Haree hanesan Ita-nia kolega hotu uza média sosiál no sempre koʼalia kona-ba neʼe. Karik sira mós goza Ita tanba Ita la uza média sosiál. Entaun se Ita hasoru daudaun situasaun hanesan neʼe, Ita presiza hatene saida? Saida mak Ita bele halo?

 Ita la mesak deʼit. Inan-aman barak la fó lisensa ba sira-nia oan atu uza média sosiál. Karik sira rekoñese katak média sosiál bele lori perigu hanesan:

•   depresaun no moras mentál sira seluk.

•   fasil liu atu haree pornografia, haruka ka simu mensajen neʼebé la morál, ema abuza no hamoe malu.

•   komprende malu sala ho kolega sira.

 Joven barak deside atu la uza tan média sosiál. Sira rasik rekoñese katak média sosiál sei lori susar ba sira duké buat diʼak. Haree toʼok esperiénsia balu tuirmai:

•   Priscilla rekoñese katak neʼe naʼok ninia tempu barak neʼebé nia bele uza atu halo buat seluk neʼebé lori benefísiu.

•   Jeremy rekoñese katak susar ba nia atu kontrola buat foʼer neʼebé mosu iha ninia média sosiál.

•   Bethany rekoñese katak neʼe halo nia fokus demais ba buat neʼebé ema seluk halo.

 “Haʼu deside atu hamoos tiha média sosiál neʼebé haʼu uza, no haʼu kontente. Haʼu la arrepende kona-ba neʼe, no kontente tanba bele iha tempu barak liu atu fokus ba buat neʼebé importante.”—Sierra.

 “Haʼu la kontente bainhira haʼu sai atan ba média sosiál, no dala ruma haʼu laran-taridu demais kona-ba ema seluk nia haree ba buat neʼebé haʼu tau iha média sosiál. La fasil mai haʼu atu hamoos haʼu-nia média sosiál, maibé haʼu sente kmaan bainhira halo ona nuneʼe. Haʼu sente dame iha laran tanba la uza média sosiál.”—Kate.

 Halo tuir inan-aman nia lei. Fó prova ba sira katak Ita bele duni halo tuir buat neʼebé sira husu hodi la hirus ka muramura.

 Bíblia nia prinsípiu: “Ema neʼebé beik fakar sai ninia sentimentu hotu, maibé ema neʼebé matenek kontrola ninia sentimentu no kalma nafatin.”—Provérbios 29:11.

 Karik ema ruma anima Ita atu uza média sosiál subasubar husi inan-aman. Maibé se Ita halo hanesan neʼe, Ita sei la sente hakmatek no fó-sala ba Ita-nia an. No se Ita-nia inan-aman hatene, neʼe sei halo susar ba sira atu fiar Ita.

 Bíblia nia prinsípiu: “Ami hakarak atu hatudu laran-moos iha buat hotu.”—Ebreu 13:18.

 Ita rasik tenke deside. Hanesan ho joven sira neʼebé temi ohin, karik Ita mós rekoñese katak média sosiál iha perigu barak. Se nuneʼe, Ita sei la uza média sosiál laʼós deʼit tanba inan-aman mak bandu, maibé tanba Ita rasik mak deside. Entaun, se Ita-nia kolega sira husu Ita uza média sosiál ka lae, Ita sei la moe atu hatán ba sira. No neʼe sei halo sira la hatún Ita.

 Buat neʼebé importante: Halo tuir inan-aman nia lei kona-ba média sosiál, no halo sira-nia desizaun sai Ita rasik nia desizaun. Ita sei la mate maski la uza média sosiál.