PALAJARAN 2
Saha Gusti Allah téh?
1. Ku naon urang kudu nyembah ka Gusti?
Gusti téh nu nyiptakeun sagalana. Mantenna teu aya awalna jeung teu aya ahirna. (Jabur 90:2) Gusti nyaah ka urang, jadi Mantenna masihan kabar gumbira dina Kitab Suci. (1 Timoteus 1:11) Gusti ogé masihan kahirupan ka urang. Jadi, ngan Mantenna nu layak disembah. Baca Wahyu 4:11.
2. Naon waé nu kudu dipikanyaho ku urang ngeunaan Gusti?
Teu aya manusa nu pernah ningali Gusti, sabab Gusti aya di sawarga. Mahluk sawarga leuwih kuat jeung leuwih pinter ti batan nu hirup di bumi. (Yohanes 4:24) Sanajan Gusti teu katingali, urang bisa apal sipat-sipat Gusti tina ciptaana-Na. Misalna tina bubuahan jeung kekembangan, urang apal yén Gusti téh bijaksana jeung nyaah ka urang. Jagat raya nu sakitu gedéna ogé nunjukkeun kawasa-Na nu luar biasa. Baca Rum 1:20.
Urang bisa apal leuwih loba sipat Gusti ku maca Kitab Suci. Contona, Kitab Suci ngajelaskeun naon nu dipikaresep ku Gusti jeung nu henteu. Kitab Suci ogé ngajelaskeun naon nu bakal dilakukeun Gusti ka jalma nu kalakuanana hadé jeung goréng. Baca Jabur 103:7-10.
3. Saha nami Gusti téh?
Ceuk Nabi Daud, ”Nun Yéhuwa, Gusti abdi sadaya, pohara agungna nami Gusti di sakuliah bumi.” (Jabur 8:1, Terjemahan Dunia Baru, ”NW”) Sanajan gelar-Na loba, saperti Pangéran, Gusti, atawa Allah, nami Gusti téh ngan hiji. Cara macana ogé béda-béda, gumantung kana basana. Dina basa Sunda, dibacana ”Yéhuwa”. Tapi aya ogé nu nyebut ”Yahwéh”. Kitab Suci nyebutkeun, ”Mugia jalma-jalma apal yén Gusti, nu nami-Na Yéhuwa, ngan Gusti wungkul nu Maha Kawasa di sakuliah bumi.”—Jabur 83:18, NW.
Loba tarjamahan Alkitab ngaganti nami Gusti ku gelar Pangéran atawa Allah. Tapi waktu Alkitab ditulis, nami Gusti disebutkeun kira-kira 7.000 kali. Nabi Isa ogé méré nyaho nami Gusti ka jalma-jalma. Baca Yohanes 17:26.
Tingali vidéo Saha Nami Gusti Allah téh?
4. Naha enya Yéhuwa nyaah ka urang?
Saperti bapa nu nyaahan, nu dilakukeun ku Gusti téh pikeun kahadéan urang
Di dunya, aya loba pisan jalma nu sangsara. Naha éta hartina Yéhuwa teu paduli ka urang? Aya nu ngomong, waktu urang sangsara, urang téh keur diuji ku Gusti. Tapi, éta téh salah. Baca Yakobus 1:13.
Manusa dibéré kabébasan pikeun nyieun putusan. Tangtu urang ngahargaan kabébasan ieu. (Yosua 24:15) Tapi loba jalma malah ngajahatan batur, ku kituna loba nu jadi sangsara. Yéhuwa sedih pisan ningalina. Baca Kajadian 6:5-7.
Yéhuwa nyaah jeung hoyong urang hirup senang. Moal lila deui, Mantenna bakal nyingkirkeun kasangsaraan jeung kabéh nu nyababkeunana. Tapi, Yéhuwa boga alesan pikeun ngantep kasangsaraan keur sababaraha waktu. Ieu bakal dibahas dina Palajaran 8. Baca 2 Petrus 2:9; 3:7, 13.
5. Kumaha carana nyobat jeung Gusti?
Yéhuwa merhatikeun unggal jalma. Yéhuwa hoyong urang ngadoa supaya urang bisa nyobat jeung Mantenna. (Jabur 65:3; 145:18) Yéhuwa ogé resep ningali upaya urang dina nyenangkeun Mantenna. Sanajan urang sok nyieun salah, Yéhuwa daék ngahampura. Jadi sanajan teu sampurna, urang bisa nyobat jeung Gusti. Baca Jabur 103:12-14; Yakobus 4:8.
Yéhuwa nu masihan kahirupan, jadi urang kudu leuwih nyaah ka Mantenna ti batan ka nu séjén. (Markus 12:30) Lamun terus diajar ngeunaan Gusti jeung ngajalankeun paréntah-Na, Sadérék bakal leuwih nyaah ka Mantenna. Sadérék ogé bisa leuwih raket ka Gusti. Baca 1 Timoteus 2:4; 1 Yohanes 5:3.
