1. Yehova anajisikia namna gani kuhusu kufanya kazi, na hilo linamusukuma kufanya nini?

YEHOVA anafurahia kazi yake. (Zab. 135:6; Yoh. 5:17) Anataka viumbe wake wenye akili wafurahie pia kazi yao. Kwa hiyo, anawapatia kazi ambayo inawaletea furaha na ambayo inawafanya watosheke. Kwa mufano, Mwana wake muzaliwa wa kwanza alimusaidia katika kazi ya uumbaji. (Soma Wakolosai 1:15, 16.) Biblia inasema kwamba, mbele ya kuja hapa duniani Yesu alikuwa pembeni ya Mungu kama “stadi [ao fundi] wa kazi.”—Met. 8:30.

2. Ni nini inaonyesha kwamba tangu zamani malaika wanafanya kazi ya maana na yenye kufurahisha?

² Kuanzia kitabu cha Mwanzo mupaka Ufunuo, Biblia inaonyesha kwamba tangu zamani Yehova anapatia malaika kazi ya kufanya. Kwa mufano, kisha Adamu na Eva kufanya zambi na kufukuzwa kutoka katika Paradiso, Mungu ‘aliweka upande wa mashariki wa bustani ya Edeni makerubi na upanga unaowaka ambao ulikuwa unajizungusha-zungusha ili kuilinda njia ya kuenda kwenye ule muti wa uzima.’ (Mwa. 3:24) Pia andiko la Ufunuo 22:6 linasema kwamba Yehova ‘alimutuma malaika wake ili kuwaonyesha watumwa wake mambo ambayo lazima yatendeke upesi.’

3. Wakati Yesu alikuwa hapa duniani, namna gani alifuata mufano wa Baba yake?

³ Wakati Yesu alikuwa hapa duniani, alifanya kwa furaha kazi ambayo Yehova alimupatia. Alifuata mufano wa Baba yake kwa kuwapatia pia wanafunzi wake kazi ya maana. Ili kufanya wanafunzi wake wafurahie sana mambo ambayo wangeweza kutimiza, Yesu aliwaambia hivi: ‘Kwa kweli kabisa ninawaambia ninyi, yule anayeniamini, huyo pia atafanya kazi ambazo mimi ninafanya; naye atafanya kazi kubwa kuliko hizi, kwa sababu ninaenda kwa Baba.’ (Yoh. 14:12) Yesu alikazia kwamba kazi hizo zinapaswa kufanywa haraka. Alisema hivi: ‘Lazima tufanye kazi zake aliyenituma kukiwa muchana bado; usiku unakuja wakati ambapo hakuna mutu anayeweza kufanya kazi.’—Yoh. 9:4.

4-6. (a) Sababu gani tunapaswa kuwa wenye shukrani kuona vile Noa na Musa walifanya kazi ambayo Yehova aliwapatia? (b) Kazi mbalimbali ambazo Mungu anawapatia wanadamu zinakuwa na matokeo gani?

⁴ Miaka mingi mbele Yesu akuje hapa duniani, wanadamu walipewa kazi yenye kufurahisha. Hata kama Adamu na Eva walishindwa kufanya kazi yenye Mungu aliwapatia, wanadamu wengine walifanya kazi yao sawasawa na vile Mungu aliwaomba. (Mwa. 1:28) Kwa mufano, Mungu alimupatia Noa maagizo yenye kuwa wazi kuhusu namna ya kujenga safina ili kulinda uzima wakati wa Garika. Alifanya kabisakabisa vile Yehova alimuomba. Tunaishi leo kwa sababu Noa alitimiza kwa bidii kazi ambayo Yehova alimupatia!—Mwa. 6:14-16, 22; 2 Pet. 2:5.

⁵ Yehova alimupatia Musa maagizo yenye kuwa wazi kuhusu namna ya kujenga hema ya ibada na kutia makuhani. Alifanya kabisa-kabisa vile Yehova alimuomba. (Kut. 39:32; 40:12-16) Kwa sababu Musa alitimiza kazi yake kwa uaminifu, sisi pia tunafaidika leo. Namna gani? Mutume Paulo alionyesha kwamba mambo fulani ambayo Sheria iliomba, yalikuwa mufano wa ‘mambo mema yatakayokuja.’—Ebr. 9:1-5, 9; 10:1.

