SURA YA 30

Kweli Tuko Tayari Kufunga Ndoa?

Umempata mtu unayetaka kufunga ndoa naye mmekuwa na uhusiano wa kimapenzi kwa muda wa kutosha na unajua kwamba mnapendana. Mnafikiria kufanya arusi. Au sivyo? Unapokaribia kufanya mojawapo ya uamuzi mkubwa sana maishani, unaanza kushangaa ikiwa kwa kweli uko tayari.

Kweli tuko tayari kufunga ndoa?

NI KAWAIDA kuwa na wasiwasi kuhusu ndoa, hata ikiwa mnapendana. Kwa sababu ndoa nyingi hazina furaha na talaka zinaongezeka, inaeleweka ni kwa nini  unataka kuwa mwangalifu sana unapofikiria hatua hiyo inayobadili maisha. Unaweza kujua jinsi gani ikiwa uko tayari? Huu ndio wakati unapaswa kuondolea mbali ndoto zozote ulizokuwa nazo kuhusu ndoa na kuanza kuona mambo kihalisi. Kwa mfano:

NDOTO YA 1 “Upendo ni mambo yote.”

Uhalisi wa mambo: Upendo hautalipa madeni wala kushughulikia matatizo ya pesa. Watafiti wamegundua kwamba pesa ndizo hasa husababisha ugomvi katika ndoa na mwishowe talaka. Kutokuwa na usawaziko kuhusu pesa kunaweza kusababisha madhara ya kiroho na ya kihisia, na kunaweza kuharibu uhusiano wako pamoja na mwenzi wako. (1 Timotheo 6:9, 10) Unajifunza nini? Msingoje mpaka baada ya kufunga ndoa ndipo mzungumzie jinsi mtakavyotumia pesa zenu!

Biblia inasema: “Ni nani kati yenu anayetaka kujenga mnara ambaye haketi kwanza na kuhesabu gharama?”—Luka 14:28.

Pendekezo: Kabla hamjafunga ndoa, zungumzieni mipango yenu ya kifedha. (Methali 13:10) Fikiria maswali kama haya: Mapato yetu yatapangiwa jinsi gani? Tutakuwa na akaunti moja ya benki au kila mmoja atakuwa na akaunti yake? Ni nani aliye na ujuzi zaidi wa kuweka rekodi za matumizi na kuhakikisha kwamba gharama zote zimelipiwa? * Ni kiasi gani cha pesa ambacho mmoja wetu anaweza kutumia bila kuwasiliana na mwenzake? Huu ndio wakati wa kuanza kufanya mambo pamoja!—Mhubiri 4:9, 10.

NDOTO YA 2 “Tutakuwa wenzi wa ndoa wanaofaana kabisa kwa sababu tunapatana kwa kila jambo!”

Uhalisi wa mambo: Ikiwa mnapatana kwa kila jambo, huenda ni kwa sababu mnajaribu sana kuepuka mambo  yanayoweza kusababisha ugomvi. Lakini mkifunga ndoa mtalazimika kuyazungumzia! Ukweli ni kwamba, hakuna wanadamu wawili wasio wakamilifu wanaofaana kabisa, kwa hiyo, kutoelewana kwa kiasi fulani hakuwezi kuepukika. (Waroma 3:23; Yakobo 3:2) Hupaswi kufikiria tu jinsi mnavyopatana bali pia jinsi mambo yanavyokuwa mnapotofautiana. Muungano mzuri ni wa watu wawili wanaoweza kukubali waziwazi tofauti zao na kujaribu kuzitatua kwa hekima na amani.

Biblia inasema: ‘Jua lisitue ukiwa katika hali ya kuchokozeka.’—Waefeso 4:26.

Pendekezo: Fikiria kwa makini jinsi ambavyo umeshughulikia tofauti zako na wazazi na ndugu na dada zako. Tengeneza chati kama ile iliyo kwenye ukurasa wa 93 wa kitabu hiki au kwenye ukurasa wa 221 wa Buku la 2. Fikiria mambo fulani hasa yaliyotokeza kutoelewana, jinsi ulivyotenda, na njia ambayo unafikiri ingalikuwa bora kuyashughulikia. Kwa mfano, ikiwa kwa kawaida hatua ya kwanza unayochukua mnapotofautiana ni kuingia chumbani mwako na kufunga mlango kwa hasira, andika njia iliyo bora ya kushughulikia hali hiyo, njia itakayowasaidia kutatua tatizo badala ya kulizidisha. Ukijifunza kushughulikia kutoelewana kwa njia nzuri sasa, utapata ustadi unaohitajika ili kuwa na ndoa yenye furaha.

NDOTO YA 3 “Nikifunga ndoa tu, tamaa zangu zote za ngono zitatoshelezwa.”

