Ni zawadi ya aina gani ambayo unaweza kufurahia kabisa? Bila shaka wengi kati yetu wanaweza kufurahi kupokea zawadi kutoka kwa mutu ambaye anaitoa kwa kuchochewa na upendo kuliko mutu ambaye anatoa zawadi kwa kulazimishwa. Mutu anapotoa zawadi, nia inayomuchochea kutoa ni jambo la maana. Nia hiyo ni jambo la maana kwetu, na zaidi sana, ni jambo la maana kwa Mungu. Fikiria maneno ya Paulo yaliyoongozwa na roho ya Mungu ambayo yanapatikana katika andiko la 2 Wakorintho 9:7.

Sababu gani Paulo aliandika maneno hayo? Alitaka kuwatia moyo Wakristo wa Korintho kuunga mukono kazi ya kutoa misaada ili kutegemeza waamini wenzao ambao walikuwa na uhitaji huko Yudea. Je, alijaribu kuwalazimisha Wakorintho kutoa? Hapana kabisa, aliandika hivi: ‘Kila mumoja na afanye kama alivyoazimia moyoni mwake, si kwa kutopenda wala kwa kulazimishwa, kwa maana Mungu anamupenda mutoaji muchangamufu.’ Acheni tufikirie kwa uangalifu shauri hilo.

“Kama alivyoazimia moyoni mwake.” Paulo anasema kwamba Mukristo wa kweli anatoa kwa sababu ameamua “moyoni mwake” kufanya hivyo. Wakati huo huo, Mukristo anafikiria kwa uangalifu mahitaji ya waabudu wenzake. Mutu mumoja mwenye elimu anasema kwamba neno lililotafsiriwa ‘kuazimia’ “lina wazo la kupanga jambo mbele ya wakati.” Kwa hiyo, Mukristo anafikiria mbele ya wakati mahitaji ya waabudu wenzake na anajiuliza jambo ambalo anaweza kufanya ili kuwatimizia mahitaji hayo.​—1 Yohana 3:17.

“Si kwa kutopenda wala kwa kulazimishwa.” Paulo anaonyesha namna mbili za kutoa ambazo hazifae kati ya Wakristo wa kweli, ni kusema, kutoa bila kutaka na kutoa kwa kulazimishwa. Neno la Kigiriki linalotafsiriwa “kwa kutopenda” linamaanisha moja kwa moja “kwa huzuni (ao masikitiko).” Kitabu kimoja cha maelezo kinasema kwamba mutu anayetoa kwa kutopenda, ao kwa kulazimishwa, anatoa “feza yake akiwa mwenye kusikitika moyoni.” Mutoaji mwenye kulazimishwa anatoa kwa sababu anajisikia kuwa mwenye kukazwa kufanya hivyo. Kwa kweli, ni nani kati yetu anayetaka kupokea zawadi kutoka kwa mutu ambaye anatoa kwa kutopenda ao kwa kulazimishwa?

‘Mungu anamupenda mutoaji muchangamufu.’ Paulo anasema kwamba Mukristo anapoamua kutoa, anapaswa kufanya hivyo kwa uchangamufu, ao kwa furaha. Kwa kweli, furaha inatokana na kutoa kwa kuchochewa na nia nzuri. (Matendo 20:35) Watu wengine wanaona waziwazi furaha ya mutu ambaye ni mutoaji muchangamufu. Kwa kweli, neno “muchangamufu” linaweza kueleza vizuri namna mutoaji anavyojisikia ndani na inje. Mutoaji muchangamufu anagusa mioyo yetu. Na pia anafurahisha moyo wa Mungu. Tafsiri nyingine ya Biblia inasema hivi: “Mungu anawapenda watu ambao wanapenda kutoa.”​—Contemporary English Version.

Maneno hayo ya mutume Paulo yaliyoongozwa na roho ya Mungu ni kanuni inayoongoza namna Wakristo wanavyotoa. Iwe tunatoa wakati wetu, nguvu zetu, ao vitu vyetu vya kimwili, acheni tufanye hivyo kwa kupenda kwetu na kwa sababu tunapata furaha ya kweli tunapokuwa wakarimu kwa wengine, zaidi sana wale walio na uhitaji. Kutoa kwa namna hiyo kutatufanya tuwe wenye furaha na pia kutamufanya Yehova atupende kwa sababu ‘anamupenda mutoaji muchangamufu.’