Ema nia hakaʼas an atu promove dame iha mundu la susesu no neʼe sei nafatin la hetan susesu tanba razaun balu tuirmai:

•   “Ema neʼebé laʼo mós la iha kbiit atu hili ninia hakat.” (Jeremias 10:23) Bainhira Maromak kria ema, nia la kria sira ho kbiit ka direitu atu ukun sira-nia an rasik. Tan neʼe ema labele hetan susesu atu promove dame neʼebé bele tahan ba nafatin iha mundu.

•   “Imi keta tau fiar ba ulun-naʼin sira ka ema neʼebé labele lori salvasaun. Bainhira nia iis kotu, nia fila fali ba rai; iha loron neʼe kedas mak ninia hanoin sira lakon ona.” (Salmo 146:3, 4) Maski ulun-naʼin sira iha motivu neʼebé diʼak, maibé sira la hetan solusaun atu rezolve problema sira neʼebé hamosu funu.

•   “Iha loron ikus sira sei iha problema barak neʼebé susar atu tahan. Tanba ema sei . . . siʼak, la hadomi buat neʼebé diʼak, traidór, ulun-toos, [no] foti an.” (2 Timóteo 3:1-4) Ita moris iha sistema aat neʼe nia “loron ikus sira”, no ema nia hahalok halo susar atu bele iha dame iha mundu neʼe.

•   “Susar ba rai no tasi, tanba Diabu tun tiha ona ba imi, no nia hirus makaʼas, tanba nia hatene katak ninia tempu hela uitoan deʼit ona.” (Apokalipse 12:12) Maromak nia inimigu, Diabu soe tun tiha ona mai rai no nia labele fila fali ba lalehan, no Diabu book ema atu hatudu hahalok aat hanesan nia. Durante Diabu sai nuʼudar “ukun-naʼin mundu neʼe nian”, ita sei nunka bele moris ho dame iha mundu.​—João 12:31.

•   “[Maromak nia Ukun] sei harahun no halakon liurai sira-neʼe hotu nia ukun [neʼebé kontra Maromak], no ukun neʼe mesak mak sei hamriik ba nafatin.” (Daniel 2:44) Só Maromak nia Ukun deʼit mak bele lori dame ba mundu, ema nia governu labele halo ida-neʼe.—Salmo 145:16.