Babad nu Kahiji 28:1-21
28 Daud ngumpulkeun sakabéh pamingpin Israél di Yérusalém, nyaéta pamingpin kaom, pamingpin kelompok nu ngalalayanan Raja, pamingpin nu ngapalaan 1.000 jeung 100 urang, pamingpin nu ngawaskeun sakabéh harta banda, ingon-ingon, jeung anak-anak Raja, bareng jeung pajabat istana sarta kabéh jalma nu perkasa jeung bisa diandelkeun.
2 Seug Raja Daud nangtung tuluy ngomong,
”Dulur-dulur jeung rahayat, dangukeun kuring. Kuring téh hoyong pisan ngabangun bumi supaya peti perjangjian Yéhuwa teu pundah-pindah. Éta bumi gé bakal jadi tatapakan sampéan Anjeunna. Kuring geus nyiapkeun naon-naon nu dibutuhkeun keur ngabangun éta bumi.
3 Tapi, Allah nu sajati ngabéjaan kuring, ’Lain manéh nu bakal ngabangun imah nu ngamulyakeun ngaran Kuring, sabab manéh mah loba teuing perang jeung geus loba maéhan jalma.’
4 Najan kitu, ti sakabéh kulawarga bapa kuring, kuring nu dipilih ku Yéhuwa Allah Israél pikeun jadi raja Israél salamina. Anjeunna tos milih Yéhuda pikeun jadi pamingpin. Ti turunan Yéhuda, kulawarga bapa kuring nu dipilih. Ti anak-anak lalaki bapa kuring, kuring nu dipilih pikeun jadi raja sakuliah Israél.
5 Yéhuwa tos masihan loba anak lalaki ka kuring. Ti antara maranéhna, Sulaéman nu dipilih ku Anjeunna pikeun diuk dina tahta karajaan Yéhuwa jeung maréntah sakuliah Israél.
6 ”Saur Anjeunna, ’Sulaéman anak manéh nu bakal ngabangun imah keur Kuring jeung buruanana. Kuring geus milih manéhna jadi anak Kuring, sarta Kuring bakal jadi bapana.
7 Pamaréntahanana bakal kukuh salilana lamun manéhna bener-bener ngajalankeun paréntah jeung putusan hukum Kuring, sakumaha nu dilampahkeun ku manéhna ayeuna.’
8 Jadi, di hareupeun sakabéh urang Israél, nyaéta jamaah Yéhuwa, sarta bari didangu ku Allah urang sadaya, kuring ngomong: Pék ulik sakabéh paréntah Yéhuwa Allah aranjeun tuluy jalankeun bener-bener, ngarah aranjeun bisa ngamilik nagri nu sakieu hadéna, tuluy bisa diwariskeun ka anak incu aranjeun turun-tumurun.
9 ”Ari hidep, Sulaéman anaking, hidep kudu kenal ka Allahna Bapa sarta kudu ngalalayanan Anjeunna ku sapinuhna haté jeung ulah asa kapaksa,* da Yéhuwa téh mariksa haté kabéh jalma. Anjeunna paham kana unggal niat haté jeung pipikiran. Lamun hidep néangan Anjeunna, Anjeunna tangtu kapanggih. Tapi lamun hidep ninggalkeun Anjeunna, Anjeunna bakal nolak hidep salilana.
10 Yeuh déngékeun, Yéhuwa téh geus milih hidep pikeun ngabangun bumi kanggo Anjeunna, tempat nu suci. Jadi sing wani, geura prak pigawé.”
11 Daud mikeun ka Sulaéman anakna rancangan tepas* jeung rohangan séjénna, kaasup gudang-gudang, rohangan-rohangan hateup, rohangan-rohangan beulah jero, jeung rohangan pangampura dosa.*
12 Daud gé mikeun rancangan tina sagala nu diilhamkeun* ka manéhna, nyaéta rancangan buruan bumina Yéhuwa, rohangan-rohangan tempat dahar di sakurilingna, rohangan tempat nyimpen harta Allah nu sajati, jeung rohangan tempat nyimpen harta nu disucikeun.*
13 Manéhna gé méré nyaho carana ngatur tugas kelompok-kelompok imam jeung urang Léwi, sakabéh tugas nu dijalankeun di bumina Yéhuwa, jeung sakabéh parabot nu dipaké dina ibadah di bumina Yéhuwa.
14 Manéhna nerangkeun kudu sakumaha beurat emas jeung pérak keur parabot nu dipaké dina ibadah,
15 beurat emas keur lampu emas jeung wadah-wadahna, beurat pérak keur lampu pérak jeung wadah-wadahna, nurutkeun gunana masing-masing,
16 beurat emas keur unggal méja roti nu dibaktikeun,* beurat pérak keur méja-méja pérak,
17 beurat emas murni keur garpuh, mangkok, jeung téko, beurat emas keur unggal mangkok emas leutik, jeung beurat pérak keur unggal mangkok pérak leutik.
18 Salian ti éta, manéhna méré nyaho kudu sakumaha beurat emas nu dimurnikeun keur mézbah dupa sarta lambang karéta Allah, nyaéta kérub-kérub emas nu mébérkeun jangjangna sarta ngarungkup peti perjangjian Yéhuwa.
19 Pok Daud ngomong, ”Yéhuwa ngabingbing jeung méré pangarti ka kuring pikeun nyatet sakabéh rincian ieu rancangan.”
20 Geus kitu, Daud ngomong ka Sulaéman anakna, ”Hidep kudu wani jeung kuat, geura prak pigawé. Ulah sieun atawa geumpeur, sabab Allah Yéhuwa, Allahna Bapa, nyarengan hidep. Hidep moal diculkeun atawa ditinggalkeun ku Anjeunna, tapi hidep bakal disarengan ku Anjeunna nepi ka bumina Yéhuwa réngsé dibangun.
21 Kelompok imam jeung kelompok urang Léwi geus siap ngajalankeun tugas maranéhna di bumina Allah nu sajati. Hidep bakal dibantuan ku tukang-tukang nu réla digawé sarta ahli dina rupa-rupa hal, kitu deui jeung para pamingpin sarta sakabéh rahayat nu bakal ngalaksanakeun pituduh hidep.”
Catetan Tambihan
^ Atawa ”jeung suka bungah”.
^ Atawa ”rohangan panghareupna”.
^ Atawa ”rohangan paranti neundeun tutup peti”.
^ As. ”nu ditepikeun ku jalan kawasa suci”.
^ Atawa ”nu dibaktikeun”.
^ Atawa ”roti susun”.
