Kila siku, wafungwa katika vituo mbalimbali vya kurekebisha tabia nchini Marekani hutuma barua nyingi sana kwenye ofisi za Mashahidi wa Yehova, wakiomba msaada wa kiroho.

Sisi huitikia maombi kama hayo, tunapanga wahudumu kutoka katika makutaniko ya karibu wawatembelee na kujifunza Biblia pamoja nao katika magereza, hospitali za majimbo, mashirika ya kurekebisha tabia ya vijana na wale walio na matatizo ya kutumia dawa za kulevya.

Katika magereza fulani, wahudumu wetu huongoza mikutano ya kutaniko kwa ukawaida. Kwa mfano, katika eneo moja, wafungwa 32 walihudhuria hotuba iliyotolewa katika magereza mawili tofauti.

Mipango hiyo imekuwa na matokeo yenye kupendeza. Mwanamume fulani aliyefungwa katika jimbo la Indiana, aliyekuwa amefungwa kifungo cha maisha kwa sababu ya kuua kimakusudi, alifanya mabadiliko makubwa katika utu wake na akabatizwa kuwa Shahidi wa Yehova.

Shahidi aliyejifunza Biblia na mfungwa mwingine aliyekuwa katika gereza kubwa la kurekebisha watu tabia la California, alisema hivi kumhusu: “Nimejionea utu aliokuwa nao kabla ya kujifunza Biblia. Mabadiliko ambayo amefanya ili astahili kubatizwa ni makubwa sana.”

Wafungwa wengi wameanza kuishi kwa njia inayopatana na Biblia, ingawa wanajua kwamba wakifanya hivyo huenda uhai wao ukawa hatarini. Kwa mfano, baadhi ya wale ambao wamevunja uhusiano wao na magenge wamehitaji kuwekwa katika eneo lililotengwa au kuhamishwa hadi kwenye gereza tofauti ili kuhakikisha wako salama.

Wasimamizi wa magereza wamevutiwa sana kuona jinsi Biblia imebadili maisha ya watu. Wengine wametoa vyeti vya kushukuru pamoja na zawadi rasmi kwa ajili ya kujitolea kwa Mashahidi na kazi nzuri waliyofanya katika vituo hivyo mbalimbali vya kurekebisha tabia.