Daiane ni Shahidi wa Yehova na mtumishi wa wakati wote nchini Brazili. Siku moja, alipokuwa akifanya mahubiri ya simu alizungumza na wenzi wa ndoa ambao ni vijana walioonyesha upendezi. Walimweleza Daiane kwamba wamepanga kuhamia kijiji cha mbali ambako hakuna umeme wala Intaneti. Kwa kuongezea, hakuna Mashahidi wa Yehova huko. Ili kuendeleza mazungumzo yao ya Biblia, wenzi hao walimpa Daiane namba ya simu ya umma iliyo katika kijiji hicho, na wote watatu wakakubaliana siku na muda ambao wangewasiliana kupitia simu hiyo.

 Muda waliokubaliana ulipofika, Daiane alipiga simu na wenzi hao wakapokea! Katika majuma mawili yaliyofuata, waliwasiliana mara tatu na kuzungumzia Biblia.

 Baada ya hapo, wenzi hao hawakwenda kwenye kituo hicho Daiane alipowapigia. Lakini Daiane hakukata tamaa, aliendelea kupiga simu mara tatu kila juma na kuwa na mazungumzo ya Biblia na mtu yeyote ambaye angepokea simu. Matokeo ni kwamba Daiane aliweza kuanzisha mafunzo kadhaa ya Biblia.

 Siku moja, Daiane na mume wake walipokuwa wakiongoza funzo la kijana mmoja wa kiume katika kijiji hicho, kiongozi fulani wa kanisa alikuwa akisikiliza mazungumzo hayo. Alisimama kando ya mwanafunzi huyo wa Biblia ili asikie vizuri. Kisha kiongozi huyo wa kanisa akaomba kuzungumza na Daiane na mume wake kwa sababu alifurahishwa sana na mazungumzo yao hivyo alitamani kuongozwa funzo la Biblia pia!

 Baada ya muda, Daiane na mume wake walikuwa wakiongoza mafunzo sita ya Biblia kupitia simu hiyo, kutia ndani funzo la kiongozi huyo wa kanisa. Baadhi ya wanafunzi hao wa Biblia wameunganishwa kwenye mikutano kupitia simu hiyo ya umma. Na mmoja kati yao hata alitengeneza benchi ili wawe na mahali pa kuketi wakati wanapojifunza Biblia.

 Daiane na mume wake wamefurahi kupata fursa ya kutangaza ujumbe wa Ufalme katika kijiji hicho cha mbali. Daiane anasema, “Yehova anaweza kuhakikisha kwamba habari njema inamfikia mtu yeyote, hata ikiwa anaishi katika eneo la mbali.”