⁶ Kwa sababu Mungu anatimiza kusudi lake hatua kwa hatua, vilevile kazi ambayo anawapatia watumishi wake inabadilika mara kwa mara. Hata hivyo, kazi yenye watumishi wa Mungu wanapewa inaendelea kumuletea Yehova utukufu na kuletea faida wanadamu wengine. Ni hivyo pia kuhusu Yesu; kazi ambayo alifanya wakati alikuwa mbinguni na wakati alikuwa duniani ilimuletea Yehova utukufu na ikaletea wanadamu faida. (Yoh. 4:34; 17:4) Vilevile kazi ambayo tunafanya inamutukuza Yehova. (Mt. 5:16; soma 1 Wakorintho 15:58.) Sababu gani tunasema hivyo?

7, 8. (a) Wakristo wako na pendeleo la kufanya kazi gani leo? (b) Tunapaswa kutenda namna gani wakati Yehova anatupatia muongozo?

⁷ Bila shaka, ni jambo la ajabu sana kuona Yehova anawapatia wanadamu wasio wakamilifu pendeleo la kutumika pamoja naye. (1 Kor. 3:9) Wale wote ambao wanajenga Majumba ya Mikusanyiko, Majumba ya Ufalme, na nyumba za Beteli wako katika programu ya ujenzi kama ile ya Noa na Musa. Iwe unasaidia kutengeneza Jumba lenu la Ufalme ao unasaidia kujenga makao makubwaya duniani pote ya Mashahidi wa Yehova ya Warwick, New York, furahia sana pendeleo hilo. (Ona picha mwanzoni mwa habari hii.) Huo ni utumishi mutakatifu. Hata hivyo, Wakristo wote wanaalikwa kusaidia katika programu ya ujenzi wa kiroho. Programu hiyo pia inamuletea Yehova utukufu na inaletea wanadamu watiifu faida. (Mdo. 13:47-49) Ili kufanya kazi hiyo vizuri zaidi, tengenezo la Mungu linatutolea muongozo unaofaa. Pengine hilo litafanya tupewe mugawo mupya.

⁸ Sikuzote, watumishi waaminifu wa Yehova wako tayari kufuata muongozo wake. (Soma Waebrania 13:7, 17.) Mwanzoni, inaweza kuwa vigumu kuelewa vizuri kabisa sababu  gani tunapewa mugawo mupya. Hata hivyo, tunajua vizuri kabisa kwamba tutapata faida ikiwa tunakubali mabadiliko ambayo Yehova anatokeza na ambayo anaona kuwa yanafaa.

9. Ni mufano gani muzuri wazee wanawekea ndugu na dada katika kutaniko?

⁹ Wazee wa kutaniko wanatamani sana kufanya mapenzi ya Yehova. Hilo linaonekana katika namna yao ya kuongoza kutaniko. (2 Kor. 1:24; 1 Tes. 5:12, 13) Wako tayari kufanya kazi kwa bidii na kujipatanisha na hali zinazoendelea kubadilika. Wanajikaza kujipatanisha na njia mupya za kuhubiri Ufalme wa Mungu. Hata kama mwanzoni, wahubiri fulani wanaweza kusita kuhubiri kupitia telefone, kwenye bandari (port), ao kuhubiri mahali pa watu wengi, wanafikia kupata matokeo mazuri. Kwa mufano, katika inchi ya Ujerumani, mapainia ine waliamua kuenda kuhubiri katika eneo la biashara ambalo lilikuwa halihubiriwe tena. Ndugu Michael anasema hivi: “Tulikuwa na wasiwasi kwa sababu tulifanya miaka mingi bila kuhubiri katika eneo la biashara. Inawezekana Yehova aliona namna tulijisikia, kwa sababu siku hiyo, tulikuwa na furaha ambayo tunaendelea kukumbuka mupaka leo. Tulifurahi sana kuona kwamba tulifuata muongozo ambao ulitolewa katika Huduma Yetu ya Ufalme na kwamba tulimutegemea Yehova!” Wewe pia, uko tayari kutumia njia zingine ili kuhubiri katika eneo lenu?

