Je, Kuna Dini Yoyote Ambayo Unaweza Kutumainia Kuhusiana na Feza?
Estelle * aliye na watoto wengi alikuwa mushiriki mwenye bidii wa dini kwa miaka mingi. Anasema hivi: “Niliambia kiongozi wa dini yangu kwamba ninataka kujifunza Biblia.” Lakini hakuna siku kiongozi huyo alimufundisha Estelle. Mwishowe, Estelle aliacha kuenda kwenye kanisa. Anaendelea kusema hivi: “Viongozi wa kanisa waliandika na kusema kwamba hata ikiwa sifike kwenye kanisa, ninaweza tu kutuma feza. Hilo lilinifanya nifikiri, ‘Hawahangaike hata nisipofika; wanataka tu feza zangu.’”
Angelina, ambaye amekuwa sikuzote muamini wa dini, anasema hivi: “Katika kanisa letu, walipitisha kikapu cha sadaka mara tatu katika kila ibada, na tuliombwa kutoa kila mara kikapu kilipopitishwa. Sikuzote walikuwa wakiomba feza. Nilifikiri, ‘Watu hawa hawana roho ya Mungu.’”
Je, katika eneo lenu dini zinatumia njia zilizo wazi ao za ujanja ili kukaza watu watoe feza? Je, kufanya hivyo kunapatana na mafundisho ya Biblia?
BIBLIA INAFUNDISHA NINI?
Yesu, mwanzishaji wa Ukristo, alisema hivi: ‘Mulipokea bure, toeni bure.’ (Mathayo 10:8) Ujumbe wa Biblia hauwezi kununuliwa na feza na watu wote ambao wanautaka wanaweza kuupata.
Namna gani Wakristo wa kwanza walipata feza za kulipia garama za kutaniko?
Kila mutu katika kutaniko alitoa muchango ‘kama alivyoazimia moyoni mwake, si kwa kutopenda wala kwa kulazimishwa, kwa maana Mungu anamupenda mutoaji muchangamufu.’ (2 Wakorintho 9:7) Mutume Paulo alisema hivi: ‘Ilikuwa kwa kufanya kazi usiku na muchana, ili tusimutwike yeyote kati yenu muzigo wenye garama, kwamba tuliwahubiria ninyi habari njema.’ (1 Wathesalonike 2:9) Paulo alifanya kazi ya kutengeneza mahema ili kutegemeza utumishi wake.—Matendo 18:2, 3.
TUSEME NINI JUU YA MASHAHIDI WA YEHOVA KUHUSIANA NA FEZA?
Kwa kawaida, Mashahidi wa Yehova wanafanya mikutano yao katika majengo ambayo si makubwa-makubwa na ambayo hayapambwe kwa namna ya kushangaza watu. Majengo hayo yanaitwa Majumba ya Ufalme. Namna gani Mashahidi wa Yehova wanapata feza za kulipia garama za kutaniko? Hawapitishe sahani za kukusanya sadaka, wala hawatume bahasha ili kuomba-omba michango. Lakini, kila mutu anayependezwa na mafundisho ya kiroho anaweza kutia muchango wake kwa siri ndani ya kibweta cha michango kwenye Jumba la Ufalme.
Garama za dini zinapaswa kulipiwa namna gani?
Ni wazi kwamba iliomba feza ili kuchapisha na kusafirisha gazeti hili. Hata hivyo, katika gazeti hili hautaona hata siku moja matangazo ya biashara ao ya kuomba-omba feza. Kusudi kubwa la gazeti hili ni kueneza mafundisho ya Biblia.
Unawaza nini: Je, namna hiyo ya kulipia garama inapatana na maneno ya Yesu na mufano ambao uliachwa na Wakristo wa kwanza?
^ Majina fulani yamebadilishwa katika mufululizo huu wa habari.
