Khotso lefatšeng e ke ke ea tlisoa ka boiteko ba batho, empa e tla tlisoa ke ʼMuso oa Molimo, e leng puso ea leholimong e tsamaisoang ke Kreste Jesu. Hlokomela kamoo Bibele e re rutang ka tšepo ena e hlollang.

1.   Molimo o tla felisa “lintoa ho isa pheletsong ea lefatše,” a phethahatse tšepiso ea hae ea ho tlisa “khotso lefatšeng har’a batho bao a khahloang ke bona.”—Pesaleme ea 46:9; Luka 2:14, Good News Translation.

2.   ʼMuso oa Molimo o tla busa lefatše lohle o le leholimong. (Daniele 7:14) Kaha o tla be o busa lefatše, o tla felisa bochaba, e leng bona bo bakang likhohlano tse ngata.

3.   Jesu, ʼMusi oa ʼMuso oa Molimo, o bitsoa “Khosana ea Khotso,” ʼme o tla tiisa hore ho ba le “khotso e sa feleng.”—Esaia 9:6, 7, Bibele ea Sesotho.

4.   Batho ba ikemiselitseng ho tsoela pele ba loana ba ke ke ba lumelloa ho phela ʼMusong oa Molimo, kaha “Moea oa [Molimo] o hloile mang kapa mang ea ratang pefo.”—Pesaleme ea 11:5; Liproverbia 2:22.

5.   Molimo o ruta bafo ba hae ho phela ka khotso. Ha Bibele e hlalosa litholoana tsa thuto ena, e re: “Ba tla lokela ho tea lisabole tsa bona hore e be mehoma le marumo a bona hore e be likere tse faolang limela. Sechaba se ke ke sa phahamisetsa sechaba se seng sabole, ha ba sa tla hlola ba ithuta ntoa.”—Esaia 2:3, 4.

 Hona joale Molimo o se a ntse a ruta Lipaki Tsa Jehova tse baloang ka limilione ho phela ka khotso. (Matheu 5:9) Le hoja re le batho ba merabe e fapa-fapaneng ʼme re phela linaheng tse sa tšoaneng tse fetang 230, re hana ho nka lihlomo hore re loantše batho ba bang.