 Uhalisi wa mambo: Kufunga ndoa hakumaanishi ‘ngono kila unapotaka.’ Kumbuka, mwenzi wako ni mwanadamu ambaye ana hisia zinazopaswa kufikiriwa. Kusema kweli, kutakuwa na nyakati ambazo mwenzi wako hatataka kufanya ngono. Ndoa haikupi kibali cha kusisitiza mahitaji yako yatoshelezwe. (1 Wakorintho 10:24) Ukweli ni kwamba, kujizuia ni sifa ya maana katika useja na katika ndoa.—Wagalatia 5:22, 23.

Biblia inasema: “Kila mmoja wenu ajue jinsi ya kukiweza chombo chake mwenyewe katika utakaso na heshima, si katika hamu yenye tamaa ya ngono.”—1 Wathesalonike 4:4, 5.

Pendekezo: Chunguza kwa makini tamaa na mielekeo yako kuhusu ngono, kisha ufikirie jinsi mambo hayo yanavyoweza kuathiri ndoa yako wakati ujao. Kwa mfano, je, wewe ni mtumwa wa mazoea ya kujielekezea fikira la kupiga punyeto? Je, umekuwa na mazoea ya kutazama ponografia? Una jicho lenye kutangatanga, linalotazama kwa kuwatamani watu wa jinsia tofauti? Jiulize, ‘Ikiwa nina shida kuzuia tamaa zangu za ngono kabla ya ndoa, nitaweza kuzizuia jinsi gani baadaye?’ (Mathayo 5:27, 28) Jambo lingine: Watu wa jinsia tofauti hukuona kuwa mtu anayependa kuchezea hisia za wengine? Ikiwa ndivyo, unapanga kuacha zoea hilo jinsi gani baada ya ndoa, wakati ambapo upendo wako utahitaji kuelekezwa kwa mtu mmoja, yaani, mwenzi wako wa ndoa?—Methali 5:15-17.

NDOTO YA 4 “Ndoa itanipa furaha.”

Uhalisi wa mambo: Mseja asiye na furaha kwa kawaida hufanyiza mwenzi wa ndoa asiye na furaha. Kwa nini? Kwa sababu furaha hutegemea zaidi mtazamo wa mtu kuliko hali yake.  (Methali 15:15) Watu wasio na maoni yanayofaa kuelekea maisha yao mara nyingi hukazia fikira kile kinachokosekana katika uhusiano wao badala ya kile walicho nacho. Ni afadhali zaidi kukuza na kuwa na mtazamo mzuri ukiwa ungali mseja. Kisha, utakapofunga ndoa, utakuza sifa bora na kumchochea mwenzi wako kufanya hivyo.

Biblia inasema: “Afadhali kuridhika na ulicho nacho kuliko kuhangaika kwa kutamani kitu kingine.”—Mhubiri 6:9, Biblia Habari Njema.

Pendekezo: Nyakati nyingine mtazamo usiofaa unatokana na kuwa na matarajio yasiyo halisi. Andika kwenye karatasi matarajio mawili au matatu uliyo nayo kuhusu ndoa. Yasome, kisha ujiulize: ‘Je, matarajio yangu yanategemea zaidi ndoto au mambo halisi? Matarajio hayo yamechochewa na vyombo vya habari, labda sinema au vitabu vya kimahaba? Je, matarajio yangu yanazingatia mambo ambayo ndoa itanifanyia  mimi—labda kuniondolea mimi upweke, kutosheleza tamaa yangu ya ngono, kujitengenezea jina miongoni mwa marafiki wangu?’ Ikiwa ndivyo, basi utahitaji kuacha kufikiria kuhusu “mimi” na kuanza kufikiria kuhusu “sisi.” Ili ufanye hivyo, andika matarajio mawili au matatu uliyo nayo kuhusu ndoa yanayokuhusu na kumhusu yule utakayefunga ndoa naye.

Ndoto hizo zilizotajwa hapo juu zinaweza kuathiri sana furaha katika ndoa yenu. Kwa hiyo, jaribu kuondolea mbali mtazamo wa aina hiyo na badala yake uwe na mtazamo unaofaa. Chati iliyo kwenye ukurasa wa 216 na 217 inaweza kukusaidia wewe na yule utakayefunga ndoa naye mnapotazamia kile ambacho huenda kikawa mojawapo ya baraka kubwa maishani, yaani, ndoa yenye furaha!—Kumbukumbu la Torati 24:5; Methali 5:18.

KATIKA SURA INAYOFUATA

Urafiki unapovunjika huenda ukahisi kana kwamba umefiwa. Unaweza kufanya nini ukijikuta katika hali kama hiyo?

