Je, kifo kina nguvu zaidi kuliko Mungu? Bila shaka hapana! Namna gani kifo ao “adui” mwengine yeyote anaweza kuwa na nguvu zaidi kuliko “Mungu Mweza​-Yote”? (1 Wakorintho 15:26; Kutoka 6:3) Mungu ana nguvu za kuondoa kifo kupitia ufufuo, na anaahidi kufanya hivyo katika dunia mupya. * Je, ahadi hiyo ni hakika? Yesu, Mwana wa Mungu, anatuambia maneno ambayo yanaweza kujaza mioyo yetu na tumaini.​—Soma Mathayo 22:31, 32.

Alipozungumuza na Masadukayo ambao hawakuamini kwamba kuna ufufuo, Yesu alisema hivi: ‘Kwa habari ya ufufuo wa wafu, je, hamukusoma muliloambiwa na Mungu, akisema, Mimi ni Mungu wa Abrahamu na Mungu wa Isaka na Mungu wa Yakobo? Yeye ni Mungu, si wa wafu, bali wa walio hai.’ Hapa Yesu alikuwa akifikiria mazungumuzo kati ya Mungu na Musa kwenye kichaka kilichokuwa kinawaka moto, katika mwaka wa 1514 mbele ya kuzaliwa kwa Yesu. (Kutoka 3:1-6) Kulingana na Yesu, maneno ambayo Yehova alimuambia Musa, “Mimi ni Mungu wa Abrahamu na Mungu wa Isaka na Mungu wa Yakobo,” yanaonyesha kwamba ahadi ya ufufuo itatimia kabisa. Namna gani?

Chunguza kwanza mistari inayozunguka andiko hilo. Wakati Yehova alizungumuza na Musa, wazee wa ukoo Abrahamu, Isaka, na Yakobo walikuwa wamekufa zamani, kwa mufano, Abrahamu alikuwa amekufa kumepita miaka 329, Isaka alikuwa amekufa kumepita miaka 224, na Yakobo alikuwa amekufa kumepita miaka 197. Hata hivyo, Yehova alisema “Mimi ni” Mungu wao wala hakusema “Mimi nilikuwa” Mungu wao. Yehova alizungumuza juu ya wazee wa ukoo hao watatu ambao walikuwa wamekufa kama kwamba walikuwa wazima. Sababu gani?

Yesu alieleza hivi: “Yeye [Yehova] ni Mungu, si wa wafu, bali wa walio hai.” Fikiria kidogo maana ya maneno hayo. Ikiwa hakuna ufufuo, hivyo Abrahamu, Isaka, na Yakobo watabaki wafu milele na hawataishi tena. Ikiwa ni hivyo, Yehova angekuwa Mungu wa wafu. Hilo lingemaanisha kwamba kifo kina nguvu zaidi kuliko Yehova, kama kwamba anakosa uwezo wa kuwaweka huru watumishi wake waaminifu kutoka katika kifungo cha kifo.

Kwa hivyo basi tunaweza kusema nini juu ya Abrahamu, Isaka, Yakobo, na watumishi wote waaminifu wa Yehova ambao wamekufa? Yesu alisema maneno haya yenye nguvu: “Kwake, hao wote wako hai.” (Luka 20:38) Kwa kweli, kusudi la Yehova la kuwafufua watumishi wake waaminifu ambao wamekufa ni hakika sana hivi kwamba litatimia, ndiyo maana Yehova anawafikiria kama kwamba wako wazima. (Waroma 4:16, 17) Yehova ataendelea kuwalinda watu kama hao katika kumbukumbu lake lisilo na mipaka hadi wakati wake wa kuwarudisha kwenye uzima utimie.

Je, tumaini la kukutana tena na watu uliowapenda ambao wamekufa linakuvutia? Ikiwa jibu ni ndiyo, kumbuka kwamba Yehova ana nguvu nyingi zaidi kuliko kifo. Hakuna kitu chochote kinachoweza kumuzuia kutimiza ahadi yake ya kufufua wafu. Sababu gani usijifunze mengi zaidi juu ya ahadi ya ufufuo na juu ya Mungu ambaye atatimiza ahadi hiyo? Ukifanya hivyo, bila shaka utamukaribia zaidi Yehova, “Mungu . . . wa walio hai.”