YOMARA na ndugu zake—Marcelo na Hiver—wanaishi katika kijiji kidogo huko Guatemala. Yomara alianza kujifunza Biblia na Mashahidi, na hatimaye ndugu zake walijiunga pia kwenye funzo hilo. Lakini kulikuwa na tatizo. Wote watatu walikuwa vipofu na hawakuweza kusoma maandishi ya vipofu. Hivyo, mwalimu wao wa Biblia angewasomea habari waliyokuwa wanajifunza na mistari ya Biblia pia.

Pia, ilikuwa changamoto kwao kuhudhuria mikutano. Wakiwa peke yao, hawangeweza kufanya safari ya dakika 40 ili kufika kwenye Jumba la Ufalme lililo karibu. Lakini akina ndugu kutanikoni walifanya mipango ili kuwasaidia wafike kwenye mikutano yote. Na wote watatu walipoanza kutoa migawo ya wanafunzi katika mkutano wa katikati ya juma, akina ndugu waliwasaidia kukariri migawo yao.

Mei 2019, mikutano ya kutaniko ilianza kufanywa katika kijiji chao. Wakati huo, wenzi wa ndoa waliokuwa mapainia wa kawaida walikuwa wamehamia katika kijiji hicho. Waliweka lengo la kuwafundisha wote watatu kusoma na kuandika maandishi ya vipofu, ingawa wenzi hao wenyewe hawakujua jinsi ya kusoma maandishi hayo. Walienda kwenye maktaba ili wajifunze kuhusu mfumo wa maandishi ya vipofu na njia zinazotumiwa kuwafundisha wengine maandishi hayo.

Baada ya miezi michache, wote watatu waliweza kusoma maandishi ya vipofu kwa urahisi, na hilo liliwasaidia kufanya maendeleo zaidi ya kiroho. a Sasa Yomara, Marcelo, na Hiver wanatumikia wakiwa mapainia wa kawaida. Marcelo ni mtumishi wa huduma. Na wote wanajishughulisha sana katika utendaji wa kiroho juma lote. Bidii yao inawachochea wengine.

Ndugu hao wawili na dada yao, wanathamini sana utegemezo wenye upendo wanaoonyeshwa na kutaniko. Yomara anasema hivi: “Tangu tulipokutana kwa mara ya kwanza na Mashahidi, wametuonyesha upendo wa kweli wa Kikristo.” Marcelo anaongezea hivi: “Tuna marafiki wazuri sana katika kutaniko letu, na sisi ni sehemu ya undugu wa kimataifa unaounganishwa kwa upendo.” Yomara na ndugu zake wanasubiri kwa hamu siku ambayo wataona dunia ikibadilishwa na kuwa paradiso.​—Zab. 37:10, 11; Isa. 35:5.