Yeyote anayeathiriwa na marashi anakabili hali ngumu. Inaelekea kwamba katika shughuli zao za kila siku hawawezi kuepuka kuchangamana na watu wanaotumia marashi. Hata hivyo, baadhi yao wameuliza ikiwa ndugu na dada wanaweza kuombwa wasitumie marashi wanapokuja kwenye mikutano na makusanyiko ya Kikristo.

Bila shaka, hakuna Mkristo anayeweza kwa makusudi kufanya iwe vigumu kwa mtu mwingine kuhudhuria mikutano ya Kikristo. Sisi sote tunahitaji kitia-moyo tunachopata kwenye mikutano yetu. (Ebr. 10:24, 25) Kwa hiyo, yeyote ambaye anaathiriwa sana na marashi hivi kwamba anakosa kuhudhuria mikutano anaweza kuzungumza na wazee kuhusu jambo hilo. Ingawa hakuna msingi wa Kimaandiko na haingefaa kuweka sheria inayowakataza wahudhuriaji kutumia marashi mikutanoni, wazee wanaweza kuwaeleza washiriki wa kutaniko kwamba wahudhuriaji fulani wanaathiriwa na marashi. Ikitegemea hali, wazee wanaweza kuamua kutumia sehemu ya mahitaji ya kutaniko katika Mkutano wa Utumishi kuzungumzia habari zilizochapishwa kuhusu jambo hilo, au wanaweza kuamua kutoa tangazo kwa busara. * Hata hivyo, wazee hawawezi kutoa matangazo kama hayo kila wakati. Wageni na watu wapya wanaopendezwa ambao hawajui tatizo hilo huhudhuria mikutano yetu, nasi tunataka wahisi wamekaribishwa. Hatupaswi kumfanya mtu yeyote anayetumia marashi kwa kiasi ahisi vibaya.

Mahali ambapo pana tatizo hilo, baraza la wazee linaweza kufanya mipango ili wanaoathiriwa na marashi waketi mahali walipotengewa katika Jumba la Ufalme, ikiwa hali zinaruhusu. Kwa mfano, huenda kuna chumba kidogo cha mikutano kilicho na mfumo wa sauti ambamo wanaweza kuketi na kufaidika na mikutano. Ikiwa tatizo hilo haliwezi kusuluhishwa kwa njia inayofaa na bado wengine wanaathiriwa sana na marashi, kutaniko linaweza kurekodi mikutano na kuwapa wenye tatizo hilo au wanaweza kufanya mpango ili wasikilize mikutano nyumbani kupitia simu, kama tu inavyofanywa kwa wale ambao hawawezi kutoka nyumbani kwa sababu ya ugonjwa.

Katika miaka ya karibuni, Huduma Yetu ya Ufalme imewatia moyo ndugu na dada kuonyesha ufikirio wa pekee kuhusiana na jambo hilo wanapohudhuria makusanyiko ya eneo. Kwa kuwa makusanyiko mengi hufanywa ndani ya majumba, wahudhuriaji wameombwa kutotumia marashi makali wanapohudhuria makusanyiko. Wahudhuriaji wameombwa kuzingatia sana jambo hilo hasa wanapohudhuria makusanyiko ya eneo, kwa kuwa kwa kawaida haiwezekani kutenga sehemu kwa ajili ya wanaoathiriwa na marashi. Hata hivyo, mwongozo huu haukusudiwi kamwe kuwa sheria kwenye mikutano ya kutaniko, na haupaswi kueleweka hivyo.

Maadamu tunaishi katika mfumo huu wa mambo, sote tunaathiriwa na matokeo ya hali ya kutokamilika tuliyorithi. Tunathamini sana wengine wanapojitahidi kupunguza mateso yetu. Huenda wengine wakajidhabihu kwa kutotumia marashi ili iwe rahisi kwa ndugu au dada kuhudhuria mikutano ya Kikristo. Hata hivyo, upendo unaweza kutuchochea tuchague kufanya hivyo.

Wasomaji wa Biblia wanamjua Pontio Pilato kwa sababu alihusika katika kesi ya Yesu na kuuawa kwake. (Mt. 27:1, 2, 24-26) Hata hivyo, jina lake linaonekana pia mara kadhaa katika rekodi nyingine za historia za wakati huo. Kulingana na kamusi moja (The Anchor Bible Dictionary), rekodi za historia zisizo za kidini zinazomrejelea Pilato ni “nyingi sana na zina habari nyingi kuliko habari kumhusu gavana mwingine yeyote Mroma wa Yudea.”

Jina la Pilato linapatikana mara nyingi zaidi katika maandishi ya mwanahistoria Myahudi Yosefo, ambaye alitaja matukio matatu hususa yanayohusiana na matatizo ambayo Pilato alikabili alipokuwa gavana wa Yudea. Tukio la nne lilirekodiwa na mwanahistoria Myahudi Philo. Mwandishi Mroma Tasito ambaye alirekodi historia ya maliki wa Roma, alithibitisha kuwa Pontio Pilato aliagiza Yesu auawe wakati wa utawala wa Tiberio.

Mnamo mwaka wa 1961, wachimbuaji wa vitu vya kale waliokuwa wakichimbua jumba la kale la maonyesho la Waroma lililokuwa Kaisaria nchini Israel, walipata jiwe lililotumika linaloonyesha waziwazi jina la Pilato katika Kilatini. Maandishi hayo (katika picha iliyoonyeshwa) si kamili lakini inadhaniwa kwamba zamani yalisomeka hivi: “Pontio Pilato, Liwali wa Yudea, aliliweka wakfu (jengo hili) la Tiberieum kwa miungu inayoheshimika.” Jengo linalorejelewa huenda lilijengwa kwa heshima ya Mtawala Mroma Tiberio.

Makala “Maswali Kutoka kwa Wasomaji” katika gazeti Mnara wa Mlinzi la Julai 15, 2002, ilisema kwamba dada anapaswa kufunika kichwa anapoongoza funzo la Biblia akiwa na mhubiri mwanamume ambaye amebatizwa au hajabatizwa. Baada ya kufikiria zaidi suala hilo inaonekana kwamba mwongozo huo unahitaji kurekebishwa.

Ikiwa mhubiri mwanamume ambaye amebatizwa anaambatana na dada katika funzo la Biblia ambalo tayari lilianzishwa, bila shaka dada angehitaji kufunika kichwa. Kwa njia hiyo anaonyesha kwamba anaheshimu mpango wa Yehova wa ukichwa katika kutaniko la Kikristo kwa sababu anatimiza daraka ambalo kwa kawaida ni la ndugu. (1 Kor. 11:5, 6, 10) Au akipenda, anaweza kumwomba ndugu aongoze funzo hilo ikiwa anastahili na anaweza kufanya hivyo.

Kwa upande mwingine, ikiwa dada anaambatana kwenye funzo la Biblia na mhubiri mwanamume ambaye hajabatizwa na si mume wake, hakuna msingi wa Kimaandiko unaoonyesha kwamba anahitaji kufunika kichwa. Hata hivyo, dhamiri za dada wengine zinaweza kuwaongoza kufunika kichwa hata katika hali kama hizo.