Mahlomola a maholo e tla ba nako e boima ka ho fetisisa bakeng sa moloko oa batho. Ho latela boprofeta ba Bibele a tla ba teng “mehleng ea bofelo,” kapa “nakong ea bofelo.” (2 Timothea 3:1; Daniele 12:4) ‘Mahlomola a kang ao ha a e-s’o be teng ho tloha ha Molimo a theha lefatše ho fihlela joale ebile ha a sa tla ba teng.’​—Mareka 13:19; Daniele 12:1; Matheu 24:21, 22.

Liketsahalo tse tl’o ba ka mahlomola a maholo

•   Bolumeli ba bohata boa felisoa. Bolumeli ba bohata bo tla felisoa ka tšohanyetso. (Tšenolo 17:1, 5; 18:9, 10, 21) Mebuso ea lipolotiki e emeloang ke Machaba a Kopaneng e tla phethahatsa thato ea Molimo ka ho felisa bolumeli ba bohata.​—Tšenolo 17:3, 15-18. a

•   Ho hlaseloa ha bolumeli ba ’nete. Lichaba tse ikopantseng, tseo Ezekiele ponong ea hae a reng ke “Gogo oa naha ea Magogo,” li tla leka ho felisa batho ba bolumeling ba ’nete. Leha ho le joalo, Molimo o tla sireletsa barapeli ba hae hore ba se ke ba felisoa.​—Ezekiele 38:1, 2, 9-12, 18-23.

•   Ho ahloloa ha baahi ba lefatše. Jesu o tla ahlola batho bohle “’me o tla arola batho lihlopha tse peli, feela joalokaha molisa a arola linku ho lipoli.” (Matheu 25:31-33) O tla ahlola batho a ipapisitse le hore na ba ne ba tšehetsa barab’abo Jesu, e leng ba tla busa le eena leholimong.​—Matheu 25:34-46.

•   Ho bokelloa ha babusi ba ’Muso. Batho ba tšepahalang ba khethetsoeng ho ea busa le Kreste leholimong ba tla qeta tšebeletso ea bona ea lefatšeng ebe ba tsosetsoa ho ea phela leholimong.​—Matheu 24:31; 1 Bakorinthe 15:50-53; 1 Bathesalonika 4:15-17.

•   Armagedone. “Ntoa [ena] ea letsatsi le leholo la Molimo ea Matla ’Ohle” e boetse e bitsoa “letsatsi la Jehova.” (Tšenolo 16:14, 16; Esaia 13:9; 2 Petrose 3:12) Batho bao Kreste a tla ba ahlola ka hore ba khopo ba tla felisoa. (Sofonia 1:18; 2 Bathesalonika 1:6-10) Ho tla boela ho felisoe mebuso eohle ea lipolotiki e emeloang ke sebata se lihlooho li supileng ka Bibeleng.​—Tšenolo 19:19-​21.

Liketsahalo tsa ka mor’a mahlomola a maholo

•   Ho koalloa ha Satane le bademona. Lengeloi le leholo le tla tšoara Satane le bademona ebe le ba lahlela ka “sekoting se tebileng,” ho tla be ho tšoana le ha eka ba shoele hobane ba tla be ba sa khone ho etsa letho. (Tšenolo 20:1-3) Boemo ba Satane ha a le ka sekoting bo tla be bo tšoana le ha eka o teronkong, hobane o tla be a sa khone ho ba le tšusumetso kae kapa kae.​—Tšenolo 20:7.

•   Puso ea Lilemo Tse Sekete e a qala. ’Muso oa Molimo o tla qala ho busa ka lilemo tse 1 000 ’me o tlisetse batho litlhohonolofatso tse ngata. (Tšenolo 5:9, 10; 20:4, 6) “Bongata bo boholo ba batho boo ho neng ho se motho ea ka bo balang” bo “pholohileng mahlomola a maholo,” bo tla bona ha Puso ea Lilemo Tse Sekete e qala lefatšeng.​—Tšenolo 7:9, 14; Pesaleme ea 37:9-11.