Kampuni fulani inayoheshimika ya ujenzi nchini Uingereza imewapongeza Mashahidi wa Yehova kwa kuwazoeza wanawake kutumia mashine zenye nguvu katika eneo la ujenzi wa ofisi yao mpya ya tawi karibu na Chelmsford, Essex. Shirika la Considerate Constructors Scheme * (CCS) liliwapa Mashahidi alama ya juu zaidi​—10 kati ya 10​—kwa sababu ya mbinu yao ya kuwazoeza wanawake katika ujenzi na wakaifafanua kuwa “kielelezo.” Kwa nini walipewa alama ya juu sana hivyo?

Nchini Uingereza, asilimia 13 tu ya wanawake ndio wanaofanya kazi za ujenzi. Kulingana na uchunguzi moja uliofanywa na shirika la Uingereza, wanawake wachache sana hufikiria kutafuta kazi zinazohusiana na ujenzi. Tofauti na hilo, asilimia 40 hivi ya wafanyakazi katika ujenzi kule Chelmsford ni wanawake. Kati ya wale wanaoendesha mashine zenye nguvu asilimia zaidi ya 60 ni wanawake.

Ni nini kinachowasaidia wanawake hao Mashahidi kufaulu? Kuwazoeza na kuwategemeza kunatimiza fungu muhimu katika kuwasaidia kufaulu. Mambo hayo mawili ni sehemu ya viwango vinavyotazamiwa na shirika la CCS. Viwango hivyo vinawatia moyo wajenzi waonyeshe kwamba wanawathamini wafanyakazi wao kwa “kuandaa eneo la kazi ambapo wote wanaheshimiwa, wanatendewa kwa haki, wanatiwa moyo na kutegemezwa,” kutia ndani “kuwachochea watu kuzoezana kazi.”

Jade, mwanamke mmoja aliyezoezwa katika eneo la ujenzi kuendesha trekta za kuchimba ardhi na malori ya kumimina mchanga, anasema hivi: “Inapendeza sana. Sikuwahi kufikiri kwamba ningefaulu. Nyakati nyingine kazi ina changamoto, lakini kila wakati ninazoezwa na ninajifunza mambo mapya.” Kama Jade, Lucy pia anaendesha mashine zenye nguvu. Anakumbuka hivi: “Mara ya kwanza nilipokuja kwenye ujenzi, sikuwa na ustadi kwa hiyo sikufikiri ninaweza kusaidia sana. Lakini tangu siku ya kwanza nilipofika, nilizoezwa. Kuanzia wakati huo, nimefanya kazi katika vikosi vitano tofauti, kwa hiyo nimezoezwa sana.”

Mbali tu na kuendesha mashine, wanawake walio katika kikosi cha ujenzi wamepata ustadi mwingine mwingi. Eric ambaye ni msimamizi wa kikosi kimoja anasema hivi: “Mara nyingi wanawake hutunza vifaa kwa njia nzuri zaidi kuliko wanaume, nao wana uwezo mkubwa wa kutambua ikiwa mashine yao ina tatizo na kuliripoti.”

Carl, anayesimamia vikosi kadhaa vinavyotumia mashine zenye nguvu, anasema hivi: “Nimependezwa sana na jinsi wanawake wamejifunza kuendesha mashine zetu. Katika visa fulani, mimi hulazimika kuwachagua wao waziendeshe badala ya wanaume ambao wana uzoefu wa miaka mingi!”

Wasimamizi wa vikosi wanapowaonyesha wafanyakazi wenzao kwamba wanawaunga mkono, wanawasaidia kuwa na uhakika zaidi. Kisa cha Therese kinatuonyesha jambo hilo. Kwa kuwa yeye ni mtumiaji wa mashine mwenye uzoefu, anajua kwamba unapotumia mashine zenye nguvu ni muhimu sana kushughulikia majukumu yake vizuri na kufanya maamuzi yanayowalinda wengine. Therese anaeleza hivi: “Ninapoungwa mkono na msimamizi wa kikosi, ninafaulu kufanya mengi zaidi kuliko nilivyotazamia kwa sababu ninahisi ninaaminika. Kazi yote ngumu ninayofanya inafurahisha ninapojua kwamba watu wanathamini nilichofanya na wana maoni yanayofaa kuhusu kazi yangu!”

Abigail, ambaye pia huendesha trekta za kuchimba ardhi na malori ya kumimina mchanga, anathamini utegemezo na ushirikiano anaopata: “Wanaume katika eneo hili la ujenzi hawanidharau. Wako tayari kunisaidia lakini hawanipokonyi kazi yangu. Wananiacha niendelee kuifanya.”

Mbali na kuendesha mashine zenye nguvu za aina mbalimbali, wanawake katika eneo la ujenzi la Chelmsford wamezoezwa kufanya kazi kama vile ukaguzi wa ardhi, usimamizi mzuri wa ardhi na mali, kurekebisha mashine, na kuunganisha ngazi za hali ya juu. Robert, ambaye amefanya kazi pamoja na wanawake katika kazi mbalimbali, anasema kwamba wako “makini, wana hamu ya kufanya kazi, na wanazingatia hata mambo madogo.” Tom, anayefanya kazi ya ukaguzi wa ardhi anasema hivi: “Wanawake katika kikosi changu wanafanya mambo kwa usahihi na wanawajibika. Hawataki kukosea hata kidogo.”

Si ajabu kwamba Fergus msimamizi wa kikosi alisema hivi kwa msisimuko: “Kwa kweli wanawake wanatimiza mengi sana katika ujenzi.”