1-2. Saperti nu disebutkeun dina Rasul 8:27-31, 35, 36, 38, naon nu ngajurung pajabat Étiopia pikeun dibaptis?

NAHA Sadérék hayang dibaptis pikeun jadi murid Kristus? Loba nu geus dibaptis lantaran nyaah jeung ngahargaan Yéhuwa. Perhatikeun conto ti saurang pajabat di karaton ratu Étiopia.

² Sanggeus diajar Kitab Suci, pajabat éta langsung nyieun tindakan. (Baca Rasul 8:27-31, 35, 36, 38.) Naon nu ngajurung manéhna? Manéhna bener-bener ngahargaan Firman Allah. Buktina, basa naék karéta kuda, manéhna keur maca bagian tina kitab Yesaya. Tuluy waktu Pilipus méré kasaksian, manéhna ngahargaan pisan naon nu geus dilakukeun Yésus keur manéhna. Manéhna gé geus nyaah pisan ka Yéhuwa. Urang nyaho ti mana? Manéhna téh kakara balik ti Yérusalém pikeun ibadah ka Yéhuwa. Manéhna geus ninggalkeun agamana nu baheula, tuluy ibadah bareng jeung hiji-hijina bangsa nu dibaktikeun ka Allah nu sajati. Ayeuna, kanyaahna ka Yéhuwa éta nu utamana ngajurung manéhna nyieun putusan penting séjénna, nyaéta dibaptis jeung jadi murid Kristus.​—Mat. 28:19.

3. Naon nu bisa jadi ngahalangan saurang jalma dibaptis? (Tingali kotak ” Siga Kumaha Haté Sadérék?”)

³ Kanyaah ka Yéhuwa bisa ngajurung urang dibaptis. Tapi, aya kanyaah atawa karesep nu bisa ngahalangan urang dibaptis. Perhatikeun sababaraha contona. Meureun Sadérék nyaah pisan ka kulawarga jeung babaturan nu teu saiman. Sadérék sieun lamun engké dibaptis, maranéhna bakal ngéwa ka Sadérék. (Mat. 10:37) Atawa Sadérék resep kana kabiasaan nu dipikangéwa  ku Yéhuwa. Sadérék jadi hésé ngeureunkeun kabiasaan éta. (Jab. 97:10) Atawa ti leuleutik, Sadérék biasa ngarayakeun perayaan nu aya patalina jeung agama palsu. Sadérék resep lantaran boga loba pangalaman éndah tina perayaan éta. Jadina, Sadérék hésé ngeureunkeun hal-hal nu teu kamanah ku Yéhuwa. (1 Kor. 10:20, 21) Lamun kitu, pikirkeun, ”Saha atawa naon nu paling dipikanyaah jeung dipikaresep ku abdi?”

4. Naon nu utamana ngajurung Sadérék dibaptis?

⁴ Saacan diajar jeung Saksi Yéhuwa, Sadérék meureun geus resep diajar ngeunaan Allah jeung sagala hal nu geus dilakukeun ku Mantenna. Ayeuna sanggeus kenal jeung Saksi Yéhuwa, Sadérék resep campur gaul jeung maranéhna. Tangtu Sadérék resep jeung ngahargaan hal-hal hadé éta. Tapi, éta kabéh can tangtu ngalantarankeun Sadérék hayang ngabaktikeun diri ka Yéhuwa jeung dibaptis. Hal utama nu bakal ngajurung Sadérék dibaptis téh nyaéta kanyaah ka Allah Yéhuwa. Lamun Sadérék leuwih nyaah ka Yéhuwa ti batan ka nu séjénna, moal aya nu bisa ngahalangan Sadérék ngawula Mantenna. Kanyaah ka Yéhuwa téh ngajurung Sadérék dibaptis jeung ngabantu Sadérék tetep satia.

