Micheline: Jambo, Sofia. Ninafurahi kukukuta nyumbani.

Sofia: Mimi pia ninafurahi.

Micheline: Wakati uliopita nilipokuwa hapa, tulizungumuza juu ya namna Mungu anajisikia wakati anaona tunateseka. * Ulisema kwamba umejiuliza hivyo kwa muda murefu, zaidi sana kisha mama yako kuumia katika aksidenti ya motokari. Sasa, mama yako anajisikia namna gani?

Sofia: Kuna wakati anajisikia vizuri na kuna wakati anajisikia vibaya. Leo, anajisikia vizuri.

Micheline: Ninafurahi kusikia hivyo. Inaweza kuwa vigumu kwako kutulia katika hali kama hiyo.

Sofia: Ni vile. Wakati fulani ninajiuliza ikiwa atateseka mupaka wakati gani.

Micheline: Si vibaya kujiuliza hivyo. Ikiwa unakumbuka, wakati uliopita, tulipozungumuza, nilikuachia ulizo juu ya sababu gani Mungu ameacha mateso yaendelee ikiwa ana nguvu za kuyamaliza.

Sofia: Ndiyo, ninakumbuka.

Micheline: Mbele tuone jibu la Biblia, acha turudilie mambo machache tuliyozungumuzia wakati uliopita.

Sofia: Sawa.

Micheline: Kwanza, tuliona kwamba hata mwanaume fulani mwaminifu wa nyakati za zamani alijiuliza sababu gani Mungu anaacha watu wateseke. Hata hivyo, Mungu hakumukemea kwa sababu aliuliza juu ya jambo hilo, wala Mungu hakumuambia kwamba anahitaji imani zaidi.

Sofia: Hilo lilikuwa wazo jipya kwangu.

Micheline: Pia tuliona kwamba Yehova Mungu hafurahi anapotuona tunateseka. Kwa mufano, Biblia inasema kwamba wakati watu wake walikuwa wanateseka, ‘hilo lilimutaabisha.’ * Haufarijiwe kusikia kwamba Mungu anahangaika wakati anaona tunateseka?

Sofia: Ndiyo, ninafarijiwa.

Micheline: Mwishowe, tulikubaliana kwamba kwa kuwa Muumbaji wetu ana nguvu nyingi, kwa kweli ana uwezo wa kuingilia mambo na kumaliza mateso wakati wowote anataka.

Sofia: Hilo ndilo jambo ambalo sielewe. Sababu gani Mungu anaacha mambo haya yote mabaya yatokee wakati ana nguvu za kuyamaliza?

Micheline: Tunaweza kutafuta jibu kwa ulizo lako kwa kuzungumuzia kitabu cha kwanza cha Biblia kinachoitwa Mwanzo. Unajua habari ya Adamu na Eva na tunda lililokatazwa?

Sofia: Ndiyo, nilijifunza habari hiyo katika mafundisho ya watoto ya Siku ya Yenga. Mungu alisema wasikule matunda ya muti fulani, lakini wakakula matunda hayo.

Micheline: Hilo ni kweli. Sasa, acha tufikirie matukio ambayo yaliongoza Adamu na Eva wafanye  zambi. Matukio hayo yanahusiana moja kwa moja na sababu inayofanya watu wateseke. Tafazali, unaweza kusoma andiko la Mwanzo sura ya 3, mustari wa 1 mupaka wa 5?

Sofia: Sawa. ‘Basi nyoka alikuwa mwenye kujihazari kuliko wanyama wote wa mwituni ambao Yehova Mungu alikuwa amewafanya. Kwa hiyo akaanza kumuambia mwanamuke: Je, ni kweli kwamba Mungu alisema musikule matunda ya kila muti wa bustani? Mwanamuke akamujibu na kumuambia nyoka: Tunaweza kula matunda ya miti ya bustani. Lakini kuhusu kula matunda ya muti ulio katikati ya bustani, Mungu amesema, Musiyakule, wala musiyaguse ili musikufe. Ndipo nyoka akamuambia mwanamuke: Hakika hamutakufa. Kwa maana Mungu anajua kwamba siku ileile mutakapokula matunda yake macho yenu yatafunguliwa, nanyi mutakuwa kama Mungu, mukijua mema na mabaya.’

Micheline: Asante kwa kusoma vizuri. Acha tuzungumuzie andiko hili kwa muda mufupi. Kwanza, ona kwamba nyoka alizungumuza na mwanamuke, ni kusema, Eva. Sehemu nyingine ya Biblia inaonyesha kwamba ni Shetani Ibilisi ndiye alikuwa anasema kupitia nyoka. * Shetani alimuuliza Eva juu ya amri ambayo Mungu aliwapatia kuhusu muti fulani. Uliona katika andiko hilo Mungu alisema Adamu na Eva wangepata malipizi gani ikiwa wangekula matunda ya muti huo?

Sofia: Wangekufa.

Micheline: Hilo ni jibu la kweli. Kisha, kwa maneno yake yaliyofuata, Shetani alitoa shitaka kubwa juu ya Mungu. Ona mambo aliyosema: ‘Hakika hamutakufa.’ Shetani alimuita Mungu musema-uongo!

Sofia: Ndiyo mara yangu ya kwanza kusikia sehemu hiyo ya habari hiyo.

Micheline: Na wakati Shetani alimuita Mungu musema-uongo, alitokeza ulizo ambalo lingeomba wakati ili kulijibu. Unajua sababu gani?

Sofia: Hmm. Sizani.

