INASHANGAZA kwamba hata wakati ambapo watu wanakabili hatari ya kupoteza kazi, nyumba, na hata malipo yao ya uzeeni, wengi wao bado hutamani kununua kitu chochote wanachoweza kununua.

Watu kama hao huwa windo rahisi kwa watangazaji wa biashara, ambao mbinu zao za utangazaji hutuambia kwamba ni lazima tuwe na nyumba kubwa zaidi, gari bora zaidi, na mavazi ya kisasa ya bei ghali. Na ikiwa huna pesa, usijali, unaweza kuchukua mkopo na kununua vitu hivyo! Watu wengi hutaka tu kuonekana kuwa matajiri hata kama wana madeni chungu zima.

Hata hivyo, punde si punde, mtu anaanza kuona ukweli wa mambo. Kitabu kuhusu kujihusudu (The Narcissism Epidemic) kinasema hivi: “Kununua vitu vya bei ghali kwa mkopo ili kujihisi na kuonekana kuwa tajiri ni kama tu kutumia dawa za kulevya ili ujihisi vizuri. Mwanzoni utajifurahisha kwa bei nafuu, lakini furaha hiyo haitadumu. Hatimaye unaachwa bila pesa na ukiwa umeshuka moyo.”

Biblia inaonyesha upumbavu wa “mtu kujionyesha mali yake maishani.” (1 Yohana 2:16) Ukweli wa mambo ni kwamba tamaa ya kuwa na mali hutukengeusha kutoka kwa mambo yaliyo muhimu zaidi maishani, yaani, mambo ambayo hayawezi kununuliwa. Fikiria mifano mitatu.

Brianne, * kijana anayeishi Marekani anasema kwamba baba yake hukazia fikira kupita kiasi kazi yake na pesa anazopata. Anasema hivi: “Tayari tuna vitu vingi kuliko tunavyohitaji, lakini baba hapatikani nyumbani kwa kuwa kila mara yeye huwa safarini. Najua ni kwa sababu ya kazi yake, lakini ana wajibu pia kwa familia yake!”

Jambo la kufikiria: Huenda baba ya Brianne akawa na majuto gani baadaye? Uhusiano wake pamoja na binti yake unaathiriwaje kwa sababu ya kukazia fikira mali kupita kiasi? Ni kitu gani cha muhimu zaidi ambacho familia yake inahitaji kutoka kwake kuliko pesa?

Kanuni za Biblia unazopaswa kufikiria:

• ‘Kupenda fedha ndiyo shina moja la maovu ya kila namna. Baadhi ya watu wakitamani fedha, wamejichoma wenyewe kwa maumivu mengi.’—1 Timotheo 6:10, Neno—Biblia Takatifu.

• “Afadhali mlo wa jioni wa mchicha na upendo, kuliko karamu ya nyama nono pamoja na chuki.”—Methali 15:17, Biblia Habari Njema.

Jambo kuu: Pesa haziwezi kununua familia yenye umoja. Utafaulu tu ikiwa utatumia wakati pamoja na familia yako na kuwapenda na kuwatunza.—Wakolosai 3:18-21.

Sarah mwenye umri wa miaka 17 anasema hivi: “Kila mara mama yangu huniambia niolewe na mtu mwenye pesa nyingi na nijifunze ufundi fulani ili nipate kazi nzuri ya kunitegemeza iwapo mume wangu atapoteza kazi. Mama yangu hufikiria tu jinsi atakavyopata pesa.”

Jambo la kufikiria: Unapofikiria wakati ujao, wewe huwa na mahangaiko gani yanayofaa? Mahangaiko hayo yanawezaje kufanya uwe na wasiwasi kupita kiasi? Mama ya Sarah anapaswa kufanya nini ili awe na maoni yaliyosawazika zaidi kuhusu usalama wa kifedha?

Kanuni za Biblia unazopaswa kufikiria:

• “Acheni kujiwekea hazina duniani, ambako nondo na kutu hula, na ambako wezi huvunja na kuiba.”—Mathayo 6:19.

• “Hamjui uzima wenu utakuwa namna gani kesho.”—Yakobo 4:14.

Jambo kuu: Kuweka pesa akiba hakutakuletea wakati ujao ulio salama. Pesa zinaweza kuibwa na haziwezi kuponya magonjwa au kuzuia kifo. (Mhubiri 7:12) Biblia inafundisha kwamba usalama wa kweli unatokana na kumjua Mungu na kusudi lake.—Yohana 17:3.

“Wazazi wangu hawakuwa matajiri,” anasema Tanya, mwenye umri wa miaka 24. “Mimi na pacha wangu tulifurahia maisha yetu ya utotoni, hata ingawa nyakati nyingine tulipata tu mahitaji ya lazima.”

Jambo la kufikiria: Kwa nini huenda ikawa vigumu kuridhika na mahitaji ya lazima? Wewe unawekea familia yako mfano gani kuhusu pesa?

Kanuni za Biblia unazopaswa kufikiria:

• “Tukiwa na chakula na kitu cha kujifunika, tutaridhika na vitu hivyo.”—1 Timotheo 6:8.

• “Wenye furaha ni wale wanaotambua uhitaji wao wa kiroho.”—Mathayo 5:3.

Jambo kuu: Kuna mambo muhimu zaidi maishani kuliko pesa na vitu ambavyo pesa zinaweza kununua. Biblia inaonyesha ukweli wa mambo inaposema: “Hata wakati mtu ana vitu vingi uzima wake hautokani na vitu alivyo navyo.” (Luka 12:15) Kwa kweli, uradhi wa kweli maishani unatokana na kupata majibu ya maswali haya muhimu:

• Maisha yetu yana kusudi gani?

• Tutarajie nini wakati ujao?

• Ninaweza kutoshelezaje mahitaji yangu ya kiroho?

Mashahidi wa Yehova ambao ndio wachapishaji wa gazeti hili watafurahi kukusaidia kupata majibu ya maswali hayo. Unaweza kuwasiliana nao au tembelea Tovuti yetu kwenye jw.org/sw.