Maning i kau seng někoạ lawọ hal᷊ẹ̌ tadeạu pẹ̌kakawing dingangu sěntahanakengu mal᷊unsemahẹ̌, katewe piạ hal᷊ẹ̌ tawe tẹ̌tiněnang mạdiadi, ene makakoạ si kitẹ tawe gampang měndiagạ karal᷊uasu naung. (Měnanasẹ̌ 9:11) Mawu matal᷊ěntụ, i Sie mẹ̌tu-l᷊ung si kau su tempong tumatěngo kasasusah. Mạeng i kau tumol᷊e prinsip u Binohẹ Susi, i kau dingangu sěntahanakengu botonge tumatěngo kasasigěsạ maning kerea kaguwạe.

APA NIUL᷊Ị U BINOHẸ SUSI: ”Lěngkangko kal᷊awọu kagha-ghěnggang i kamene su Mawu Ruata, u kai i Sie mẹ̌sasěmpị si kamene.” (1 Petrus 5:7) Pakatahěndung sasal᷊ukạ bal᷊inẹ bọu Mawu. (Yakobus 1:13) Mạeng i kau mẹ̌těngkarani su Mawu, i Sie sarung měgělị dal᷊eng kapaelange gunang tumatěngo kasasusah ene. (Yesaya 41:10) ”Běmbingko ral᷊ungu naungu si Sie.”—Mazmurẹ̌ 62:9.

I kau sarung makaěbạ lahiborẹ̌ su tempong mẹ̌basa dingangu měngěndung Binohẹ Susi ěllo-ěllo. Hakị u ene, i kau sarung makapěndang kerea Mawu měnoghasẹ̌ su tempong piạ sigěsạ. (2 Korintus 1:3, 4; Roma 15:4) I Sie nẹ̌diandi sarung měgělị ”karal᷊unsemahẹ̌ . . . kụ tawe ikatiněnang taumata.”—Filipi 4:6, 7, 13.

APA HARUSẸ̌ KOATENG:

• Pědoa si Yehuwa tadeạu matěnang dingangu botonge měpikirẹ̌ mapaelẹ̌

• Pětiněnako apa koatengu su tempong tumatěngo kasasusah, kụ pilẹe sude kapaelange

APA NIUL᷊Ị U BINOHẸ SUSI: ”Taumata kụ mawudi e sěntiniạ mang mạdoung kasingkạ, arawe taumata pelesa e sěntiniạ mang lụěningu makahombang těntiro.” (Baweran Salomo 18:15) Pakasingkạko, apa harusẹ̌ koateng gunang kěbị anggota keluarga. Pẹ̌bisara si sire, kụ daringihẹ̌ lai si sire.—Baweran Salomo 20:5.

Kere apa mạeng piạ anaụ sěngkatau ikẹ̌kěndagẹ̌ něněntang si kitẹ? Abe kamea měnodẹ kerea pěndangu. I Yesus lai “simangị.” (Yohanes 11:35; Měnanasẹ̌ 3:4) Penting lai měngirul᷊e dingangu mětikị. (Markus 6:31) Tadeạu i kamene botonge tumatěngo kasasusah ene.

APA HARUSẸ̌ KOATENG:

• Pakawiasa mẹ̌bawěke su sěntahanakeng. Tadeạu su tempong piạ sigěsạ kahombangeng, i sire seng biasa mẹ̌bisara dingangu

• Pẹ̌bawěkeko dingangu taumata wal᷊inẹ apang seng bọu nakahombang sigěsạ mẹ̌sul᷊ung

APA NIUL᷊Ị U BINOHẸ SUSI: ”Sěngkatau hapị hanesẹ̌ satia su hapị e, arawe sěngkatau anạ u sěmbaụ mal᷊aing měnanggung sigěsạ dingang.” (Baweran Salomo 17:17) Manga hapị mapulu mẹ̌tul᷊ung si kau, katewe i sire běga apa harusẹ̌ koateng. Paul᷊ịko apa kapulunu si sire. (Baweran Salomo 12:25) Pẹ̌dorong tul᷊ung gunang kerohanian i kamene si sire apang masingkạ Binohẹ Susi. I sire makaghělị tatěntiro bọu Binohẹ Susi tadeạu makatul᷊ung si kau.—Yakobus 5:14.

I kau sarung matoghasẹ̌ mạeng mědal᷊ahapị dingang i sire apang pangangimange matoghasẹ̌ dingangu mangimang su dianding Mawu. I kau lai makaěbạ lahiborẹ̌ su tempong měgělị lahiborẹ̌ su taumata wal᷊inẹ. Su ral᷊ungu pěbawiahẹ̌ pẹ̌tul᷊ungko si sire apang nakaěbạ sigěsạ, kụ abe pẹ̌těngkahae bọu i sire apang kụkěndagẹ̌ si kau.—Baweran Salomo 18:1; 1 Korintus 15:58.

APA HARUSẸ̌ KOATENG:

• Pẹ̌bawěke dingangu hapịu mapia, kụ mạeng i sie mẹ̌tul᷊ung, tarima ene

• Pakal᷊ahẹ dingangu pakajujurẹ̌ maul᷊ị su taumata wal᷊inẹ apa botonge koateng i sire gunang mẹ̌tul᷊ung si kau