Letsatsi le leng le le leng batšoaruoa ba litsing tsa tlhabollo ea batšoaruoa tsa U.S., ba ngolla liofisi tsa Lipaki Tsa Jehova mangolo a mangata ba kōpa ho rutoa Bibele.

Re araba likōpo tse joalo ka ho romela basebeletsi ba rōna ba liphuthehong tse haufi le libaka tseo, hore ba etele batho ba litsing tsa tlhabollo ea batšoaruoa, lipetleleng tsa ’muso, libakeng tsa tlhabollo ea bacha le libakeng tsa makhoba a lithethefatsi e le hore ba e’o ba ruta Bibele.

Lichankaneng tse ling basebeletsi ba rōna ba tšoara liboka tsa phutheho kamehla. Ka mohlala, chankaneng e ’ngoe ho ile ha ba le batho ba 32 ba ileng ba mamela puo ea phatlalatsa e ileng ea fanoa mabaleng a mabeli a chankana.

Liphello e bile tse khothatsang. Monna e mong ea neng a koalletsoe profinseng ea Indiana, ea ahloletsoeng ho hlola chankaneng bophelo bohle ba hae ka lebaka la polao e sehloho, o ile a etsa liphetoho tse khōlō bophelong ba hae, a ba a kolobetsoa hore e be Paki ea Jehova.

Paki e neng e ithuta le motšoaruoa e mong ea neng a koaletsoe chankaneng e khōlō ea California, e ile ea re: “Ke bone kamoo a neng a le kateng pele a ithuta Bibele le liphetoho tseo a ileng a li etsa. O ile a etsa liphetoho tse khōlō haholo e le hore a kolobetsoe.”

Batšoaruoa ba bangata ba qalile ho phela tumellanong le melao ea Bibele le hoja ba tseba hore seo se ka beha bophelo ba bona kotsing. Ka mohlala, batšoaruoa ba bang ba ileng ba khaotsa ho ba litho tsa maquloana a linokoane, ba ile ba tlameha ho koalloa ba le bang kapa ba isoe chankaneng e ’ngoe e le hore ba sireletsehe.

Ba boholong chankaneng baa hlolloa ha ba bona kamoo matla a Bibele a fetolang bophelo ba batho. Ba bang ba boholong ba ile ba fa Lipaki mangolo a kananelo le likhau bakeng sa mosebetsi o motle oa boithaopo oo li o etsang litsing tsa tlhabollo ea batšoaruoa.