Pamindo 33:1-29
33 Ieu berkah nu diucapkeun ku Musa, hamba Allah nu sajati, ka urang Israél saacan maot.
2 Ceuk Musa,
”Yéhuwa sumping ti Gunung Sinai,Anjeunna nyaangan umat-Na ti Séir.
Cahaya-Na ngagebray ti wilayah pagunungan Paran.Anjeunna disarengan ku puluhan rébu malaikat-Na nu suci
Sareng para prajurit-Na nu aya di katuhueun Anjeunna.
3 Anjeunna nyaah ka umat-Na.Sakabéh umat-Na nu suci aya dina panangan-Na.
Maranéhna calik caket sampéan Gusti,Teras ngadangukeun firman ti Gusti.
4 (Musa masihan paréntah sareng hukum ka abdi sadaya.Éta jadi milik jamaah Yakub.)
5 Allah jadi raja di Yésyurun,*Waktu para pamingpin éta bangsa karumpulBareng jeung sakabéh kaom Israél.
6 Mugia Rubén terus hirup jeung teu maot.Mugia jalma-jalma di kaomna teu jadi saeutik.”
7 Musa ngucapkeun ieu berkah keur Yéhuda,
”Nun Yéhuwa, dangukeun ucapan Yéhuda.Mugia Gusti ngahijikeun deui manéhna jeung bangsana.
Ku leungeunna, manéhna ngajaga milikna.Mugia Gusti ngabantu manéhna ngalawan musuh-musuhna.”
8 Manéhna ngomong kieu ngeunaan Léwi,
”Urim jeung Tumim Gusti téh milik jalma nu satia ka Gusti,Nu ku Gusti diuji di Masah.
Gusti pagétréng jeung manéhna di Cinyusu Mériba.
9 Urang Léwi teu mihak ka indung bapana,
Teu mihak ka dulur-dulurna,Sarta teu mihak ka anak-anakna sorangan.
Éta téh lantaran maranéhna taat kana ucapan GustiSarta nyekel kana perjangjian Gusti.
10 Mugia maranéhna ngajarkeun putusan hukum Gusti ka YakubSarta ngajarkeun hukum Gusti ka Israél.
Maranéhna sina nyanggakeun dupa nu seungitna nyukakeun GustiSarta ngabaktikeun kurban beuleuman dina mézbah Gusti.
11 Nun Yéhuwa, berkahan kakuatanana.Mugia Gusti mikasuka hasil gawéna.
Remukkeun suku* jalma-jalma nu ngalawan ka manéhna,Supaya jalma nu ngéwa ka manéhna teu bisa nangtung deui.”
12 Manéhna ngomong kieu ngeunaan Bényamin,
”Mugia jalma nu dipikanyaah ku Yéhuwa aman matuh di deukeut manéhna.*Éta jalma bakal ditangtayungan ku manéhna* sapoé jeput,Bakal aya di antara taktakna.”
13 Manéhna ngomong kieu ngeunaan Yusuf,
”Mugia Yéhuwa ngaberkahan tanahna
Ku hal-hal panghadéna ti langit,Ku ciibun jeung cai ti jero taneuh,
14 Ku hasil nu aralus, nu jaradi lantaran panonpoé,Hasil panén nu aralus unggal bulan,
15 Ku hal-hal pangalusna ti gunung-gunung jaman baheula,*Ku hal-hal nu aralus ti pasir-pasir* nu geus lila aya,
16 Ku hal-hal nu aralus ti bumi jeung sakabéh eusina,Sarta ku kasaéan Allah nu muncul dina rungkun cucuk.
Mugia éta kabéh katarima ku Yusuf,Jalma nu dipilih ti antara dulur-dulurna.
17 Kakuatanana kawas anak cikal sapi jalu,Tandukna kawas tanduk sapi jalu leuweung.
Ku tandukna, manéhna bakal neunggar bangsa-bangsaNepi ka mecleng ka tungtung-tungtung bumi.
Éta tanduk-tanduk téh puluhan rébu urang Éfraim.Éta tanduk-tanduk téh mangrébu-rébu urang Manasyé.”
18 Manéhna ngomong kieu ngeunaan Zébulon,
”Hé Zébulon, sing gumbira waktu manéh rék indit dagang.Hé Isakhar, sing saruka bungah di kémah-kémah manéh.
19 Maranéhna bakal ngageroan bangsa-bangsa ka gunung,
Prak di dinya maranéhna nyanggakeun kurban nu layak.
Maranéhna bakal ngeduk kakayaan laut nu kacida lobanaSarta harta pependeman dina keusik.”
20 Manéhna ngomong kieu ngeunaan Gad,
”Sing diberkahan jalma nu ngalegakeun wilayah Gad.
Manéhna depa di ditu kawas singa,Siap nyasaak leungeun jeung sirah.
21 Manéhna bakal milih tanah nu pangalusna,Éta téh bagian nu geus disadiakeun ku jalma nu méré hukum.
Para pamingpin éta bangsa bakal karumpul.
Manéhna bakal ngalaksanakeun kaadilan ti Yéhuwa
Sarta putusan hukum-Na keur Israél.”
22 Manéhna ngomong kieu ngeunaan Dan,
”Dan téh kawas anak singa.
Manéhna bakal ngagajleng ti Basyan.”
23 Manéhna ngomong kieu ngeunaan Naftali,
”Naftali téh wareg ku kasaéanSarta berkah ti Yéhuwa.
Sok cokot wilayah kulon jeung kidul.”
24 Manéhna ngomong kieu ngeunaan Asyér,
”Allah geus ngaberkahan Asyér ku loba anak.
Mugia manéhna dipikaresep ku dulur-dulurna,Sarta mugia manéhna ngancrubkeun* sukuna kana minyak.
25 Beusi jeung tambaga jadi gembok dina gerbang manéh,Sapanjang hirup bakal aman.
26 Teu aya nu saperti Allahna Yésyurun, Allah nu sajati,Nu nulungan manéh ti langitSarta nu tunggang méga* dina kamulyaana-Na.
27 Allah téh tempat nyalindung ti jaman baheula.Panangan-Na nu kuat nanggeuy manéh salawasna.
Anjeunna bakal ngusir musuh ti hareupeun manéhSarta nyarios, ’Binasakeun maranéhna!’
28 Israél bakal hirup aman,Turunan* Yakub bakal tengtremDi tanah nu loba sisikian jeung cianggur anyar,Nu langitna bakal ngeclakkeun ciibun.
29 Hé Israél, manéh téh bagja!
Saha nu saperti manéh,Umat nu disalametkeun ku Yéhuwa,Nu jadi taméng panyalindungan manéhJeung pedang manéh nu hébat?
Musuh-musuh bakal sarieuneun di hareupeun manéh.Tonggong* maranéhna bakal dileyekan ku manéh.”
Catetan Tambihan
^ Hartina ”Jalma Bener”, gelaran kahormatan keur Israél.
^ Atawa ”pingping”.
^ Atawa bisa jadi ”Anjeunna [Allah]”.
^ Atawa bisa jadi ”Anjeunna [Allah]”.
^ Atawa bisa jadi ”gunung-gunung beulah wétan”.
^ Atawa ”bukit-bukit”.
^ Atawa ”nyakrubkeun”.
^ Atawa ”awan”.
^ As. ”Cinyusu”.
^ Atawa bisa jadi ”Tempat-tempat luhur”.
