Anti-Kristu laʼós refere deʼit ba ema ka grupu ida. Bíblia hatete katak iha “anti-Kristu barak”. (1 João 2:18) Liafuan anti-Kristu mai husi liafuan Gregu neʼebé signifika “kontra hasoru (ka laʼós) Kristu”. Neʼe inklui ema naran deʼit neʼebé:

•   La simu Jesus nuʼudar Kristu (Mesias) ka la rekoñese Jesus nuʼudar Maromak nia Oan-Mane.​—1 João 2:22.

•   Kontra hasoru Jesus Kristu neʼebé Maromak hili.​—Salmo 2:1, 2; Lucas 11:23.

•   Finje sai Kristu.​—Mateus 24:24.

•   Fó-terus ba Jesus nia dixípulu sira. Ba Jesus, ema neʼebé fó-terus ba ninia dixípulu sira hanesan fó-terus ba nia.​—Apóstolu 9:5.

•   Finje sai nuʼudar ema Kristaun maski kontra ukun-fuan ka bosok.​—Mateus 7:22, 23; 2 Korinto 11:13.

 Ema sira hanesan neʼe mak Bíblia hanaran nuʼudar “anti-Kristu”. (2 João 7) Anti-Kristu primeiru mosu iha apóstolu sira-nia tempu. Bíblia nia profesia hatete nanis katak anti-Kristu sei iha toʼo agora.​—1 João 4:3.

•   Sira promove ideia neʼebé sala kona-ba Jesus. (Mateus 24:9, 11) Porezemplu, hanorin kona-ba Trindade ka hanorin katak Jesus mak Maromak Kbiit Boot Liu Hotu. Sira neʼebé hanorin hanesan neʼe loloos kontra Jesus nia hanorin neʼebé hatete: “Aman mak boot liu haʼu.”​—João 14:28.

•   Anti-Kristu la hanorin saida mak Jesus hatete kona-ba Maromak nia Reinu ka Ukun. Porezemplu, ulun-naʼin relijiaun barak hatete katak Kristu ukun liuhusi ema nia governu. Maibé, neʼe kontra buat neʼebé Jesus hanorin, neʼebé hatete: “Haʼu-nia Ukun laʼós parte husi mundu neʼe.”​—João 18:36.

•   Sira hatete katak Jesus mak sira-nia Naʼi, maibé sira la halo tuir ninia mandamentu, inklui mandamentu atu haklaken liafuan diʼak kona-ba Maromak nia Ukun.​—Mateus 28:19, 20; Lucas 6:46; Apóstolu 10:42.