Tunasikitika kuripoti kwamba dada zetu wawili walikufa kwa sababu ya mashambulizi ya mabomu katika jiji la Mariupol. Kwa sasa zaidi ya ndugu na dada zetu 2,000 hawawezi kukimbia kutoka mji huo kwa sababu ya vita vikali vinavyoendelea. Katika siku chache zilizopita Mashahidi 150 hivi walifaulu kukimbia. Akina ndugu katika Halmashauri ya Kutoa Msaada walijaribu kupeleka mahitaji ya msingi katika jiji la Mariupol lakini walilazimika kurudi kwa sababu wao na watu wengine waliokuwa wakipeleka misaada walishambuliwa. Bomu lililipuka katika uwanja ulio na Jumba la Ufalme na Jumba la Kusanyiko. Wakati huo ndugu na dada 200 hivi walikuwa wamejificha katika chumba kilicho chini ya Jumba la Ufalme. Akina ndugu hawakujeruhiwa, lakini magari yaliharibiwa na hivyo kufanya iwe vigumu zaidi kukimbia jiji hilo.

Mzee mmoja wa kutaniko (aliye kwenye picha) ambaye alifanikiwa kuondoka Mariupol pamoja na familia yake anasema hivi: “Tulipoteza makao yetu, kazi zetu, na hatungeweza kuwasiliana na marafiki zetu. Kwa kawaida safari yetu ingechukua siku moja, lakini ilichukua siku sita. Tulipokuwa katika gari tukiondoka jijini, barabarani tuliona mabomu ambayo bado hayajalipuka yakitoa moshi. Tulipokuwa tukisafiri, akina ndugu walitusaidia kupata chakula na mahali pa kulala. Tulihisi kwamba Baba yetu, Yehova, alikuwa akitutunza . . . Mambo hayo yanatuhakikishia kwamba tunapaswa kumtegemea Yehova kikamili.”

Mashahidi wa Yehova wanaokimbia kutoka Ukrainia wamekimbilia nchi mbalimbali barani Ulaya ili kupata usalama. Kwa mfano, mtumishi mmoja wa huduma alikimbilia Ureno pamoja na mke wake na watoto wao watatu wenye umri wa miaka 7, 11, na 16. Wana watu wao wa ukoo ambao ni Mashahidi wa Yehova nchini Ureno. Walisubiri kwa saa 11 mpakani, kisha wakasafiri zaidi ya kilometa 4,000 kwa siku nne kabla ya kufika walikoishi watu wao wa ukoo. Waliwasili kabla tu ya mkutano kuanza. Ingawa familia hiyo haizungumzi Kireno, waliendelea kumwabudu Yehova na walihudhuria mkutano huo. Kutaniko hilo lilifurahi kuona kwamba familia hiyo ilikuwa na shangwe licha ya hali yao ngumu.

Dada mmoja aliyekimbilia Ujerumani pamoja na familia yake, anasema hivi: “Kusoma Biblia, na kutafakari mambo mazuri tuliyonayo maishani na tumaini la pekee ambalo sisi wote tunalo, hutuimarisha sana na kututia moyo. . . . Tumeona mkono wa Yehova ukituongoza na kutusaidia kupitia ndugu zetu. Wametukaribisha na kutusaidia sana kuanzia Ukrainia, katika Hungaria, na hapa Ujerumani pia!”

Ni wazi kwamba Yehova anawasaidia sana ndugu na dada zetu wapendwa wote nchini Ukrainia.​—Zaburi 145:14.

Kufikia Machi 16, 2022, hizi ndizo takwimu zilizotufikia kutoka Ukrainia. Takwimu hizo zinategemea ripoti za uhakika tulizopata kutoka kwa ndugu walio katika maeneo hayo. Hata hivyo, huenda idadi halisi inaweza kuwa kubwa zaidi kwa sababu ni vigumu kudumisha mawasiliano mazuri katika maeneo yote nchini.

• Wahubiri 4 wamekufa

• Wahubiri 19 wamejeruhiwa

• Wahubiri 29,789 wameacha makao yao na kwenda sehemu zilizo salama zaidi nchini.

• Nyumba 45 zimeharibiwa kabisa

• Nyumba 84 zilipata uharibifu mkubwa

• Nyumba 366 zimepata uharibifu mdogo

• Majumba 16 ya Ufalme yameharibiwa

• Halmashauri 27 za kutoa msaada zinashughulikia hali nchini Ukrainia

• Wahubiri 20,981 walisaidiwa moja kwa moja na halmashauri hizo kupata makao salama zaidi

• Wahubiri 11,973 wamekimbilia nchi nyingine na wanasaidiwa na waamini wenzetu