Primeiru Samuel 12:1-25
12 Ikusmai Samuel hatete ba ema Izraél tomak: “Agora haʼu halo tuir ona* buat hotu neʼebé imi husu ba haʼu, no haʼu hili ona liurai ida atu ukun imi.+
2 Neʼe mak liurai neʼebé sei dirije imi!*+ Kona-ba haʼu, haʼu katuas no fuuk mutin ona, no haʼu-nia oan-mane sira iha neʼe hamutuk ho imi,+ no haʼu dirije ona imi husi haʼu-nia tempu joven toʼo agora.+
3 Haʼu mak neʼe. Fó sasin kona-ba haʼu iha Jeová nia oin no iha ema neʼebé Maromak hili* ona nia oin:+ Haʼu foti ona sé-nia karau ka kuda-burru?+ Ka haʼu lohi hodi hamatak no hanehan sé? Haʼu simu ona prezente* husi sé atu bobar lia-loos?+ Se haʼu halo ona ida-neʼe, haʼu sei fó fali ba imi.”+
4 Ho ida-neʼe, sira hatán: “Ó nunka lohi hodi hamatak ami ka hanehan ami ka simu buat ida husi ema nia liman.”
5 Entaun nia dehan ba sira: “Ohin Jeová mak sai sasin ba imi, no ema neʼebé nia hili* ona mak sai sasin katak imi la hetan sala ida atu duun haʼu.”* Rona tiha neʼe, sira dehan: “Nia mak sai sasin.”
6 Entaun Samuel hatete ba povu: “Jeová neʼebé hili ona Moisés no Arão, no lori imi-nia beiʼala sira sai husi rai-Ejitu, Nia mak sai sasin.+
7 Agora hakbesik mai, haʼu sei tesi-lia ba imi iha Jeová nia oin tuir Jeová nia hahalok loos hotu neʼebé nia hatudu ona ba imi no imi-nia beiʼala sira.
8 “Bainhira Jacob tama ba rai-Ejitu+ no imi-nia beiʼala sira komesa husu ajuda husi Jeová,+ Jeová haruka Moisés+ no Arão atu dirije imi-nia beiʼala sira sai husi rai-Ejitu no lori sira mai hela iha fatin neʼe.+
9 Maibé sira haluha sira-nia Maromak Jeová, tan neʼe nia faʼan sira+ ba Sísera nia liman,+ xefe ba tropa Hazor nian, no nia mós faʼan sira ba ema Filístia+ no ba liurai Moab nia liman,+ no ema sira-neʼe halo funu hasoru sira.
10 Entaun sira bolu Jeová atu husu ajuda,+ hodi dehan: ‘Ami halo ona sala+ tanba ami husik Jeová hodi serbí fali Baal+ no estátua Astoret sira.+ Agora salva ami husi ami-nia inimigu nia liman hodi ami bele serbí Ita.’
11 Tuirmai Jeová haruka Jerubaal,+ Bedan, Jefte+ no Samuel,+ hodi salva imi husi inimigu sira neʼebé haleʼu imi, atu nuneʼe imi bele moris ho hakmatek.+
12 Bainhira imi haree katak Nahas,+ ema Ammon nia liurai, mai ona atu halo funu hasoru imi, imi kontinua dehan ba haʼu: ‘Lae, ami deside ona atu liurai ida mak ukun ami!’+ maski loloos Jeová, imi-nia Maromak, mak imi-nia Liurai.+
13 Agora, neʼe mak liurai neʼebé imi hili ona, ida neʼebé imi husu. Haree bá! Jeová hili ona liurai ida atu ukun imi.+
14 Se imi hamtaʼuk Jeová,+ no serbí nia,+ halo tuir ninia liafuan,+ la kontra Jeová nia orden, no se imi ho liurai neʼebé ukun imi halo tuir Jeová, imi-nia Maromak, entaun neʼe diʼak ba imi.
15 Maibé se imi la halo tuir Jeová nia liafuan no kontra Jeová nia orden, Jeová sei fó kastigu ba imi no imi-nia aman sira.+
16 Agora hakbesik mai no haree buat kmanek tebes neʼebé Jeová sei halo iha imi-nia oin.
17 Ohin mak tempu koʼa trigu nian, loos ka lae? Maibé haʼu sei husu ba Jeová atu halo rai-tarutu no udan. Entaun hatene no komprende bá katak imi halo ona hahalok aat tuir Jeová nia haree hodi husu liurai ida ba imi-nia an rasik.”+
18 Depois neʼe, Samuel husu ba Jeová, no Jeová halo rai-tarutu no udan iha loron neʼe, toʼo halo povu hotu sai taʼuk tebes ba Jeová no Samuel.
19 No povu hotu hatete ba Samuel: “Halo orasaun ba Jeová, ó-nia Maromak, kona-ba ami.+ Ami lakohi mate, tanba ami aumenta ona hahalok aat ida tan ba ami-nia sala hotu, hodi husu liurai ida.”
20 Entaun Samuel hatete ba povu: “Keta taʼuk. Imi halo duni hahalok aat sira-neʼe hotu. Maibé, keta fila kotuk tan hodi la halo tuir Jeová,+ no imi tenke serbí Jeová ho imi-nia laran tomak.+
21 Keta fila hodi laʼo tuir maromak sira neʼebé folin-laek,*+ neʼebé la lori buat diʼak ida+ no la lori salvasaun, tanba sira la iha folin.
22 Tanba Jeová nia naran neʼebé boot,+ nia sei la husik ninia povu,+ Jeová rasik mak deside ona atu halo imi sai ninia povu.+
23 Ba haʼu, haʼu labele halo sala hasoru Jeová hodi la halo tan orasaun kona-ba imi, no haʼu sei kontinua hanorin imi dalan neʼebé diʼak no loos.
24 Maibé imi tenke hamtaʼuk Jeová,+ no serbí deʼit nia ho laran-metin* no ho imi-nia laran tomak, tanba imi rasik haree ona buat kmanek tebes neʼebé nia halo ba imi.+
25 Maibé se imi la moe atu halo buat neʼebé aat, imi no mós imi-nia liurai sei lakon mohu tiha.”+
Nota-rodapé
^ Orj., “haʼu rona ona imi-nia lian kona-ba”.
^ Orj., “neʼebé sei laʼo iha imi-nia oin”.
^ Orj., “fui mina”. Haree “Fui mina” iha Glosáriu.
^ Ka “osan taka ibun nian”.
^ Orj., “fui mina”. Haree “Fui mina” iha Glosáriu.
^ Orj., “la hetan buat ida iha haʼu-nia liman”.
^ Ka “buat neʼebé laʼós realidade”.
^ Ka “tuir lia-loos”.