10. Ni mabadiliko gani yamefanywa kwenye Beteli katika miaka ya hivi karibuni?

¹⁰ Wakati fulani, mabadiliko yanafanywa kwenye Beteli. Katika miaka ya hivi karibuni, Beteli fulani zilitiwa pamoja. Wakati Beteli zinatiwa pamoja, ndugu na dada ambao walikuwa wanatumikia kwenye Beteli hizo wanalazimika kufanya mabadiliko; lakini kisha muda kidogo, ndugu na dada hao wanapata faida nyingi. (Mhu. 7:8) Wafanyakazi hao wenye bidii wanapata furaha kubwa, kwa sababu wanaongezea kitu fulani kwenye historia ya watu wa Yehova.

11-13. Ni magumu gani ndugu na dada fulani walipata kwa sababu kulikuwa mabadiliko kwenye Beteli?

¹¹ Tunaweza kujifunza mambo mengi ya maana kutokana na ndugu na dada ambao walifanya mabadiliko wakati Beteli fulani zilitiwa pamoja. Wamoja kati yao walikuwa wametumikia kwenye Beteli yao kwa muda wa miaka mingi. Kwa mufano, ndugu mumoja pamoja na bibi yake ambao walikuwa wanatumikia kwenye Beteli ya Amerika ya Kati, waliombwa kuhamia kwenye Beteli ya Meksiko ambayo ilikuwa kubwa zaidi kuliko ile ya Amerika ya Kati. Ndugu Rogelio anasema hivi: “Ilikuwa vigumu sana kuacha familia na marafiki.” Ndugu mwengine ambaye anaitwa Juan na ambaye aliombwa kuhamia kwenye Beteli ya Meksiko anasema hivi: “Ni kama vile mutu anazaliwa kwa mara ya pili; kwa sababu unapaswa kutafuta tena marafiki. Inaomba kujipatanisha na hali zingine na kubadilisha namna yako ya kufikiri.”

¹² Wanabeteli wa inchi zingine za Ulaya ambao waliombwa kuhamia kwenye Beteli ya Ujerumani walipata pia magumu fulani. Kila mutu ambaye anafurahia uzuri wa milima anaweza kuelewa vizuri kwamba ilikuwa vigumu kwa ndugu na dada wa Uswisi, inchi yenye kuzungukwa na milima yenye kuvutia, kuacha inchi yao na kuenda kuishi mahali pengine. Mwanzoni, ndugu na dada ambao walitoka kwenye Beteli ya Austria walikumbuka namna walikuwa wanaishi kwenye Beteli yao ndogo.

¹³ Ndugu na dada ambao wanahamia katika inchi ingine, wanalala katika vyumba tofauti na vile walikuwa wanatumia, wanatumika na ndugu na dada ambao walikuwa hawajue, na inawezekana wajifunze kufanya kazi ingine. Tena wanapaswa kuzoea kutaniko mupya, eneo mupya, pengine kwa kutumia luga ingine. Inaweza kuwa vigumu kufanya mabadiliko hayo. Lakini, Wanabeteli wengi wamekubali kuyafanya. Sababu gani?

14, 15. (a) Hata kama wanatumikia wapi, namna gani Wakristo wengi wanaonyesha kwamba wanafurahia pendeleo lao la kutumika pamoja na Yehova? (b) Ni katika njia gani wao ni mufano muzuri kwetu?

¹⁴ Dada Grethel anasema hivi: “Nilikubali kufanya mabadiliko kwa sababu nilitaka kumuonyesha  Yehova kwamba nilimupenda si kwa sababu ya inchi, majengo, ao pendeleo fulani ambalo nilikuwa nalo.” Dada Dayska anasema hivi: “Wakati nilikumbuka kwamba ni Yehova ndiye aliniomba kufanya mabadiliko, nilikubali kwa furaha.” Ndugu André na dada Gabriela bibi yake wanasema hivi: “Tulipopewa mugawo mupya, hatukutaka kutimiza kwanza tamaa zetu; tuliona kwamba ni nafasi mupya ya kumutumikia Yehova. Tulijiambia kwamba, ‘wakati tengenezo la Yehova linafanya mabadiliko, ni vizuri kutembea kulingana na mabadiliko hayo kwa furaha kuliko kuyapinga.’”