5. Naon nu bakal dibahas dina artikel ieu?

⁵ Ceuk Yésus, urang kudu nyaah ka Yéhuwa ku sapinuh haté, jiwa, budi akal, jeung kakuatan. (Mar. 12:30) Kumaha urang bisa boga kanyaah jeung panghargaan nu sakitu gedéna? Lamun mikirkeun Yéhuwa téh kacida nyaahna ka urang, urang jadi malik nyaah ka Mantenna. (1 Yoh. 4:19) Jadi dina artikel ieu, urang bakal ngabahas naon nu kudu dilakukeun sangkan beuki nyaah ka Yéhuwa tuluy dibaptis.

6. Numutkeun Rum 1:20, naon salah sahiji cara urang bisa diajar ngeunaan Yéhuwa?

⁶ Diajar ngeunaan Yéhuwa liwat ciciptaan. (Baca Rum 1:20; Wahyu 4:11) Pikirkeun hikmat Yéhuwa tina pepelakan jeung sasatoan nu diciptakeun. Pék diajar kumaha awak urang geus dirancang sakitu hébatna. (Jab. 139:14) Lenyepan, Yéhuwa geus nyiptakeun panonpoé nu sakitu gedé énergina. Éta téh ngan salah sahiji ti miliaran béntang. * (Yes. 40:26) Ku kituna, Sadérék bakal leuwih ngahargaan Yéhuwa. Tapi, apal kana hikmat jeung kawasa Yéhuwa téh ngan salah sahiji dasar pikeun nyobat jeung Mantenna. Sangkan bisa leuwih nyaah ka Yéhuwa, Sadérék kudu diajar leuwih loba ngeunaan Mantenna.

7. Sangkan beuki nyaah ka Yéhuwa, Sadérék kudu yakin kana hal naon?

⁷ Sadérék kudu yakin yén Yéhuwa merhatikeun Sadérék sacara pribadi. Naha Sadérék cangcaya yén Nu Nyiptakeun sawarga jeung bumi téh merhatikeun jeung nyaah ka Sadérék? Mun kitu, inget yén Yéhuwa téh ”henteu jauh ti diri urang masing-masing”. (Ras. 17:26-28) Mantenna ”mariksa haté” jeung jangji ka Sadérék, saperti nu dibéjakeun Daud ka Suléman, ”Lamun hidep néangan Mantenna, Mantenna bakal daék dipanggihan.” (1 Bab. 28:9, Terjemahan Dunia Baru) Malah sabenerna, Sadérék bisa diajar Alkitab téh lantaran geus ”ditarik ku Rama” Yéhuwa. (Yoh. 6:44) Lamun paham naon  waé nu tos dilakukeun Yéhuwa keur Sadérék, Sadérék bakal beuki nyaah ka Mantenna.

8. Kumaha urang bisa malik nyaah ka Yéhuwa?

⁸ Hiji cara urang malik nyaah ka Yéhuwa téh nyaéta nyarita ka Mantenna dina doa. Sadérék bakal beuki nyaah ka Allah lamun ngungkabkeun kahariwangan jeung ngucapkeun sukur kana naon nu tos dilakukeun ku Mantenna. Sosobatan Sadérék jeung Yéhuwa gé bakal beuki kuat waktu Sadérék ningali jawaban doa ti Mantenna. (Jab. 116:1) Sadérék bakal yakin yén Yéhuwa paham ka Sadérék. Tapi sangkan beuki raket jeung Yéhuwa, Sadérék kudu paham cara pikir Mantenna. Sadérék gé kudu nyaho naon nu dipiharep Mantenna ti Sadérék. Hiji-hijina cara nyaéta diajar Firman-Na, Alkitab.

9. Naon buktina Sadérék ngahargaan Alkitab?

⁹ Hargaan Firman Allah, Alkitab. Ngan Alkitab nu ngamuat bebeneran ngeunaan Yéhuwa jeung tujuan Mantenna keur Sadérék. Sadérék bisa ngahargaan Alkitab ku cara maca unggal poé, persiapan mun rék diajar Alkitab, jeung ngalarapkeun palajaranana. (Jab. 119:97, 99; Yoh. 17:17) Naha Sadérék boga jadwal maca Alkitab? Naha Sadérék nuturkeun jadwalna sangkan bisa maca unggal poé?