[Maelezo ya Chini]

ANDIKO MUHIMU

“Mwanamume atamwacha baba yake na mama yake naye atashikamana na mke wake nao watakuwa mwili mmoja.” —Mwanzo 2:24.

PENDEKEZO

Zungumza na wenzi wa ndoa wenye umri mkubwa, na uwaulize ni shauri gani wanaloweza kuwapa wenzi wa ndoa wapya kuhusu jinsi ya kuwa na ndoa yenye mafanikio.—Methali 27:17.

JE, WAJUA . . . ?

Katika ndoa yenye mafanikio, mume humwona mke wake kuwa rafiki na ndivyo pia mke anavyomwona mume wake, wanawasiliana vizuri, wanajua jinsi ya kutatua tofauti zao, na wanauona uhusiano wao kuwa muungano wenye kudumu.

HATUA ZA KUCHUKUA!

Sifa nitakayofanyia kazi sasa ili niboreshe uhusiano wangu na yule atakayekuwa mwenzi wangu wa ndoa ni ․․․․․

Mambo ambayo ningependa kuuliza mzazi (wazazi) wangu kuhusu habari hii ni ․․․․․

UNA MAONI GANI?

● Katika nchi fulani, ndoa nyingi huishia katika talaka. Unafikiri ni kwa nini?

● Kuna hatari gani kufunga ndoa ili tu kutoroka maisha ya nyumbani yasiyo na furaha?

● Kwa nini itakuwa muhimu kufuata kanuni za Biblia utakapofunga ndoa?

[Blabu katika ukurasa wa 220]

“Kufunga ndoa ni hatua kubwa. Mbali na kuwa na ujuzi kuhusu ndoa ni muhimu kumfahamu vizuri yule utakayefunga ndoa naye.”​—Audra

 [Sanduku/​Picha katika ukurasa wa 216, 217]

Uko Tayari Kufunga Ndoa?

Fikiria maswali yaliyo kwenye kurasa mbili zinazofuata. Unaweza hata kutumia kurasa hizo kama msingi wa mazungumzo kati yako na yule unayetaka kufunga ndoa naye. Hakikisha mnasoma maandiko yaliyoonyeshwa.

Masuala ya Pesa

□ Una mtazamo gani kuelekea pesa?—Waebrania 13:5, 6.

□ Ni katika njia gani ambayo tayari unaonyesha kwamba unaweza kutumia pesa vizuri? —Mathayo 6:19-21.

□ Je, una deni? Ikiwa unalo, ni hatua gani umechukua ili kulipa deni hilo?—Methali 22:7.

□ Arusi yenu itagharimu pesa ngapi? Ikiwa mtapenda kukopa pesa kwa ajili ya arusi, mtakopa kiasi gani? —Luka 14:28.

□ Baada ya kufunga ndoa, je, nyote wawili mtahitaji kufanya kazi? Ikiwa ndiyo, mtashughulikia jinsi gani ratiba zenu zinazotofautiana na mahitaji yenu ya usafiri?—Methali 15:22.

□ Mtaishi wapi? Kodi ya nyumba, chakula, mavazi, na matumizi mengine huenda yakagharimu pesa ngapi, nanyi mtazilipa namna gani?—Methali 24:27.

 Masuala ya Familia

□ Una uhusiano wa aina gani na wazazi na ndugu na dada zako?—Kutoka 20:12; Waroma 12:18.

□ Unapokuwa nyumbani, unashughulikia matatizo jinsi gani?—Wakolosai 3:13.

□ Ikiwa wewe ni mwanamke kijana, ni katika njia gani unaonyesha “roho ya utulivu na ya upole”?—1 Petro 3:4.

□ Mnapanga kuwa na watoto? (Zaburi 127:3) Kama sivyo, ni njia gani ya kupanga uzazi mtakayotumia?

□ Ikiwa wewe ni mwanamume kijana, unapanga jinsi gani kuisaidia familia yako kuwa na uhusiano mzuri na Yehova?—Mathayo 5:3.

Sifa Zako

□ Ni kwa njia gani unaonyesha kwamba wewe ni mwenye bidii? —Methali 6:9-11; 31:17, 19, 21, 22, 27.

□ Ni kwa njia gani unaonyesha roho ya kujidhabihu? —Wafilipi 2:4.

□ Ikiwa wewe ni mwanamume kijana, unaonyesha jinsi gani kwamba unaweza kutumia mamlaka kama Kristo? —Waefeso 5:25, 28, 29.

□ Ikiwa wewe ni mwanamke kijana, ni nini kinachoonyesha kwamba unaweza kujitiisha chini ya mamlaka? —Waefeso 5:22-24.

[Picha katika ukurasa wa 219]

Usikimbilie ndoa kabla ya kuelewa mambo yanayohusika