Leo kuliko wakati mwigine wowote katika historia, teknolojia inatuwezesha kuwasiliana na watu wengi zaidi na kwa urahisi zaidi. Hata hivyo, huenda uhusiano huo ukawa wa kijuujuu tu. Kijana mmoja anasema hivi: “Ninahisi kwamba uhusiano wangu na marafiki wangu si wa kudumu. Lakini bado baba yangu ana urafiki wa karibu na watu aliofahamiana nao zamani!”

Kwa nini ni vigumu siku hizi kufurahia urafiki wenye kuridhisha na unaodumu?

Huenda kwa kadiri fulani tatizo ni teknolojia. Kutuma ujumbe mfupi, kutumia mitandao ya kijamii, na vyombo vingine vya mawasiliano kumefanya ionekane kwamba watu wanaweza kudumisha urafiki bila kukutana ana kwa ana. Badala ya mazungumzo ya kina, sasa njia ya mawasiliano imekuwa ni kutuma mfululizo wa jumbe fupi. Kitabu Artificial Maturity kinasema hivi: “Mawasiliano ya ana kwa ana kati ya watu yanapungua. Wanafunzi hutumia muda mwingi zaidi [wakiwasiliana kwa kutumia kompyuta] na muda mchache zaidi pamoja.”

Katika visa fulani, teknolojia inaweza kufanya uhisi kwamba urafiki kati yako na mtu fulani ni wa karibu zaidi kuliko ulivyo kikweli. Brian * mwenye na umri wa miaka 22 anasema hivi: “Hivi karibuni, niligundua kwamba mimi ndiye niliyekuwa nikitia jitihada kubwa ili kuwajulia hali marafiki wangu. Hivyo niliacha kutuma jumbe hizo ili nione ni wangapi kati yao wangechukua hatua ya kwanza kuwasiliana nami. Kwa kweli, ni wachache tu waliofanya hivyo. Inaonekana baadhi yao hawakuwa marafiki wa karibu kama nilivyofikiri.”

Je, kuwasiliana na marafiki wako kupitia ujumbe mfupi na mitandao ya kijamii hakuwezi kukusaidia kuimarisha urafiki wenu? Kunaweza, hasa ikiwa unawasiliana nao ana kwa ana pia. Hata hivyo, mitandao ya kijamii ni kama tu daraja linalokuunganisha nao lakini halikufanyi uwe karibu nao.

Tambua rafiki wa kweli ni nani. Biblia inasema kwamba rafiki ni yule “anayeshikamana na mtu kwa ukaribu zaidi kuliko ndugu.” (Methali 18:24) Je, ungependa kupata rafiki wa aina hiyo? Je, wewe ni rafiki wa aina hiyo? Ili upate majibu ya maswali hayo, andika sifa tatu ambazo ungependa rafiki yako awe nazo. Kisha andika sifa tatu ambazo wewe unazo zitakazoboresha urafiki huo. Jiulize: ‘Kati ya wale ninaowasiliana nao mtandaoni, ni wangapi walio na sifa ambazo ningependa rafiki yangu awe nazo? Wao wangesema nina sifa zipi zinazoboresha urafiki wetu?’—Kanuni ya Biblia: Wafilipi 2:4.

Weka viwango. Kwenye mtandao, watu huchagua marafiki wao kwa kutegemea mapendezi yao. Hata hivyo, kuwa na viwango vinavyofanana ni jambo muhimu zaidi kuliko kuwa na mapendezi sawa. Leanne mwenye umri wa miaka 21 anasema hivi: “Ingawa sina marafiki wengi, wale nilio nao wananichochea kuboresha utu wangu.”—Kanuni ya Biblia: Methali 13:20.

Kutana na watu ana kwa ana. Hakuna mawasiliano bora zaidi kuliko ya ana kwa ana ambapo unaweza kuona ishara za mwili na za uso, na kutambua hisia katika sauti.—Kanuni ya Biblia: 1 Wathesalonike 2:17.

Andika barua. Ingawa huenda kuandika barua kukaonekana kuwa jambo lililopitwa na wakati, kufanya hivyo kunamjulisha yule unayemwandikia kwamba unamjali kiasi cha kuketi na kumkazia fikira. Katika ulimwengu wa leo wenye mambo mengi, si jambo la kawaida kwa watu kufanya hivyo. Kwa mfano, katika kitabu Alone Together, Sherry Turkle aliandika kuhusu kijana aliyesema kwamba tangu alipozaliwa hakumbuki kupokea barua iliyoandikwa hasa kwa ajili yake. Akizungumza kuhusu kipindi ambacho watu walikuwa na kawaida ya kuandika barua, kijana huyo anasema hivi: “Ingawa sikuwa hai wakati huo ninatamani kama ningekuwepo.” Mbona usitumie ‘teknolojia hiyo ya kale’ ili kujipatia marafiki?

Jambo kuu: Urafiki wa kweli si kujuliana hali tu. Lazima wewe na rafiki yako mwonyeshane upendo, huruma, subira, na msameheane. Sifa hizo zinaboresha urafiki wenu. Lakini si rahisi kuonyesha sifa hizo kama mnawasiliana kupitia mtandao tu.