Jabur 10:1-18
ל [Lamed]
10 Nun Yéhuwa, ku naon Gusti téh jauh ti abdi?
Ku naon Gusti nyumput waktu abdi kasusahan?
2 Ku sombongna, nu jahat ngudag nu teu walakaya,Tapi manéhna bakal kajebak ku siasatna sorangan.
3 Nu jahat nyombongkeun napsu jahatnaSarta ngaberkahan nu hawek.*
נ [Nun]Manéhna teu hormat ka Yéhuwa.
4 Lantaran sombong, nu jahat teu hayang nyaho ka Allah.
Ceuk pamikirna, ”Allah mah euweuh.”
5 Nu dilakukeunana téh tara gagal,Tapi manéhna moal sanggup ngarti kana hukum Allah.
Manéhna nyapirakeun musuh-musuhna.
6 Manéhna ngomong di jero haté, ”Aing moal tigubrag.*
Aing moal pernah ngarasakeun kasusahTi ayeuna nepi ka mangsa nu bakal datang.”
פ [Pe]
7 Biwirna pinuh ku bohong, kutukan, jeung ancaman.
Létahna ngaluarkeun kekecapan anu nganyenyeri jeung nyilakakeun batur.
8 Manéhna nyumput di désa-désa, boga niat rék nyerang.
Ti panyumputanana, manéhna kaluar rék maéhan jalma nu teu salah.
ע [Ayin]
Panonna ngincer jalma nu teu daya.
9 Manéhna ngadagoan di panyumputanana kawas singa.*
Manéhna ngadagoan rék ngarontok jalma nu teu walakaya.
Manéhna néwak jalma nu teu walakaya ku jaringna.
10 Korbanna diruntuhkeun jeung diremukkeun.
Jalma nu teu daya ditéwak ku leungeunna.*
11 Manéhna ngomong di jero haté, ”Allah geus pohoeun.
Anjeunna geus miceun beungeut.
Anjeunna moal nénjo.”
ק [Qof]
12 Tulungan abdi, nun Yéhuwa. Tunjukkeun kakuatan Gusti, nun Allah.
Sing émut ka nu teu walakaya.
13 Ku naon nu jahat teu hormat ka Allah?
Ceuk manéhna di jero haté, ”Allah moal ngahakiman aing.”
ר [Res]
14 Tapi sabenerna Gusti ningali sadaya kasusah jeung kasangsaraan.
Gusti téh merhatikeun, sarta sagala masalah diurus ku Anjeunna.
Jalma-jalma nu jadi korban muntang ka Gusti.
Gusti téh panulung keur anak yatim.*
ש [Syin]
15 Potongkeun leungeun jalma jahat jeung kejem,Supaya waktu kajahatanana ditéangan ku Gusti,Kajahatanana geus teu aya deui.
16 Yéhuwa téh Raja keur salalanggengna.
Bangsa-bangsa geus musna ti bumi.
ת [Taw]
17 Tapi paménta jalma nu lemah lembut bakal didangukeun ku Gusti, nun Yéhuwa.
Gusti bakal negerkeun haté maranéhna sarta bener-bener merhatikeun maranéhna.
18 Gusti bakal masihan kaadilan ka anak yatim jeung jalma nu ditindes,Supaya maranéhna moal sieun deui ka manusa di bumi.
Catetan Tambihan
^ Atawa bisa jadi ”Sarta nu hawek ngaberkahan dirina sorangan”.
^ Atawa ”ngoléang”.
^ Atawa ”singa dina rungkun”.
^ Atawa ”dikerewek ku cakarna nu kuat”.
^ Atawa ”yatim pahatu”.
