Katika kitabu cha Biblia cha Ruthu, mwanaume aliyekataa kutimiza daraka lake kulingana na Sheria ya Musa anaitwa tu Fulani wa Fulani. (Ruthu 4:1-12) Je, tunaweza kusema kwamba watu wote wanaozungumuziwa katika Biblia ambao hawatajwe majina walikuwa watu wabaya ao hawakuwa wa maana?

Hapana. Fikiria mufano mwengine. Ili kutayarisha chakula chake cha mwisho cha Pasaka, Yesu aliwaambia wanafunzi wake ‘waende jijini kwa Fulani-wa-fulani [mutu fulani,” La Sainte Bible en swahili de la R.D. Congo]” na kutayarisha mambo katika nyumba yake. (Mathayo 26:18) Je, tunaweza kusema kwamba mwanaume anayeitwa “Fulani wa fulani” katika andiko hilo alikuwa mutu mubaya ao kwamba hakuwa wa maana sana ili kutajwa jina? Hapana kabisa; “mutu fulani” anayetajwa katika andiko hilo alikuwa mwanafunzi wa Yesu. Jina lake halikutajwa, kwa sababu halikuwa la maana katika simulizi hilo.

Zaidi ya hiyo, Biblia inataja majina ya watu wengi wabaya; pia ina mifano ya watu wengi waaminifu ambao majina yao hayatajwe. Kwa mufano, jina la Eva, mwanamuke wa kwanza, linajulikana vizuri. Hata hivyo, kujifikiria kwa Eva na kukosa kwake utii kulifanya Adamu atende zambi, ambayo ilituletea matokeo mabaya sisi wote. (Waroma 5:12) Tofauti na hilo, jina la bibi ya Noa halitajwe katika Maandiko, lakini tunafaidika sana kwa sababu ya roho yake ya kutokujifikiria mwenyewe na ya utiifu ambayo alionyesha kwa kumuunga mukono bwana yake katika kazi yake ya maana. Kwa sababu jina lake halitajwe, jambo hilo halimaanishe kwamba hakuwa mutu wa maana ao hakubarikiwa na Mungu.

Kuna watu wengine ambao hawakutajwa majina katika masimulizi ya Biblia ambao walitimiza mambo ya maana, na hata walifanya matendo ya ushujaa, katika kutimiza kusudi la Yehova. Wazia binti mudogo Mwisraeli aliyekuwa mutumwa katika nyumba ya Naamani, mukubwa wa jeshi la Siria. Alizungumuza bila kuogopa na bimukubwa wake, bibi ya Naamani, juu ya nabii wa Yehova aliyekuwa huko Israeli. Jambo hilo liliwezesha muujiza mukubwa ufanyike. (2 Wafalme 5:1-14) Binti ya Yeftha, muamuzi Mwisraeli, alionyesha pia mufano muzuri wa imani. Alikubali bila kulazimishwa kuachana na pendeleo la kufunga ndoa na kuzaa watoto ili kutimiza naziri ambayo baba yake alikuwa amefanya. (Waamuzi 11:30-40) Vilevile, kuna watungaji wa zaburi zaidi ya 40, na manabii waliotimiza kwa uaminifu migawo ya maana ambao majina yao hayatajwe katika Biblia.​—1 Wafalme 20:37-43.

Labda mufano wenye kuvutia zaidi ni ule wa malaika waaminifu. Mbinguni kuna mamia ya mamilioni ya malaika waaminifu, lakini majina ya malaika wawili tu ndiyo yanatajwa katika Biblia, ni kusema, Gabrieli na Mikaeli. (Danieli 7:10; Luka 1:19; Yuda 9) Wengine wote hawatajwe majina katika masimulizi ya Biblia. Kwa mufano, Manoa, baba ya Samsoni, aliuliza malaika mumoja hivi: “Jina lako ni nani, ili neno lako litakapotimia, tukupe heshima?” Malaika huyo alijibu namna gani? “Kwa nini unauliza juu ya jina langu?” Kwa unyenyekevu, malaika huyo alikataa kukubali heshima ambayo ni Mungu tu ndiye anastahili kupewa.​—Waamuzi 13:17, 18.

Katika kila simulizi, Biblia haieleze sababu gani majina ya watu fulani yanatajwa na ya wengine hayatajwe. Lakini tunaweza kujifunza mambo mengi kutokana na watu waaminifu ambao walimutumikia Mungu bila kutazamia kusifiwa ao kujulikana.