Kupoteza kazi kunaweza kuathiri hali yako ya kiuchumi, familia yako, na pia afya yako ya kihisia na ya kiakili. Fikiria mapendekezo yafuatayo yanayotegemea kanuni zenye hekima za Biblia zinazoweza kukusaidia kukabiliana na hali hiyo.

•   Zungumza na wengine kuhusu hisia zako.

   Biblia inasema nini: “Rafiki wa kweli hupenda nyakati zote.”​—Methali 17:17.

   Baada ya kupoteza kazi, huenda ukahuzunika, ukawa na hasira, au ukachanganyikiwa, au huenda ukahisi kwamba wewe ni bure. Unapowaeleza watu wa familia na marafiki wa karibu hisia zako, wanaweza kukutegemeza kihisia. Pia, wanaweza kukupa msaada unaofaa unaoweza kukusaidia unaposonga mbele.

•   Epuka wasiwasi unaopita kiasi.

   Biblia inasema nini: “Msihangaike kamwe kuhusu kesho, kwa maana kesho itakuwa na mahangaiko yake yenyewe.”​—Mathayo 6:34.

   Biblia inatutia moyo tupange mapema. (Methali 21:5) Hata hivyo, inatushauri pia tuepuke kuwa na wasiwasi unaopita kiasi kuhusu wakati ujao. Mara nyingi tunakuwa na wasiwasi kuhusu mambo ambayo huenda hayatawahi kutokea. Ni afadhali kukazia fikira mambo unayohitaji kufanya leo tu.

   Biblia inatoa ushauri zaidi wenye hekima wa jinsi ya kukabiliana na mkazo ambao huenda ukawa unahisi sasa. Ili ujifunze mengi zaidi, soma makala “Jinsi ya Kukabiliana na Mkazo.”

•   Fanya mabadiliko yanayohitajika kwenye bajeti yako.

   Biblia inasema nini: “Nimejifunza . . . jinsi ya kuwa na wingi na pia jinsi ya kuishi bila kitu.”​—Wafilipi 4:12.

   Badili hali yako ya sasa. Hilo linatia ndani kubadili matumizi yako ili uweze kuishi kupatana na kiasi cha pesa ulicho nacho. Uwe mwangalifu usijiletee madeni yasiyohitajika.​—Methali 22:7.

   Ili upate mapendekezo zaidi ya jinsi ya kubadili hali yako ya sasa ya kiuchumi, ona makala “Jinsi ya Kuishi Ukiwa na Pesa Kidogo.”

•   Tumia wakati wako kwa hekima.

   Biblia inasema nini: “Endeleeni kutembea kwa hekima . . . , mkitumia vizuri kabisa wakati wenu.”​—Wakolosai 4:5.

   Hata ikiwa huna ratiba ya kazi iliyopangwa kabisa, dumisha ratiba nzuri ya jinsi unavyotumia wakati wako. Kufanya hivyo kutakusaidia kuwa na mpangilio maishani na kutakufanya ujiheshimu.

•   Uwe mwenye kubadilikana.

   Biblia inasema nini: “Kila aina ya kazi ngumu ina faida.”​—Methali 14:23.

   Uwe tayari kufanya kazi tofauti na uliyofanya awali. Huenda ukahitaji kufikiria kufanya kazi ambazo ni za hali ya chini au zenye mshahara mdogo kuliko ilivyokuwa awali.

•   Uwe mdumifu.

   Biblia inasema nini: “Panda mbegu zako asubuhi na usipumzishe mkono wako mpaka jioni; kwa maana hujui ni mbegu gani itakayofanikiwa.”​—Mhubiri 11:6.

   Endelea kutafuta kazi. Wajulishe wengine kwamba unatafuta kazi. Zungumza na watu wa ukoo, marafiki, wafanyakazi wa awali, na majirani. Chunguza mashirika ya kuwaajiri watu, matangazo ya kazi, na nafasi za kazi kwenye tovuti za makampuni. Uwe tayari kwenda kwenye mahojiano mengi ya kazi na kuwasilisha maombi mengi ya kazi kabla ya kuajiriwa.