Je, Tunaweza Kumuuliza Mungu Maulizo?

WATU fulani wanasema kama ni vibaya kumuuliza Mungu maulizo. Wanawaza kama kumuuliza Mungu sababu gani anaruhusu mambo fulani yafanyike ao yasifanyike ni kukosa heshima. Je, wewe pia unawaza hivyo?

Ikiwa unawaza hivyo, unaweza kushangaa kujua kama watu wengi wazuri walimuuliza Mungu maulizo. Kwa mufano:

Ayubu, mutu muaminifu alimuuliza hivi: “Kwa nini waovu wanaendelea kuishi, wamezeeka, pia wamekuwa na mali nyingi zaidi?”​—Ayubu 21:7.

Habakuki, nabii muaminifu alimuuliza hivi: ‘Kwa nini unawatazama wale wanaotenda kwa hila, na kukaa kimya wakati mutu muovu anapomumeza mutu aliye muadilifu kuliko yeye?’​—Habakuki 1:13.

Yesu Kristo alimuuliza hivi: “Mungu wangu, Mungu wangu, kwa nini umeniacha?”​—Mathayo 27:46.

Ukisoma mistari iliyo juu na chini ya maandiko hayo, utaona kwamba hakuna jambo lolote linaloonyesha kama Yehova * Mungu alikasirika alipoulizwa maulizo kama hayo. Kwa kweli, haishangaze kuona kama Mungu anawaruhusu watu wamuulize maulizo. Kwa mufano, Mungu hakasirike tunapomuomba atutumizie mahitaji yetu ya kimwili ya lazima yanayofanya tuendelee kuwa na afya nzuri. Anatutimizia mahitaji hayo kwa furaha. (Mathayo 6:11, 33) Vilevile, bila kulazimishwa, anatutolea mafundisho yanayotusaidia tuendelee kuwa na afya nzuri ya akili na ya moyoni. (Wafilipi 4:6, 7) Yesu aliwafundisha wafuasi wake hivi: ‘Endeleeni kuomba, nanyi mutapewa; endeleeni kutafuta, nanyi mutapata.’ (Mathayo 7:7) Maneno hayo yanaonyesha wazi kama Yesu alitufundisha kuomba ili kupata mahitaji yetu ya kimwili na majibu ya maulizo ya maana tunayojiuliza.

Ikiwa unapata nafasi, unaweza kumuuliza Mungu ulizo gani kati ya maulizo yanayofuata?

● Je, maisha yangu yana kusudi?

● Nitakapokufa, nitaenda wapi?

● Sababu gani unaniacha niteseke?

Kwa sababu “andiko lote limeongozwa na roho ya Mungu,” utapata majibu ya maulizo hayo katika Biblia, Neno lake. (2 Timotheo 3:16) Chunguza sababu gani watu fulani wamemuuliza Mungu maulizo yaliyo hapo juu na majibu ambayo Biblia inatoa.

[Maelezo ya chini]