Lipaki Tsa Jehova tse 23 tsa motseng oa Queens, New York, li sa tsoa ithuta ho bua le ho bala Sebengali, e leng puo e buuoang Bangladesh le likarolong tse ling tsa India. Li ne li le tlelaseng e reretsoeng ho ruta batho puo ka potlako ’me li rutoa ke Lipaki tse ling.

Tlelase ea Sebengali e ne e le e ’ngoe ea litlelase tse ngata tse rutang batho lipuo, United States le linaheng tse ling. Sepheo sa ba eang litlelaseng tseo ke ho ithuta e le hore ba tsebe ho bolella batho ba lipuo tse ling molaetsa oa Bibele.

Magaly ea neng a ithuta Sebengali tlelaseng eo, o re: “Batho ba buang Sebengali ba eketseha ka potlako sebakeng sena sa rōna. Batho ba batla ho tseba likarabo lipotsong tsa bohlokoa tse kang, Ke hobane’ng ha mahlomola a atile hakaale? Ha ke bolella batho ka lintho tse babatsehang tseo Molimo a tšepisang ho li etsa nakong e tlang, ba batla ho tseba ka ho eketsehileng. Empa hangata re sitisoa ke puo.”

Barupeli ba sebelisa litsela tse natefisetsang liithuti, e le hore li ithute ka potlako. Har’a tse ling, ba sebelisa boitšisinyo ba ’mele e le ho thusa liithuti hore li hopole seo li ithutileng sona.

Nako le nako ha tlelase e tsoa, liithuti li sebelisa seo li ithutileng sona, li etela batho ba buang Sebengali sebakeng sa habo tsona ’me li buisana le bona ka Bibele. Magaly o re: “Batho ba thabela seo ’me ba batla ho tseba hore na ke hobane’ng ha ke ithuta puo ea bona. Taba ea hore ebe ke iphile nako ea ho ithuta eona e ba thusa hore ba bone hore molaetsa oa rōna ke oa bohlokoa.”

Lipaki Tsa Jehova li ithuta lipuo tse ling li bile li koetlisetsoa ho ruta tse ling lipuo tseo. Tšimong e lekaleng la United States feela, ho tšoeroe litlelase tse ka bang 38 ’me ha koetlisoa barupeli ba 2 244, pakeng tsa January 2006 le January 2012. Ho tloha ka la 1 September, 2012, Lipaki Tsa Jehova tse tšimong ea lekala la United States li se li tšoere litlelase tse fetang 1 500 ka lipuo tse 37.