Deuteronómio 16:1-22
16 “Imi tenke hanoin-hetan nafatin fulan-Abib,* no selebra Páskua* ba Jeová, imi-nia Maromak,+ tanba iha fulan-Abib mak Jeová, imi-nia Maromak, lori imi sai husi rai-Ejitu iha kalan.+
2 Imi tenke hasaʼe karau ka bibi ida+ nuʼudar sakrifísiu Páskua nian ba Jeová, imi-nia Maromak,+ iha fatin neʼebé Jeová sei hili atu lori ninia naran.+
3 Imi labele han buat naran deʼit neʼebé iha fermentu hamutuk ho naʼan neʼe;+ ba loron hitu imi tenke han paun neʼebé la iha fermentu, paun terus nian, tanba imi sai husi rai-Ejitu ho ansi.+ Iha imi-nia moris tomak, imi tenke halo ida-neʼe hodi bele hanoin-hetan loron neʼebé imi sai husi rai-Ejitu.+
4 Labele iha fermentu* ida iha imi-nia rai tomak ba loron hitu,+ no naʼan husi animál neʼebé imi hasaʼe nuʼudar sakrifísiu iha rai-nakaras iha loron primeiru, imi labele rai hela toʼo dadeer.+
5 Imi labele hasaʼe sakrifísiu Páskua nian iha sidade naran deʼit neʼebé Jeová, imi-nia Maromak, sei fó ba imi.
6 Maibé imi tenke hasaʼe ida-neʼe iha fatin neʼebé Jeová, imi-nia Maromak, sei hili atu lori ninia naran. Bainhira loro-matan foin monu tiha, iha rai-nakaras imi tenke hasaʼe kedas sakrifísiu Páskua nian,+ tuir loron* neʼebé imi sai husi rai-Ejitu.
7 Imi tenke teʼin no han ida-neʼe+ iha fatin neʼebé Jeová, imi-nia Maromak, sei hili,+ no iha dadeer tuirmai, imi bele fila fali ba imi-nia hela-fatin.
8 Ba loron neen imi tenke han paun neʼebé la iha fermentu, no iha loron hitu sei iha reuniaun espesiál ba Jeová, imi-nia Maromak. Imi labele halo serbisu ida.+
9 “Imi tenke sura semana hitu. Imi sei hahú sura semana hitu neʼe husi tempu neʼebé imi foin komesa koʼa sevada* iha toʼos.+
10 Tuirmai imi sei selebra Festa Semana nian ba Jeová, imi-nia Maromak,+ hodi lori mós sakrifísiu neʼebé imi fó ho hakarak rasik, no imi sei fó sakrifísiu hodi tuir bensaun neʼebé Jeová, imi-nia Maromak, haraik ba imi.+
11 No imi tenke haksolok iha Jeová, imi-nia Maromak, nia oin iha fatin neʼebé Jeová, imi-nia Maromak, sei hili atu lori ninia naran. Imi tenke haksolok hamutuk ho imi-nia oan-mane, oan-feto, imi-nia atan-mane no atan-feto, no ema Levi neʼebé hela iha imi-nia sidade laran,* ema estranjeiru, oan-kiak* no feto-faluk sira neʼebé iha imi-nia leet.+
12 Hanoin-hetan bá katak uluk imi sai atan iha rai-Ejitu,+ no imi tenke halaʼo no halo tuir ukun-fuan sira-neʼe.
13 “Imi tenke selebra Festa Barraka nian*+ ba loron hitu bainhira imi halibur ona buat hotu husi imi-nia fatin sama trigu nian no husi fatin halo mina no tua-uvas nian.
14 Haksolok bá durante festa neʼe,+ imi no imi-nia oan-mane, imi-nia oan-feto, imi-nia atan-mane no atan-feto, ema Levi, ema estranjeiru, oan-kiak no feto-faluk sira neʼebé hela iha imi-nia sidade laran.
15 Ba loron hitu imi sei selebra festa neʼe+ ba Jeová, imi-nia Maromak, iha fatin neʼebé Jeová sei hili, tanba Jeová, imi-nia Maromak, sei haraik bensaun ba buat hotu neʼebé imi hetan husi imi-nia toʼos+ no ba buat hotu neʼebé imi halo, no imi sei sente haksolok loos.+
16 “Tinan ida dala tolu, mane hotu tenke bá hodi hamriik iha Jeová, imi-nia Maromak, nia oin iha fatin neʼebé nia sei hili, neʼe mak iha tempu Festa Paun Fermentu-Laek nian,+ Festa Semana nian+ no Festa Barraka nian,+ no mane sira-neʼe hotu labele hamriik iha Jeová nia oin ho liman-mamuk.
17 Prezente neʼebé mane ida-idak lori tenke tuir bensaun neʼebé Jeová, imi-nia Maromak, haraik ona ba imi.+
18 “Imi tenke hili juís+ no ulun-naʼin sira ba suku ida-idak iha imi-nia sidade hotu neʼebé Jeová, imi-nia Maromak, sei fó ba imi, no sira tenke tesi-lia ba povu ho loloos.
19 Imi labele bobar lia-loos,+ labele hatudu hahalok todan ba sorin,+ no mós labele simu prezente atu apoia ema ruma iha kazu ida, tanba osan sei halo ema matenek taka ninia matan+ no halo ema laran-loos bobar ninia liafuan.
20 Imi tenke hakaʼas an atu laʼo tuir deʼit justisa,+ atu nuneʼe imi bele kontinua moris no foti rai neʼebé Jeová, imi-nia Maromak, sei fó ba imi.
21 “Imi labele kuda ai ruma nuʼudar ai-riin lulik*+ besik altár neʼebé imi halo ba Jeová, imi-nia Maromak.
22 “Imi mós labele harii fatuk lulik* ba imi-nia an,+ neʼe mak buat neʼebé Jeová, imi-nia Maromak, odi.
Nota-rodapé
^ Neʼe mak masa uitoan neʼebé iha fermentu no sira uza ida-neʼe atu halo paun tan.
^ Ka “iha tempu neʼebé hili tiha ona”.
^ Ka “labarik neʼebé la iha aman”.
^ Orj., “portaun laran”.
^ Ka “Festa Hela-Fatin Temporáriu”.
^ Haree “Ai-riin lulik” iha Glosáriu.
^ Haree “Fatuk lulik” iha Glosáriu.
