“Xave sira ba Ukun lalehan nian”, neʼebé dala ruma temi mós nuʼudar “siabe reinu lalehan nian”, reprezenta autoridade atu loke dalan ba ema atu “tama ba Maromak nia Ukun”. (Mateus 16:19; Liafuan diak ba imi, segunda edisaun; Apóstolu 14:22) a Jesus fó ba Pedro “xave sira ba Ukun lalehan nian”. Neʼe katak Pedro simu knaar atu fó-hatene ba ema neʼebé laran-metin katak sira bele tama ba Maromak nia Ukun iha lalehan hodi simu Maromak nia espíritu santu.

Xave sira-neʼe uza ba sé?

 Pedro uza autoridade husi Maromak atu loke dalan ba grupu tolu atu tama ba Maromak nia Ukun:

1.   Ema Judeu no ema seluk neʼebé tuir relijiaun Judeu. Lakleur depois Jesus mate, Pedro anima fiar-naʼin Judeu sira atu tau fiar katak Jesus mak ida neʼebé Maromak hili nuʼudar Liurai ba Ninia Ukun. Pedro fó-hatene sira kona-ba saida deʼit mak sira presiza halo atu hetan salvasaun. Hodi halo ida-neʼe, Pedro loke dalan ba sira atu tama ba Maromak nia Ukun, no ema barak “simu ninia liafuan”.​—Apóstolu 2:38-41.

2.   Ema Samaria. Pedro mós hetan knaar atu koʼalia ba ema Samaria. b Nia uza xave reinu lalehan nian bainhira nia hamutuk ho apóstolu João “halo orasaun ba ema sira-neʼe atu sira bele simu espíritu santu”. (Apóstolu 8:14-17) Neʼe loke dalan ba ema Samaria atu tama ba Maromak nia Ukun.

3.   Ema jentiu sira. Tinan tolu ho balu depois Jesus mate, Maromak fó-hatene ba Pedro katak ema jentiu sira (ema neʼebé laʼós Judeu) mós iha oportunidade atu tama ba Maromak nia Ukun. Entaun, Pedro uza xave ida hodi haklaken ba ema jentiu, neʼe loke dalan ba sira atu simu espíritu santu, sai ema Kristaun, no iha esperansa atu sai liurai iha Maromak nia Ukun.​—Apóstolu 10:30-35, 44, 45.

“Tama ba Maromak nia Ukun”, neʼe katak sá?

 Ema neʼebé “tama ba Maromak nia Ukun” sei sai ukun-naʼin hamutuk ho Jesus iha lalehan. Bíblia fó-hatene nanis katak sira sei “tuur iha kadunan” no “ukun nuʼudar liurai ba mundu tomak”.​—Lucas 22:29, 30; Apokalipse 5:9, 10.

Hanoin neʼebé sala kona-ba xave ba Ukun lalehan nian

 Hanoin neʼebé sala: Pedro mak halo desizaun kona-ba bainhira mak nia uza xave ba Maromak nia Ukun.

 Faktu: Bainhira Jesus koʼalia kona-ba xave sira ba Ukun lalehan nian, nia hatete ba Pedro: “Buat naran deʼit neʼebé ó futu iha rai, futu ona iha lalehan, no buat naran deʼit neʼebé ó kore iha rai, kore ona iha lalehan.” (Mateus 16:19) Ema balu hanoin katak Pedro mak kontrola kona-ba desizaun iha lalehan. Maibé verbu orijinál iha lian Gregu iha eskritura neʼe hatudu katak Pedro mak halo tuir desizaun neʼebé Maromak halo ona, laʼós Maromak mak halo tuir Pedro nia desizaun.

 Eskritura seluk hatudu katak Maromak mak dirije Pedro bainhira nia uza xave ba Maromak nia Ukun. Porezemplu, Pedro halo tuir matadalan husi Maromak kuandu nia uza xave terseiru.​—Apóstolu 10:19, 20.