo, ke potso efe eo u neng u ka rata ho mo botsa eona ho tsee tse latelang?

• Ke phelela’ng?
• Ho tla etsahala’ng ka ’na ha ke e-shoa?
• Ke hobane’ng ha u ntlohella hore ke utloe bohloko?

Kaha “Lengolo lohle le bululetsoe ke Molimo,” u tla fumana likarabo tseo Molimo a fanang ka tsona Lentsoeng la hae Bibele. (2 Timothea 3:16) Hlokomela se ileng sa etsa hore ba bang ba botse lipotso tsena tse ka holimo le likarabo tseo Bibele e fanang ka tsona.