Alkitab nyaritakeun yén sanggeus Yusup dibawa ku urang Midian ka Mesir, Yakub bapana jeung kulawargana pindah ti Kanaan ka Mesir. Di ditu, maranéhna cicing di Gosén, di Délta Walungan Nil. (Kaj. 47:1, 6) Terus bangsa Israil ”jumlahna beuki ngarekahan sarta jadi kuat”. Urang Mesir jadi ngarasa kaancam, ku kituna urang Israil diperbudak ku maranéhna.​—Bud. 1:7-14.

Sababaraha kritikus modéren ngaléléwé yén kisah Alkitab éta ngan dongéng. Tapi aya bukti-bukti yén bangsa turunan Sém * téh pernah diperbudak di Mesir kuno.

Misalna, para arkéolog manggihan ruruntuhan tina pamukiman kuno di Mesir beulah kalér. Dr. John Bimson ngalaporkeun bukti yén aya leuwih ti 20 pamukiman bangsa turunan Sém di ditu. Salian ti éta, James K. Hoffmeier nu ahli ngeunaan Mesir ngomong, ”Kira-kira dina taun 1800 SM nepi ka 1540 SM, bangsa turunan Sém ti Asia Timur harayangeun pindah ka Mesir.” Manéhna gé nyebutkeun yén éta sajaman jeung Ibrahim, Ishak, sarta Yakub, jadi waktu sarta kaayaanana cocog jeung nu ditulis dina buku Kajadian.

Aya deui bukti séjénna ti Mesir beulah kidul. Aya papirus, nu asalna kira-kira ti taun 2000–1600 SM, nu ngamuat ngaran para badéga nu digawé di hiji imah di daérah éta. Leuwih ti 40 ngaran éta téh ngaran turunan Sém. Para badéga ieu digawé jadi tukang masak, tukang tenun, jeung buruh. Hoffmeier gé nyebutkeun, ”Lamun di hiji imah di Thebaid [Mesir beulah kidul] wé aya leuwih ti opat puluh turunan Sém nu digawé, jumlah maranéhna di sakuliah Mesir pasti loba pisan, utamana di daérah Délta.”

Saurang arkéolog nu ngaranna David Rohl nulis yén sababaraha ngaran badéga éta téh percis pisan jeung ngaran-ngaran dina Alkitab. Misalna dina papirus éta, aya ngaran-ngaran saperti Isaskar, Asér, jeung Sipra. (Bud. 1:3, 4, 15) Rohl nyimpulkeun, ”Ieu téh bukti nu kuat yén bangsa Israil pernah diperbudak di Mesir.”

Dr. Bimson nyebutkeun yén kisah Alkitab ngeunaan bangsa Israil nu diperbudak di Mesir jeung kaluar ti dinya téh didukung ku bukti sajarah nu kuat.