Umewahi kusikia watu wakisema hivyo? Hata hivyo, je, ulijua kwamba unaweza kuichunguza Biblia kwa njia ambayo itajifafanua yenyewe? Siri ni: Ikiwa mistari inayozunguka haifafanui maana ya mstari fulani waziwazi, linganisha mstari huo na mistari mingine katika Biblia ambayo inazungumzia jambo hilohilo. Kwa njia hiyo tunaruhusu Biblia, na si maoni yetu wenyewe, iongoze kufikiri kwetu.

Kwa mfano, chunguza kile ambacho Biblia inafundisha kuhusu hali ya wafu. Ifuatayo ni mistari sita kutoka katika sehemu mbalimbali za Biblia. Ona jinsi mistari hiyo inavyopatana.

• “Sio wafu wamsifuo BWANA, wala wo wote washukao kwenye kimya.”​—Zaburi 115:17. *

• “Msiwatumainie wakuu, wala binadamu ambaye hakuna wokovu kwake. Pumzi yake hutoka, huurudia udongo wake, siku hiyo mawazo yake yapotea.”​—Zaburi 146:3, 4.

• “Walio hai wanajua ya kwamba watakufa; lakini wafu hawajui neno lo lote.”​—Mhubiri 9:5.

• “Kuzimu hakuwezi kukusifu; mauti haiwezi kukuadhimisha . . . Aliye hai, naam, aliye hai, ndiye atakayekusifu, kama mimi leo.”​—Isaya 38:18, 19.

• “Roho ile itendayo dhambi itakufa.”​—Ezekieli 18:4.

• Yesu Kristo alisema hivi kuhusu Lazaro rafiki yake ambaye alikuwa amekufa: “Rafiki yetu, Lazaro, amelala; lakini ninakwenda nipate kumwamsha. Basi wale wanafunzi wakamwambia, Bwana, ikiwa amelala, atapona. . . . Basi hapo Yesu akawaambia waziwazi, Lazaro amekufa.”​—Yohana 11:11-14.

Je, unaona mistari hiyo inazungumzia nini kwa upatano? Tofauti na yale ambayo watu wengi wanaamini, Biblia inafundisha kwamba wafu wamekufa kikweli. Hawaishi mbinguni au mahali pengine popote bali ni kana kwamba wamelala usingizi mzito, hawajui lolote. Kwa hiyo, hawawezi kumsifu Mungu au hata kufikiri. *

Jambo kuu ni hili: Tunapoichunguza Biblia kulingana na kichwa fulani, mafundisho yake ya msingi yanakuwa wazi. Bila shaka, kuichunguza kwa njia hiyo ambayo Mashahidi wa Yehova hutumia, huhitaji jitihada. (Methali 2:1-5) Kwa kweli ili kufanikiwa katika mambo muhimu, jitihada inahitajika.