10. Hal istiméwa naon nu ngan dicatet dina Alkitab?

¹⁰ Hal istiméwa nu ngan dicatet dina Alkitab nyaéta kisah kahirupan Yésus nu dicaritakeun ku jalma-jalma nu nyaksian langsung. Alkitab téh hiji-hijina buku nu sacara akurat ngajelaskeun naon nu geus dilakukeun Yésus keur Sadérék. Waktu diajar ngeunaan ucapan jeung tindakan Yésus, Sadérék bakal hayang jadi sobatna.

11. Kumaha Sadérék bisa mikanyaah Yéhuwa?

¹¹ Pikanyaah Yésus. Ku kituna, Sadérék bakal beuki nyaah ka Yéhuwa. Naha bet kitu? Lantaran Yésus kalawan sampurna nyonto sipat-sipat Bapana. (Yoh. 14:9) Jadi lamun diajar beuki jero ngeunaan Yésus, Sadérék bakal beuki paham  kana cara pikir jeung tindakan Yéhuwa. Sadérék bakal ngarasa beuki raket jeung Yéhuwa. Pikirkeun welas asih Yésus ka jalma-jalma nu disapirakeun, nyaéta nu miskin, nu gering, jeung nu lemah. Pikirkeun ogé naséhat anjeunna jeung mangpaatna lamun éta dilarapkeun.​—Mat. 5:1-11; 7:24-27.

12. Beuki loba diajar ngeunaan Yésus, Sadérék bakal kajurung pikeun ngalakukeun naon?

¹² Sadérék bakal beuki nyaah ka Yésus lamun mikirkeun pangorbananana sangkan dosa-dosa urang bisa dihampura. (Mat. 20:28) Lamun Sadérék paham yén Yésus réla maot demi Sadérék, Sadérék bakal kajurung pikeun tobat jeung ménta hampura ka Yéhuwa. (Ras. 3:19, 20; 1 Yoh. 1:9) Lamun Sadérék nyaah ka Yésus jeung Yéhuwa, Sadérék bakal kajurung pikeun nyobat jeung jalma-jalma nu mikanyaah Aranjeunna ogé.

13. Naon nu disadiakeun Yéhuwa keur Sadérék?

¹³ Pikanyaah jalma-jalma nu mikanyaah Yéhuwa. Kulawarga atawa babaturan nu teu saiman meureun teu ngarti ku naon Sadérék hayang ngabaktikeun diri ka Yéhuwa. Bisa jadi Sadérék ditentang ku maranéhna. Tapi, Yéhuwa nyadiakeun kulawarga rohani. Lamun tetep deukeut jeung kulawarga rohani, Sadérék bakal didukung jeung dipikanyaah ku maranéhna. (Mar. 10:29, 30; Ibr. 10:24, 25) Sugan kahareupna anggota kulawarga Sadérék hayang milu ngawula jeung nuturkeun patokan hirup ti Yéhuwa.​—1 Pet. 2:12.

14. Sakumaha nu dicatet dina 1 Yohanes 5:3, naon nu dirasakeun Sadérék ngeunaan patokan hirup ti Yéhuwa?

¹⁴ Hargaan jeung larapkeun patokan hirup ti Yéhuwa. Saacan kenal Yéhuwa, meureun Sadérék boga patokan hirup sorangan. Tapi ayeuna Sadérék sadar yén patokan hirup ti Yéhuwa téh jauh leuwih hadé. (Jab. 1:1-3; baca 1 Yohanes 5:3) Pikirkeun naséhat Alkitab keur salaki, pamajikan, kolot, jeung budak. (Epe. 5:22–6:4) Waktu ngalarapkeun naséhat éta, kulawarga Sadérék jadi beuki harmonis pan? Waktu taat kana naséhat Yéhuwa ngeunaan milih babaturan, Sadérék jadi jalma nu leuwih hadé pan? Sadérék jadi leuwih bagja pan? (Sil. 13:20; 1 Kor. 15:33)

