Mikha 7:1-20
7 Cilaka kuring téh!Kuring kawas jalma nu néangan buah anggur jang didahar,Kawas jalma nu ngarep-ngarep buah ara nu ngeunah, tapi teu manggih nanaon,Ku sabab bubuahan usum panas geus dikumpulkeunSarta sésa panén anggur geus diala.
2 Jalma nu satia geus musna ti bumi,Geus teu aya jalma bener di antara manusa.
Kabéh jalma ngadago-dago kasempetan pikeun maéhan.
Saban jalma silih arah jeung dulurna maké pangjiret.*
3 Leungeunna ahli ngalampahkeun kajahatan.Pamingpinna ménta panyogok,Hakimna hayang diburuhan,Jalma penting nyebutkeun kahayangna.Maranéhna kabéh sakongkol.
4 Jalma nu panghadéna ti antara maranéhna kawas cucuk,Jalma nu pangbenerna leuwih rendah tibatan rungkun cucuk.
Poé nu diomongkeun ku tukang-tukang jaga maranéhna* sarta poéna ngaadilan éta jalma-jalma* bakal datang.
Ayeuna maranéhna bakal baringungeun.
5 Tong ngandelkeun babaturan,Atawa percaya ka sobat.
Ngomong ka batur hirup nu dipikacinta téh kudu ati-ati.
6 Sabab anak lalaki bakal ngahina ka bapana,Anak awéwé bakal ngalawan ka indungna,Minantu awéwé bakal ngalawan ka mitoha awéwéna.Nu jadi musuh téh nya kulawargana sorangan.
7 Tapi kuring, kuring mah bakal terus waspada bari ngadagoan Yéhuwa.
Kuring bakal sabar ngadagoan Allah nu nyalametkeun kuring.
Allah kuring bakal ngadangu kuring.
8 Éh musuh, ulah gumbira ningali kaayaan kuring.
Sanajan kuring tigubrag, kuring bakal hudang deui.Sanajan kuring aya di nu poék, Yéhuwa bakal jadi caang keur kuring.
9 Kuring geus dosa ka Yéhuwa,Ku sabab kitu kuring bakal nandangan amarah-Na,Nepi ka Anjeunna ngabéla perkara kuring jeung méré kaadilan ka kuring.
Kuring bakal dibawa ku Anjeunna ka tempat nu caang.Kuring bakal ningali kaadilana-Na.
10 Éta bakal katempo ku musuh, manéhna bakal éra sorangan,Da manéhna pernah ngomong kieu,
”Mana Yéhuwa Allah manéh téh?”
Kuring bakal nyaksian sorangan
Manéhna ditincakan kawas leutak di jalan.
11 Hé kota,* bakal datang poéna témbok-témbok batu manéh dibangun deui.Dina poé éta, wates wilayah manéh bakal ngalegaan.
12 Dina poé éta, jalma-jalma bakal daratang ka manéh.Maranéhna téh ti Asiria jeung ti kota-kota di Mesir,Ti Mesir nepi ka Walungan Éfrat,Ti laut-laut, jeung ti gunung-gunung.
13 Bumi bakal kalantar ku sabab pendudukna.Éta téh balukar tina lalampahan maranéhna.
14 Nun Allah, mugia Gusti ngangon umat Gusti, nyaéta ingon-ingon* Gusti, nganggo tongkat Gusti.Maranéhna téh cicing sorangan di leuweung, di tengah-tengah kebon buah.
Mugia maranéhna dipasihan tuang di Basyan sareng Giléad sapertos kapungkur.
15 ”Kuring bakal némbongkeun hal-hal nu hébat ka maranéh,Sakumaha nu geus dilampahkeun ku Kuring basa maranéh budal ti Mesir.
16 Bangsa-bangsa bakal naringali hal éta sarta jadi aréraeun, sanajan maranéhna téh kuat.
Maranéhna bakal nutupan biwirna.Ceuli maranéhna bakal jadi torék.
17 Maranéhna bakal ngalétakan kekebul kawas oray.Kawas sasatoan nu ngarayap di bumi, maranéhna bakal kalaluar tina tempat panyalindunganana bari ngadégdég.
Maranéhna bakal datang ka Allah Yéhuwa bari gumeter.Maranéhna bakal sarieuneun ku Anjeunna.”
18 Saha Allah nu sapertos Gusti,Nu ngahampura kasalahan sareng palanggaran ti umat-Na nu harirup kénéh?
Anjeunna moal ambek salawasna,Sabab Anjeunna téh resep némbongkeun kanyaah.*
19 Anjeunna bakal mikawelas deui ka urang. Anjeunna bakal nalukkeun* dosa-dosa urang.
Gusti bakal ngalungkeun sadaya dosa maranéhna ka laut nu jero.
20 Gusti bakal satia ka Yakub,Nyaah* ka Ibrahim,Sakumaha sumpah Gusti kapungkur ka karuhun abdi sadaya.
Catetan Tambihan
^ As. ”jaring”.
^ As. ”manéh”.
^ As. ”ngaadilan manéh”.
^ Katingalina ngamaksudkeun Zion atawa Yérusalém.
^ Atawa ”warisan”.
^ Atawa ”asih satia”.
^ Atawa ”nincakan”.
^ Atawa ”Némbongkeun asih satia”.
