Mawu mapulu taumata měbiahẹ̌ mal᷊uasẹ̌ su dunia. I Sie někoạ dunia ini dingangu kěbị dal᷊ohone ual᷊ingu i Sie makěndagẹ̌ su taumata. Seng mal᷊ighạ, i Sie sarung měgělị pěbawiahẹ̌ limembong mapia su ěllo mahi gunang kěbị taumata. I Sie lai sarung měminasa kěbị apa seng nakasusah taumata.​—Basa Yeremia 29:11.

Tawẹ apa pěměrenta orasẹ̌ ini seng bọu nakailang karal᷊akisẹ̌, kasasakị, arau papate. Katewe piạ habarẹ̌ mapia. Seng mal᷊ighạ, Mawu sarung měngganti pěměrentang taumata dingangu pěměrenta-Ne. Taumata sarung makapěndang pẹ̌darame dingangu kasasehatẹ̌.​—Basa Yesaya 25:8; 33:24; Daniel 2:44.

Su tempong Mawu měminasa taumata dal᷊akị, kasasusah sarung mailang. (Zefanya 2:3) Kange ene sarung mariadi? Hengetangu Mawu něněbal᷊ẹ̌ apa nariadi orasẹ̌ ini sauneng nakasusah pěbawiahu taumata. Ini něnodẹ seng mal᷊ighạ tempone Mawu měminasa taumata dal᷊akị.​—Basa 2 Timotius 3:1-5.

I kitẹ harusẹ̌ měngěndung soal u Mawu bọu Hengetang’E, Alkitapẹ̌. Alkitapẹ̌ mẹ̌sul᷊ungu sěmbaụ suratẹ̌ bọu papạ matal᷊ěntụ. Ene nělahẹ kerea tadeạu pěbawiahi kitẹ orasẹ̌ ini limembong mapaelẹ̌ dingangu kerea makaěbạ pěbawiahẹ̌ kěkalẹ̌ su tempo mahi su dunia. Maning kerene, aramanung piạ u madiri mạeng i kau měngěndung Alkitapẹ̌. Katewe, i kau marugi mạeng tawe měngěndung.​—Basa Amsal 29:25; Wahyu 14:6, 7.