Segundu Pedro 2:1-22
2 Maibé hanesan uluk profeta falsu sira mosu iha Maromak nia povu nia leet, nuneʼe mós mestre falsu sira sei mosu iha imi-nia leet.+ Sira ho subasubar deʼit sei forma grupu* oioin hodi estraga imi-nia fiar no sira mós sei nega ida* neʼebé sosa ona sira;+ nuneʼe sira sei halakon lalais sira-nia an.
2 Liután neʼe, ema barak sei halo tuir sira-nia hahalok aat neʼebé sira halo toʼo la sente moe,*+ no ema sei koʼalia aat kona-ba dalan lia-loos nian tanba sira.+
3 No mós, sira sei aproveita imi ho kaan-teen liuhusi liafuan bosok. Maibé sira-nia kastigu neʼebé deside nanis ona iha tempu uluk,+ sei la demora, no sira sei lakon mohu duni.+
4 Tuir loloos, Maromak la dada an atu fó kastigu ba anju sira neʼebé halo sala,+ maibé nia soe sira ba Tártaro,*+ no kesi sira ho korrente* iha nakukun laran no sira hein atu hetan tesi-lia.+
5 No nia la dada an atu fó kastigu ba mundu iha tempu uluk,+ maibé salva Noé, neʼebé mak haklaken-naʼin kona-ba justisa,+ hamutuk ho ema naʼin-hitu seluk+ bainhira nia halo rai-nabeen iha mundu neʼebé nakonu ho ema aat.+
6 No Maromak mós fó kastigu ba Sodoma no Gomorra no harahun sidade sira-neʼe toʼo sai ahi-kadesan,+ hodi halo nuneʼe nia hatudu ezemplu kona-ba buat neʼebé sei akontese ba ema aat sira iha tempu neʼebé atu mai.+
7 No nia salva ema laran-loos naran Lot,+ neʼebé sente laran-susar tebes tanba ema aat sira neʼebé halo hahalok aat toʼo la sente moe.*
8 Tanba loron ba loron, ema laran-loos neʼe sente laran-susar tebes tanba hahalok aat sira neʼebé nia haree no rona bainhira nia hela iha sira-nia leet.
9 Nuneʼe, Jeová* hatene oinsá atu salva ema neʼebé laran-metin ba nia* husi susar laran,+ maibé nia rai hela ema aat sira atu halakon tiha iha loron tesi-lia nian,+
10 liuliu sira neʼebé buka atu halo relasaun seksuál ho ema seluk hodi hafoʼer sira+ no hakribi sira neʼebé iha podér.*+
Sira sai brani demais no halo tuir deʼit sira-nia hakarak, no sira la taʼuk atu koʼalia aat ema sira neʼebé iha glória.*
11 Maibé anju sira la halo hanesan neʼe. Maski anju sira iha forsa no kbiit boot liu, maibé tanba respeitu Jeová,*+ sira la uza liafuan kroʼat* hodi duun mestre falsu sira-neʼe.
12 Maibé mane sira-neʼe hanesan deʼit ho animál neʼebé la iha hanoin, neʼebé moris mai atu ema kaer no oho, sira tuir deʼit sira-nia hakarak no koʼalia aat kona-ba buat neʼebé sira la hatene.+ Sira-nia hahalok neʼebé aat sei lori sira ba mate;
13 sira haterus sira-nia an nuʼudar rezultadu husi sira-nia hahalok neʼebé aat.
Mane sira-neʼe hanoin katak goza moris iha rai-loron mak fó ksolok ba sira.+ Sira hanesan noda no foʼer; bainhira sira festa hamutuk ho imi, sira gosta deʼit* sira-nia hanorin bosok.+
14 Sira-nia matan nakonu ho sala seksuál*+ no sira labele para atu halo sala, no sira dada ema* neʼebé namlele. Sira-nia laran treinu ona ho hahalok kaan-teen. Sira mak oan neʼebé hetan malisan.
15 Sira husik ona dalan neʼebé loos, no ema lori sira laʼo sala dalan. Sira laʼo tuir Beor nia oan-mane Balám nia dalan,+ neʼebé gosta atu hetan kolen hodi halo hahalok sala,+
16 maibé Balám hetan korrije tanba nia kontra buat neʼebé loos.+ Kuda-burru neʼebé labele koʼalia, koʼalia fali hanesan ema hodi hanetik profeta neʼe atu nia la laʼo tuir ninia dalan neʼebé hanesan bulak.+
17 Mane sira-neʼe mak hanesan bee-matan neʼebé maran, no abuabu neʼebé anin-fuik lori, no buat neʼebé rai hela ona ba sira mak fatin neʼebé nakukun loos.+
18 Sira fó sai liafuan neʼebé rona importante, maibé loloos folin-laek. Sira halo hahalok aat toʼo la sente moe* no book ema hodi iha fali hakarak neʼebé sala,+ hodi nuneʼe sira dada ema neʼebé foin halai sees husi ema sira neʼebé moris iha sala laran.+
19 Mestre falsu sira-neʼe promete liberdade ba sira, maibé mestre sira-neʼe rasik mak atan ba sala.+ Se ema ida husik ema seluk domina nia, nia sai ema neʼe nia atan.*+
20 Tuir loloos, se ema halai sees ona husi buat sira neʼebé foʼer iha mundu neʼe+ tanba hetan koñesimentu neʼebé loos kona-ba Naʼi no Salvadór Jesus Kristu, no tuirmai envolve an fali ba buat sira neʼebé foʼer no neʼe domina fali sira, ikusmai sira-nia situasaun sei sai aat liu fali ida uluk nian.+
21 Tanba diʼak liu sira la hatene ho loloos kona-ba dalan loos nian duké hatene tiha kona-ba neʼe no tuirmai fila kotuk fali ba mandamentu santu neʼebé sira simu ona.+
22 Sira hatudu katak lia-dadolin tuirmai neʼe mak loos duni: “Asu neʼebé fila no han fali ninia muta, no fahi neʼebé hariis tiha ona duir an fali iha tahu laran.”+
Nota-rodapé
^ Orj., “naʼi”. Neʼe katak Jesus.
^ Ka “seita”.
^ Ka karik “tau sira iha rai-kuak”.
^ Ka “neʼebé iha devosaun ba Maromak”. Haree “Devosaun ba Maromak” iha Glosáriu.
^ Neʼe katak sira neʼebé iha responsabilidade boot iha kongregasaun.
^ Ka “hakribi naʼi-ulun sira”.
^ Ka “sira la uza liafuan kroʼat iha Jeová nia oin”.
^ Ka “sira haksolok toʼo labele kontrola an tanba”.
^ Ka “ho adultériu”. Haree “Adultériu” iha Glosáriu.
^ Haree “Psiké” iha Glosáriu.
^ Ka “se ema ida husik buat ruma domina nia, nia sai atan ba buat neʼe”.
