Iha Bíblia, liafuan Gregu neʼebé tradús nuʼudar “fó perdua” signifika “husik bá”. Neʼe hanesan ema neʼebé la sisi ema seluk atu selu debe. Jesus uza komparasaun neʼe bainhira hanorin ninia dixípulu sira atu halo orasaun hodi dehan: “Fó perdua ba ami-nia sala, tanba ami mós perdua ona ema hotu neʼebé iha tusan hasoru ami.” (Lucas 11:4, nota-rodapé) Bainhira Jesus konta ai-knanoik kona-ba atan neʼebé laran-aat, Jesus kompara fó perdua hanesan la sisi tan debe.​—Mateus 18:23-​35.

 Fó perdua ema seluk katak la rai hirus tan no la husu atu selu fali buat neʼebé nia halo ona. Bíblia hanorin katak ita labele hadomi deʼit ita-nia an, maibé ita tenke hadomi tebes ema ida atu ita bele fó perdua nia, tanba “domin la hanoin fali buat aat neʼebé nia simu”.​—1 Korinto 13:​4, 5.

Fó perdua neʼe laʼós katak

•   Simu deʼit hahalok sala. Bíblia la konkorda ho ema neʼebé hanoin katak hahalok aat mak hanesan buat baibain deʼit no la sala.​—Isaias 5:​20.

•   Finje sala neʼe nunka akontese. Maromak fó perdua duni ba Liurai David nia sala neʼebé boot, maibé David nafatin simu konsekuénsia husi ninia sala. Maromak husik atu hakerek David nia sala sira iha Bíblia atu sai nuʼudar lisaun ba ita.​—2 Samuel 12:​9-​13.

•   Husik ema seluk atu aproveita ita. Porezemplu, Ita fó-empresta osan ba ema ida, maibé nia estraga deʼit no labele selu fali hanesan nia promete ona. Nia sente sala tebes no husu deskulpa. Ita bele fó perdua ba nia hodi la hirus tan no la temi beibeik kona-ba sala neʼe. No Ita mós la husu tan kona-ba ninia tusan. Maski nuneʼe, ita bele hili atu la fó-empresta tan osan ba nia.​—Salmo 37:21; Provérbios 14:15; 22:3; Galásia 6:7.

•   Perdua maski la iha razaun neʼebé loos. Maromak la fó perdua ema neʼebé ho neon halo sala, lakohi fó sai ninia sala, la arrepende an no la husu deskulpa ba ema neʼebé nia hakanek. (Provérbios 28:13; Apóstolu 26:20; Ebreu 10:26) Ema neʼebé lakohi arrepende an sai Maromak nia inimigu. No Maromak la husu ita atu fó perdua ba ema hanesan neʼe.​—Salmo 139:21, 22.

   Oinsá se ema ida hakanek tebes ita-nia laran no lakohi husu deskulpa ka la rekoñese ninia sala? Bíblia fó matadalan: “Husik tiha hirus no soe tiha laran-nakali.” (Salmo 37:8) Maski ita la gosta ninia hahalok, maibé ita bele deside atu la rai hirus. Fiar bá katak Maromak mak sei tesi-lia ba ema neʼe. (Ebreu 10:30, 31) Ita mós bele sente kmaan hodi hatene katak iha futuru Maromak sei halakon laran-kanek neʼebé ita sente hela agora.​—Isaias 65:17; Apokalipse 21:4.

•   “Fó perdua” buat kiʼik hotu neʼebé halo ita sente an lalais. Duké fó perdua ba ema neʼebé ita hanoin halo sala hasoru ita, dala ruma diʼak atu rekoñese katak karik ita mak sente an lalais. Bíblia hatete: “Keta sente an lalais, tanba hahalok sente an lalais mak hela iha ema beik nia laran.”​—Eclesiastes 7:9.

Oinsá atu fó perdua

1.   Hanoin kona-ba fó perdua envolve saida deʼit. Fó perdua laʼós katak simu deʼit hahalok sala ka hanoin katak sala neʼe nunka akontese. Fó perdua katak Ita la hanoin tan kona-ba neʼe.

2.   Hanoin kona-ba benefísiu husi fó perdua. Se Ita la rai hirus, neʼe sei ajuda Ita atu nafatin kalma, saudavel, no kontente liu. (Provérbios 14:30; Mateus 5:9) Buat neʼebé importante liu, se Ita fó perdua ema seluk, Maromak mós sei perdua Ita.​—Mateus 6:​14, 15.

3.   Buka atu komprende ema seluk. Ita hotu la perfeitu. (Tiago 3:2) Kuandu ita halo sala no ema seluk fó perdua, ita agradese no sente kmaan. Tan neʼe, ita mós presiza fó perdua ba ema seluk.​—Mateus 7:​12.

4.   Iha hanoin neʼebé loos. Se iha buat kiʼik ruma neʼebé halo ita laran-kanek, ita bele halo tuir Bíblia nia matadalan neʼebé dehan: “Kontinua hatudu pasiénsia ba malu.”​—Koloso 3:​13.

5.   Keta demora. Fó perdua ba ema seluk lalais antes ita-nia hirus sai makaʼas liu.​—Éfeso 4:​26, 27.