15. Sadérék kudu kumaha lamun hayang nyaho carana ngalarapkeun prinsip Alkitab?

¹⁵ Meureun sakapeung Sadérék teu nyaho kumaha carana ngalarapkeun prinsip Alkitab. Éta sababna Yéhuwa ngagunakeun organisasi-Na pikeun nyadiakeun publikasi dumasar Alkitab nu bisa ngabantu Sadérék ngabédakeun nu bener jeung nu salah. (Ibr. 5:13, 14) Waktu maca jeung diajar tina publikasi éta, Sadérék bakal ngarasa yén bahan-bahanna téh aya mangpaatna jeung bisa dilarapkeun. Ku kituna, Sadérék hayang jadi bagian tina organisasi Yéhuwa.

16. Kumaha Yéhuwa ngaorganisasi umat-Na?

¹⁶ Pék diajar leuwih loba jeung dukung organisasi Yéhuwa. Yéhuwa ngaorganisasi umat-Na di sidang-sidang. Yésus, Putra-Na, jadi kapalana. (Epe. 1:22; 5:23) Yésus ngalantik sababaraha priya nu diistrénan pikeun mingpin kagiatan organisasi nu luyu jeung kahayang anjeunna. Priya-priya nu ku Yésus disebut ”gandek satia jeung bijaksana” ieu, bener-bener ngajalankeun tanggung jawab maranéhna pikeun méré dahar jeung ngalindungan Sadérék sacara rohani. (Mat. 24:45-47) Salah sahiji cara gandék satia ngurus urang téh nyaéta ngalantik para kokolot  nu nyumponan sarat pikeun ngabingbing jeung ngajaga urang. (Yes. 32:1, 2; Ibr. 13:17; 1 Pet. 5:2, 3) Para kokolot satékah polah nguatkeun sarta ngabantu Sadérék beuki raket jeung Yéhuwa. Tapi salah sahiji hal pangpentingna nu dilakukeun ku maranéhna téh nyaéta ngabantu Sadérék ngajar batur ngeunaan Yéhuwa.​—Epe. 4:11-13.

17. Numutkeun Rum 10:10, 13, 14, ku naon urang kudu nyaritakeun Yéhuwa ka batur?

¹⁷ Bantu batur mikanyaah Yéhuwa. Yésus nitah murid-muridna ngajar batur ngeunaan Yéhuwa. (Mat. 28:19, 20) Urang bisa waé taat kana paréntah éta ngan saukur ku kawajiban. Tapi waktu kanyaah Sadérék ka Yéhuwa beuki gedé, Sadérék bakal boga parasaan siga Rasul Pétrus jeung Yohanes, ”Sim kuring moal tiasa upami dugi ka henteu nyanggemkeun perkawis eta, anu parantos katingal sareng kakuping pribadi.” (Ras. 4:20) Bisa ngabantu batur mikanyaah Yéhuwa téh pikabungaheun pisan. Pék bayangkeun sakumaha bungahna Pilipus waktu ngajarkeun bebeneran Alkitab ka pajabat Étiopia nepi ka dibaptis! Waktu Sadérék nyonto Pilipus jeung taat kana paréntah Yésus pikeun ngawawar, éta bukti yén Sadérék téh hayang jadi Saksi Yéhuwa. (Baca Rum 10:10, 13, 14.) Engké, Sadérék gé bakal nanya saperti pajabat Étiopia éta, ”Kumaha . . . upami sim kuring dibaptis?”​—Ras. 8:36.

18. Naon nu bakal dibahas dina artikel saterusna?

¹⁸ Dibaptis téh putusan nu pangpentingna dina kahirupan Sadérék. Jadi, Sadérék kudu bener-bener mikirkeunana. Sadérék kudu nyaho naon waé ngeunaan baptisan? Naon nu kudu dilakukeun saacan jeung sanggeus dibaptis? Pananya-pananya ieu bakal dijawab dina artikel saterusna.