“Tuirmai haʼu haree lalehan foun no rai foun. Lalehan uluk nian no rai uluk nian lakon tiha ona, no tasi la iha tan.”—Apokalipse 21:1, Tradusaun Mundu Foun.

 “Tuir mai haʼu hare lalehan foun no rai foun; lalehan uluk nian no rai uluk nian lakon mohu tiha, no tasi la iha ona.”—Apokalipse 21:1, Liafuan diak ba imi, segunda edisaun.

 Eskritura neʼe uza liafuan simbóliku hodi fó sai katak Maromak nia Ukun iha lalehan sei troka ema nia governu hotu. Ukun neʼe sei halakon buat aat hotu no dirije ema neʼebé prontu atu hakruʼuk ba ninia autoridade.

 Livru Apokalipse hatoʼo informasaun “liuhusi sinál oioin” ka liafuan simbóliku. (Apokalipse 1:1) Tan neʼe, ita bele hatene katak lalehan no rai neʼebé temi iha eskritura neʼe mak simbóliku nian, laʼós tebes nian. Laʼós neʼe deʼit, eskritura seluk iha Bíblia mós temi “lalehan foun” no “rai foun” iha dalan simbóliku. (Isaias 65:17; 66:22; 2 Pedro 3:13) Aprende eskritura sira-neʼe no eskritura sira seluk ajuda ita atu komprende buat sira-neʼe katak sá.

 “Lalehan foun.” Dala ruma, Bíblia uza liafuan “lalehan” atu reprezenta ukun ka governu. (Isaias 14:12-14; Daniel 4:25, 26) Tan neʼe, referénsia ida dehan katak iha vizaun profesia nian, “lalehan reprezenta kbiit atu ukun ka governu”. a Entaun, “lalehan foun” iha Apokalipse 21:1 refere ba Maromak nia Ukun. Bíblia mós bolu governu lalehan nian neʼe nuʼudar “Ukun lalehan nian” no temi beibeik kona-ba ukun neʼe iha livru Apokalipse no livru seluk iha Bíblia. (Mateus 4:17; Apóstolu 19:8; 2 Timóteo 4:18; Apokalipse 1:9; 5:10; 11:15; 12:10) Lakleur tan, Maromak nia Ukun neʼebé Jesus mak liurai sei troka “lalehan uluk nian”, neʼe mak ema nia governu hotu neʼebé la perfeitu.—Daniel 2:44; Lucas 1:31-33; Apokalipse 19:11-18.

 “Rai foun.” Bíblia dehan katak planeta mundu neʼe sei nunka lakon mohu ka troka ho buat seluk. (Salmo 104:5; Eclesiastes 1:4) Entaun, rai simbóliku reprezenta saida? Dala barak Bíblia uza liafuan “rai” atu refere ba ema. (Génesis 11:1; 1 Krónikas 16:31; Salmo 66:4; 96:1) Tan neʼe, “rai foun” refere ba povu neʼebé prontu atu halo tuir Maromak nia governu iha lalehan. “Rai uluk nian”, ka ema neʼebé kontra Maromak nia Ukun, sei lakon mohu.

 “Tasi la iha tan.” Hanesan ho liafuan seluk iha Apokalipse 21:1, “tasi” mós buat neʼebé simbóliku. Tasi mak buat neʼebé la hakmatek no sai fuik beibeik ho anin-boot. Tan neʼe, liafuan “tasi” reprezenta ema neʼebé halo problema oioin iha mundu tanba lakohi moris tuir Maromak nia ukun-fuan. (Isaias 17:12, 13; 57:20; Apokalipse 17:1, 15) Sira mós sei lakon. Salmo 37:10 dehan: “Hela tempu uitoan tan, ema aat sei la iha ona; ó sei hateke ba sira-nia fatin, maibé sira la iha neʼebá.”

 Livru Apokalipse fó-hatene nanis kona-ba buat neʼebé akontese durante “Naʼi nia loron”. (Apokalipse 1:10) Tuir Bíblia nia profesia, loron neʼe hahú iha tinan 1914 kuandu Jesus sai Liurai iha Maromak nia Ukun. b Maibé nia sei la ukun kedas buat hotu iha mundu. Loloos, profesia seluk fó sai katak mundu nia kondisaun sei sai aat tebes durante parte primeiru husi “Naʼi nia loron”. Bíblia bolu tempu neʼe nuʼudar “loron ikus sira”. (2 Timóteo 3:1-5, 13; Mateus 24:3, 7; Apokalipse 6:1-8; 12:12) Kuandu tempu susar neʼe remata, Maromak nia Ukun sei halakon lalehan uluk nian no rai uluk nian hodi lori dame no unidade ba mundu. Povu neʼebé simu ukun neʼe, neʼebé Bíblia bolu “rai foun”, sei moris haksolok ho ambiente diʼak no saúde perfeitu.—Apokalipse 21:3, 4.

 Haree vídeo badak neʼe hodi komprende kona-ba livru Apokalipse.