Micheline: Sawa, pengine nieleze habari hiyo hivi: Tuseme kwamba siku moja ninakuja kukuona na ninakuambia kwamba nina nguvu nyingi kukupita. Namna gani unaweza kuonyesha kama ninasema uongo?

Sofia: Ninafikiri tunaweza kupima nguvu zetu kwa njia fulani.

Micheline: Ndiyo, ni hivyo kabisa. Pengine tunaweza kutafuta kitu kimoja kizito na kuona ni nani kati yetu ataweza kukinyanyua. Kwa kweli, ni vyepesi sana kuonyesha ni nani aliye na nguvu zaidi.

Sofia: Sawa, ninakuelewa.

Micheline: Lakini tuseme nini ikiwa kuliko kusema kwamba nina nguvu zaidi kukupita, ninasema kuwa mimi ni mutu mwema kuliko wewe? Hilo ni jambo ngumu zaidi kuonyesha, sivyo?

Sofia: Ndiyo, ninafikiri hivyo.

Micheline: Kwa kweli, sifa ya wema ni tofauti na nguvu, ambayo inaweza kuonyeshwa kwa kupima kwa njia fulani.

Sofia: Ndiyo.

Micheline: Ni wazi kwamba, njia moja tu ya kumaliza ubishi huo inaweza kuwa kuacha wakati upite ili watu wengine waone ni nani kati yetu sisi wawili aliye mwema zaidi.

Sofia: Hilo ni kweli kabisa.

Micheline: Sasa, chunguza tena habari hii katika kitabu cha Mwanzo. Je, Shetani alisema kwamba ana nguvu zaidi kuliko Mungu?

Sofia: Hapana.

Micheline: Mungu angemuonyesha Shetani haraka kuwa ni muongo. Lakini, Shetani alisema kuwa yeye ni mwema zaidi kuliko Mungu. Ni kama vile alimuambia Eva, ‘Mungu anawadanganya, lakini mimi ninawaambia kweli.’

Sofia: Hilo ni wazo lenye kupendeza.

Micheline: Hivyo, kwa sababu Mungu ni mwenye hekima, alijua kuwa njia nzuri ya kumaliza ubishi huo ilikuwa kuacha wakati upite. Mwishowe, ingeonekana wazi kabisa ni nani alisema kweli na ni nani alisema uongo.

Sofia: Lakini wakati Eva alikufa, je, hilo halikuhakikisha kwamba Mungu alisema kweli?

Micheline: Ndiyo, lilihakikisha kwa njia fulani.  Lakini shitaka la Shetani lilihusisha mambo mengi zaidi. Angalia tena mustari wa 5. Unaona jambo lingine ambalo Shetani alimuambia Eva?

Sofia: Alisema kwamba ikiwa anakula matunda ya ule muti, macho yake yangefunguliwa.

Micheline: Ndiyo, na kwamba angekuwa ‘kama Mungu, akijua mema na mabaya.’ Kwa hiyo, Shetani alionyesha kwamba Mungu anawaficha wanadamu jambo fulani nzuri.

Sofia: Ninaelewa.

Micheline: Na hilo lilikuwa pia shitaka kubwa.

Sofia: Unamaanisha nini?

Micheline: Kwa maneno yake, ni kama vile Shetani alisema kwamba Eva, na baadaye wanadamu wengine wote, wangekuwa na maisha mazuri bila kutawaliwa na Mungu. Katika hali hii pia, Yehova alijua kwamba njia nzuri sana ya kujibu shitaka hilo ingekuwa kuacha Shetani ajaribu kuonyesha mambo ambayo alisema. Kwa hiyo, Mungu amemuruhusu Shetani atawale dunia kwa muda fulani. Ndiyo maana tunaona mateso mengi katika dunia, ni kwa sababu Shetani ndiye anatawala dunia, si Mungu. * Lakini kuna habari njema.

Sofia: Ni habari njema gani?

Micheline: Biblia inafundisha mambo haya mawili ya kweli na yenye kupendeza juu ya Mungu. Jambo la kwanza, Yehova anatuhangaikia wakati tunateseka. Kwa mufano, fikiria maneno ya Mufalme Daudi yanayopatikana katika Zaburi 31:7. Daudi aliteseka sana katika maisha yake, lakini angalia mambo alimuambia Mungu katika sala. Tafazali, unaweza kusoma andiko hilo?

Sofia: Sawa. Linasema hivi: ‘Nitakuwa na shangwe na kushangilia katika fazili zako zenye upendo, kwa kuwa umeona mateso yangu; umejua juu ya taabu za nafsi yangu.’

Micheline: Kwa hiyo, hata ikiwa Daudi aliteseka sana, alifarijiwa kwa kujua kwamba Yehova aliona mambo yote yaliyomupata. Je, unafarijiwa na jambo hilo, ni kusema, wazo la kwamba Yehova anaona mambo yote, hata maumivu makali yaliyo ndani ya mioyo yetu ambayo wanadamu wengine hawawezi kuelewa kabisa?

Sofia: Ndiyo, hilo linanifariji.

Micheline: Jambo la pili ni kwamba Mungu hataacha tuteseke milele. Biblia inafundisha kwamba hivi karibuni Mungu atamaliza utawala muovu wa Shetani. Na atamaliza kabisa mambo yote mabaya ambayo yametendeka duniani, kutia ndani mateso ambayo yamekupata wewe na mama yako. Ninaweza kuja juma linalokuja ili nikuonyeshe sababu gani tunaweza kuwa na uhakika kwamba Mungu atamaliza mateso yote? *

Sofia: Ni vizuri urudie tena.