“Ke bona eka ho ikutloa ke se na thuso ke bothata bo boholo ka ho fetisisa boo ke ntseng ke loanela ho bo hlōla.” Ao ke mantsoe a ’mè e mong ea ileng a fumana ho le thata ho lumela hore ho ka ba le ntho e ka etsang hore Jehova a mo tsotelle. Na le uena u ikutloa ka tsela e tšoanang? Haeba ho joalo, u ka ’na ua ipotsa, ‘Na ruri Jehova o tsotella batho ba mo rapelang e le batho ka bomong?’ Ehlile ho joalo! Re fumana bopaki ba hore Jehova o re tsotella re le batho ka bomong ho seo Jesu a ileng a se bua.—Bala Johanne 6:44.

Ke’ng seo Jesu—ea tsebang botho ba Jehova le thato ea hae ho feta motho leha e le ofe—a ileng a se bua? (Luka 10:22) O ile a re: “Ha ho motho ea ka tlang ho ’na ntle leha a huloa ke Ntate ea nthomileng.” Kahoo, ho ke ke ha khoneha hore re be balateli ba Kreste, le ho ba barapeli ba Ntate oa rōna ea leholimong, Jehova, ntle le hore Jehova ka boeena a re hulele ho eena. (2 Bathesalonika 2:13) Haeba re utloisisa seo Jesu a neng a se bolela, ka mantsoe ao, re tla bona bopaki bo matla ba hore Molimo o oa re tsotella.

Ho bolela’ng ho re Jehova o oa re hula? Leetsi la Segerike le bolelang “hula” le ka boela la hlalosoa e le ho hula letlooa la litlhapi. (Johanne 21:6, 11) Na Jehova o re hula leha re sa rate, na o re qobella hore re mo sebeletse? Che. Jehova o re file bolokolohi ba ho ikhethela, ha a re qobelle hore re mo rate. (Deuteronoma 30:19, 20) Setsebi se seng se beha taba tjena: “U ke ke ua tseba se ka pelong ea motho, ntle le hore motho eo ka boeena a u bulele pelo ea hae.” Jehova o phenya lipelo tse libilione lefatšeng lena, o batla batho bao lipelo tsa bona li batlang ho mo tseba e le kannete. (1 Likronike 28:9) Ha a ba fumane, o ba amohela ka mofuthu. O etsa seo joang?

Ka mosa, Jehova o hohela, kapa o hulela lipelo tsa batho ba nang le “tšekamelo e nepahetseng” ho eena. (Liketso 13:48) Jehova o etsa seo ka litsela tse peli—ka molaetsa o tsoang ka Bibeleng oa litaba tse molemo o re finyellang re le batho ka bomong le ka moea oa hae o halalelang. Ha Jehova a bona motho ea pelo e ratang ’nete ea Bibele, o sebelisa moea oa hae ho mo thusa hore a utloisise ’nete ’me a e sebelise bophelong ba hae. (1 Bakorinthe 2:11, 12) Ntle le hore Molimo a re thuse, re ke ke ra ba balateli ba ’nete ba Jesu le barapeli ba inehetseng ba Jehova.

Joale, mantsoe a Jesu a ho Johanne 6:44, a re ruta eng ka Jehova Molimo? Jehova o hula batho hobane a bona ntho e itseng e molemo lipelong tsa bona ’me o ba tsotella e le batho ka bomong. ’Mè ea boletsoeng selelekeleng sa sehlooho sena, o ile a ikutloa a tšelisehile ha a utloisisa ’nete ena e khothatsang. O ile a re: “Ho ba mohlanka oa Jehova ke tokelo e khōlō ka ho fetisisa eo mang kapa mang a ka bang le eona. Hape, haeba Jehova o ile a nkhetha hore ke be mohlanka oa hae, ka sebele e tlameha ebe ke motho oa bohlokoa ho eena.” Uena? Na ho tseba hore Jehova o tsotella barapeli ba hae e le batho ka bomong ha ho u susumelletse hore u batle ho ba le kamano e haufi le eena?