Kuboresha Afya
Biblia si kitabu cha tiba. Hata hivyo, ushauri wake unaweza kutusaidia kutunza afya yetu. Fikiria baadhi ya kanuni za Biblia zinazoweza kukusaidia kuboresha afya yako.
TUNZA MWILI WAKO
KANUNI YA BIBLIA: “Hakuna mtu anayeuchukia mwili wake, bali huulisha na kuutunza.” —Waefeso 5:29.
INAMAANISHA NINI: Kanuni hii ya Biblia inatuhimiza tufanye yote tunayoweza ili kutunza afya yetu. Uchunguzi mmoja unaonyesha kwamba matatizo mengi ya afya husababishwa na mtindo wetu wa maisha. Hivyo, tukiwa na mtindo mzuri wa maisha tunaweza kuwa na afya nzuri.
MAMBO UNAYOWEZA KUFANYA:
-
Chakula. Tunza afya yako kwa kula chakula chenye lishe na kunywa maji ya kutosha.
-
Fanya Mazoezi. Kufanya mazoezi kunaweza kuboresha afya yako hata iwe una umri gani. Pia, wale walio na ulemavu au ugonjwa wa kudumu wanaweza kufaidika kwa kufanya mazoezi. Ingawa watu wa familia, marafiki, na madaktari wanaweza kukupa ushauri na kukutia moyo uwe na ratiba ya kufanya mazoezi, wewe ndiye uliye na wajibu wa kuifuata!
-
Lala vya Kutosha. Kutolala vya kutosha kwa siku nyingi kunaweza kusababisha matatizo makubwa ya afya. Watu wengi hawalali vya kutosha kwa sababu wanaamua kufanya mambo mengine badala ya kulala. Lakini kulala vya kutosha kutafanya uwe na afya nzuri.
EPUKA MAZOEA YENYE KUDHURU
KANUNI YA BIBLIA: “Acheni tujisafishe kila unajisi wa mwili na roho.”—2 Wakorintho 7:1.
INAMAANISHA NINI: Tutakuwa na afya nzuri tukiepuka kuchafua miili yetu kwa vitu vyenye kudhuru kama vile sigara, ambayo inajulikana kuwa kisababishi kikuu cha magonjwa na vifo.
MAMBO UNAYOWEZA KUFANYA: Panga tarehe hususa ya kuacha kuvuta sigara, na uweke alama kwenye kalenda yako. Siku chache kabla ya tarehe hiyo, tupa sigara zote, vifaa vya kuwekea majivu ya sigara, viberiti, na vitu vyovyote vinavyohusiana na zoea hilo lenye kudhuru. Epuka maeneo ambayo watu wanaojihusisha na mazoea kama hayo wanapatikana. Waeleze marafiki wanaokuunga mkono kuhusu uamuzi wako.
KANUNI NYINGINE ZA BIBLIA
Unaweza kupata nakala ya Biblia kwa kuwasiliana na Shahidi wa Yehova katika eneo lenu
ZINGATIA USALAMA.
“Ukijenga nyumba mpya, ni lazima pia ujenge ukuta kuzunguka ukingo wa paa lako, ili mtu asianguke kutoka kwenye paa nawe uiletee familia yako hatia ya damu.”—KUMBUKUMBU LA TORATI 22:8.
DHIBITI HASIRA.
“Mtu asiyekasirika upesi ana utambuzi mwingi, lakini asiye na subira hudhihirisha upumbavu.”—METHALI 14:29.
EPUKA KULA KUPITA KIASI.
“Usiwe miongoni mwa . . . wale wanaokula . . . kwa pupa.”—METHALI 23:20.
Huenda Ukapenda Pia
AMKENI!
Njia za Kuboresha Afya Yako
Mambo matano unayoweza kufanya ili kuboresha afya ili kuwa na afya bora.
AMKENI!
Njia ya Maisha Inayoleta Furaha—Afya Nzuri na Ustahimilivu
Je, kuzorota kwa afya kunafanya mtu asiweze kabisa kuwa na furaha?
