Mashahidi 47,000 hivi wa Yehova wamelazimika kukimbia makao yao kwa sababu ya vita vinavyoendelea nchini Ukrainia. Wengi wamekimbilia maeneo salama zaidi nchini humo, na huko waabudu wenzao wanawapa mavazi, chakula, mahali pa kulala na mahitaji mengine ya lazima. Ingawa ndugu na dada wanaowakaribisha wengine nyumbani kwao wanakabiliana na matatizo ya kiuchumi, wanafurahia kuwasaidia ndugu zao wenye uhitaji.

Katika miezi ya kwanza miwili ya vita, Olha anayeishi Uman, Ukrainia, pamoja na mume wake ambaye si Shahidi waliwapokea wahubiri 300 nyumbani kwao. Wengi kati ya ndugu na dada hao walilala hapo usiku mmoja na kisha wakaendelea na safari yao. Mara nyingi, Olha alipata habari usiku wa manane kwamba watu wangekuja kwake, muda mfupi tu kabla ya wao kufika. Pindi moja, Olha aliwapokea ndugu na dada 22 nyumbani kwake. Stanislav, mwenye umri wa miaka 18, ni mwana wa Olha, na hali hii imempa nafasi ya kuonyesha ukarimu. Mara nyingi, analala sakafuni ili ndugu na dada wanaofikia kwao walale chumbani mwake.

Olha anasema hivi: “Ninapata shangwe nyingi kwa sababu ninawasaidia watu wa Yehova katika nyakati hizi ngumu, ninahisi vizuri sana.”

Andriy na mke wake, Liudmyla, waliwapokea Mashahidi 200 ndani ya majuma matano. Usiku mmoja walikuwa na watu 18 nyumbani kwao. Andriy anasema hivi: “Tulifuata mwongozo tuliopata kutoka kwa ofisi ya tawi wa kuhifadhi akiba ya chakula nyumbani. Tulitumia akiba hiyo kwa wiki moja na nusu kuwahudumia ndugu waliolazimika kukimbia makao yao. Ndugu hao walituachia bahasha zenye kadi na pesa, na tulitumia pesa hizo kununua chakula chochote ambacho tungeweza kupata kwa ajili ya wageni ambao wangekuja baada yao. Halmashauri ya Kutoa Msaada ilituandalia chakula pia, kwa hiyo hatukukosa chochote.”

Mwezi wa Machi, Vita anayeishi Ivano-Frankivsk, alihama nyumba yake na akaenda kuishi na dada yake ili Mashahidi waliolazimika kukimbia watumie nyumba wake. Vita anasema hivi: “Kwangu, kufanya hivyo si kujidhabihu ila ni wonyesho wa upendo. Mambo ninayofanya kwa ajili ya akina ndugu wanaokimbia hunipa shangwe. Sisi ni watu wa familia moja.”

Natalia na mume wake wanaishi jijini Ternopil pamoja na binti yao anayeitwa Habriela. Wote walipoteza kazi vita vilipoanza na walilazimika kutumia sehemu kubwa ya pesa walizokuwa wameweka kushughulikia mahitaji yao. Hata hivyo, walikuwa tayari kuishi na dada aliyekuwa amelazimika kukimbia pamoja na binti yake ambaye ni mlemavu.

Natalia anasema hivi: “Ninakumbuka kisa cha dada mmoja barani Afrika ambaye alikuwa na vitu vichache vya kimwili lakini bado aliwakaribisha ndugu na dada 14 nyumbani kwake wakati wa kusanyiko, na hakuna aliyekosa chochote.” Natalia alieleza kwamba kisa hicho kimemsaidia kutanguliza mahitaji ya wengine.

Ingawa ndugu na dada zetu nchini Ukrainia wanakabili hali ngumu, wanaonyesha hekima kwa kumtegemea Yehova, wanapoendelea kuwa “wakaribishaji wageni.”​—Waroma 12:13.