Kiburi kinaweza kusababisha ubaguzi. Mtu mwenye kiburi hujiona kuwa bora na kuwaona watu wengine kuwa duni. Mtu yeyote anaweza kunaswa na mtego huo. Kitabu Encyclopædia Britannica kinasema: “Watu wa jamii na tamaduni mbalimbali hufikiri kwamba njia yao ya maisha, chakula chao, mavazi, mazoea, imani, viwango vyao na mambo mengine, ni bora kuliko vya jamii nyingine.” Tunaweza kuepukaje njia hiyo ya kufikiri ambayo si sahihi?

“Kwa unyenyekevu mwaone wengine kuwa bora kuliko ninyi.”—WAFILIPI 2:3.

Kanuni hiyo inamaanisha nini? Ili tuepuke kiburi, tunahitaji kusitawisha unyenyekevu. Unyenyekevu utatusaidia kutambua kwamba wengine ni bora kuliko sisi katika mambo fulani maishani. Jamii moja haiwezi kuwa na sifa zote nzuri na uwezo wa kufanya kila kitu.

Mfikirie mwanamume anayeitwa Stefan. Alilelewa katika nchi ya Kikomunisti, lakini alishinda hisia za ubaguzi dhidi ya watu wanaotoka katika nchi ambazo si za Kikomunisti.  Anasema hivi: “Ili uweze kuushinda ubaguzi, ni muhimu uwaone wengine kuwa bora kuliko wewe. Sijui kila kitu. Ninaweza kujifunza jambo fulani kutoka kwa kila mtu.”

Jitahidi kuwa na maoni yenye usawaziko kujihusu na ukubali kwamba wewe pia hukosea. Isitoshe, wengine wanaweza kufanya mambo fulani kwa njia bora kuliko wewe. Usifikiri watu wote kutoka jamii fulani wana udhaifu uleule.

Badala ya kuwa na maoni yasiyofaa kuhusu mtu wa jamii fulani, jiulize hivi:

• ‘Je, sifa za mtu huyo ambazo ninachukia ni mbaya au zinaonekana kuwa mbaya kwa sababu yeye ni tofauti na mimi?’

• ‘Je, mtu huyo anaweza kuona udhaifu wangu pia?’

• ‘Ni mambo gani anayofanya vizuri zaidi kuliko mimi?’

Ukifaulu kujibu maswali hayo kwa unyoofu, unaweza kuushinda ubaguzi, na pia unaweza kuona sifa nzuri unazopenda kutoka kwake.