¹⁵ Wakati Beteli fulani zinatiwa pamoja, Wanabeteli fulani wanaombwa kufanya kazi ya upainia. Jambo hilo liliwafikia Wanabeteli wengi wakati Beteli ya Danemark, Norvège, na Suède zilifanywa kuwa Beteli moja ya Skandinavia. Tukamate mufano wa ndugu Florian na dada Anja, wenye walisema hivi: “Tunaona mugawo wetu kuwa jaribu lenye kufurahisha. Hata kama tunatumikia wapi, ni jambo lenye kupendeza sana kuona Yehova anatutumikisha. Kwa kweli, tunaweza kusema kwamba tumebarikiwa sana!” Ni kweli kwamba wengi kati yetu hawatafanya mabadiliko kama hayo, lakini tunaweza kuiga ndugu na dada hao ambao wanatia faida za Ufalme pa nafasi ya kwanza. (Isa. 6:8) Hata kama wanatumikia wapi, Yehova hakose kuwabariki wale wote ambao wanafurahia pendeleo lao la kutumika pamoja naye.

16. (a) Andiko la Wagalatia 6:4 linatupatia shauri gani? (b) Kila Mukristo anapewa pendeleo gani kubwa zaidi?

¹⁶ Kwa sababu hatuko wakamilifu, kila mara tunapenda kujilinganisha na wengine. Lakini Neno la Mungu linatushauria tukaze akili yetu juu ya mambo ambayo sisi tunaweza kufanya. (Soma Wagalatia 6:4.) Wengi kati yetu hawana mamlaka fulani katika tengenezo. Zaidi ya hilo, sisi wote hatuwezi kuwa mapainia, wamisionere, ao Wanabeteli. Kwa kweli, hizo ni pendeleo nzuri sana! Lakini ni vizuri tukumbuke kwamba sisi wote tuko na pendeleo kubwa zaidi. Pendeleo hilo ni kutumika pamoja na Yehova katika kazi ya kutangaza habari njema. Tunapaswa kufurahia sana pendeleo hilo.

17. Tunapaswa kukumbuka nini tunapoendelea kuishi katika ulimwengu huu wa Shetani, lakini sababu gani hatupaswe kuvunjika moyo?

¹⁷ Katika ulimwengu huu wa Shetani, inaweza kuwa vigumu kumutumikia Yehova kama vile tulipenda. Mambo kama vile madaraka katika familia, afya, ao hali zingine yanaweza kutuzuia. Lakini mambo hayo hayapaswe kutuvunja moyo. Endelea kutoa ushahidi kuhusu jina la Mungu na kutangaza Ufalme wake kila mara nafasi inajitokeza. Kwa kufanya hivyo, unaonyesha kwamba hauzarau hata kidogo pendeleo lako la kutumika pamoja na Mungu. Jambo la lazima sana ni kwamba unatumika pamoja na Yehova kulingana na uwezo wako na kwamba unasali kwa ajili ya ndugu na dada wenye kuwa na uwezo wa kufanya zaidi kuliko wewe. Usisahau kwamba kila mutu ambaye analetea jina la Yehova sifa, iko wa lazima sana kwake!

18. Tunapaswa kuwa tayari kutia nini pembeni, na sababu gani?

¹⁸ Hata kama tuna uzaifu fulani na hatukamilike, Yehova anafurahia kutupatia pendeleo la kutumika pamoja naye. Ni pendeleo kubwa sana kwetu kutumika pamoja na Mungu katika siku hizi za mwisho! Kwa hiyo, tunapaswa kuwa tayari kutia pembeni faida zetu fulani; kwa sababu tunajua kwamba katika dunia mupya tutafurahia “uzima ulio wa kweli,” ni kusema, uzima wa milele katika amani na furaha.—1 Tim. 6:18, 19.

19. Tunangojea baraka gani kutoka kwa Yehova?

¹⁹ Kwa sababu tunakaribia kuingia katika dunia mupya, ni vizuri tufikirie mambo ambayo Musa aliwaambia Waisraeli mbele waingie katika Inchi ya Ahadi. Aliwaambia hivi: ‘Yehova Mungu wako kwa kweli atakufanya ukuwe na uwingi kupita kiasi katika kila kazi ya mukono wako.’ (Kum. 30:9) Kisha vita ya Har-magedoni, wale wote ambao walikuwa wanatumika pamoja na Mungu kwa bidii watariti dunia ambayo aliwaahidi. Kisha, Yehova atatupatia kazi ingine, ni kusema, kugeuza dunia ikuwe paradiso yenye kupendeza sana!