Biblia haizungumzi kihususa kuhusu kuharakisha kifo cha mtu mwenye ugonjwa usioweza kupona. a Hata hivyo, inachosema kuhusu uhai na kifo kinatusaidia kuwa na maoni yenye usawaziko. Ni kosa kusababisha kifo, lakini hakuna takwa la kujaribu kupita kiasi kuendeleza uhai kifo kinapotokea.

 Biblia inamtambulisha Mungu kuwa Muumba wetu, “chanzo cha uhai.” (Zaburi 36:9; Matendo 17:28) Kwa maoni ya Mungu, uhai ni wenye thamani sana. Kwa sababu hiyo, Mungu anashutumu kuua mtu mwingine na kujiua. (Kutoka 20:13; 1 Yohana 3:​15) Isitoshe, Biblia inaonyesha kwamba tunapaswa kuchukua hatua zinazofaa kulinda uhai wetu na wa wengine. (Kumbukumbu la Torati 22:8) Ni wazi kwamba Mungu anataka tuthamini zawadi ya uhai.

Namna gani ikiwa mtu ana ugonjwa usioweza kupona?

 Biblia haiungi mkono kukomesha uhai wa mtu hata ikiwa mtu huyo yuko karibu kufa na ambaye hawezi kupona. Kisa cha Mfalme Sauli wa Israeli kinaunga mkono jambo hilo. Alipokuwa amejeruhiwa vibaya vitani, alimwomba mtumishi wake amsaidie kukomesha uhai wake. (1 Samweli 31:​3, 4) Mtumishi wake alikataa. Hata hivyo, baadaye mwanamume mwingine akadai kwa uwongo kwamba alitimiza jambo ambalo Sauli alikuwa ameomba. Daudi alimhukumu mwanamume huyo kuwa na hatia ya damu. Daudi alionyesha maoni ya Mungu kuhusu jambo hilo.​—2 Samweli 1:​6-​16.

Je, uhai unapaswa kuendelezwa hata hali iweje?

 Ikiwa ni wazi kwamba mtu anakufa, Biblia haionyeshi kwamba jitihada za kupita kiasi zinapaswa kufanywa ili kuendeleza uhai. Badala yake, Biblia inatoa maoni yenye usawaziko. Kifo ni adui yetu mkubwa, ni matokeo ya hali yetu yenye dhambi. (Waroma 5:​12; 1 Wakorintho 15:26) Ingawa hakuna anayepaswa kutamani kufa, kifo hakipaswi kuogopwa kwa sababu Mungu anaahidi kwamba atawafufua wale wanaokufa. (Yohana 6:​39, 40) Mtu anayeheshimu uhai atatafuta matibabu bora zaidi yanayoweza kupatikana. Lakini kufanya hivyo hakumaanishi kwamba mtu achague mbinu za matibabu za kuendeleza uhai wa mtu ambaye ni kana kwamba tayari amekufa.

Je, kujiua ni dhambi isiyoweza kusamehewa?

 Hapana, Biblia haiorodheshi kujiua kati ya dhambi zisizoweza kusamehewa. Hata ingawa kujiua ni dhambi nzito sana, b Mungu anaelewa kabisa hali ambazo zinaweza kumfanya mtu atake kujiua kama vile magonjwa ya akili, mkazo unaopita kiasi, au hata hali zinazotokezwa na chembe za urithi. (Zaburi 103:13, 14) Kupitia Biblia, Mungu anawafariji wale walio na taabu. Mbali na hilo, Biblia inasema kwamba kutakuwa na “ufufuo wa waadilifu na wasio waadilifu pia.” (Matendo 24:15) Hilo linatuonyesha kwamba kuna tumaini la ufufuo kwa watu ambao wamefanya makosa mazito, kama vile kujiua.