Filipe 4:1-23
4 Tan neʼe, haʼu-nia maun-alin sira neʼebé haʼu hadomi, haʼu hakarak tebes atu haree imi, no imi mak haʼu-nia ksolok no koroa.+ Hamriik metin+ bá iha Naʼi hanesan haʼu temi ona.
2 Haʼu fó laran-manas ba Evódia no mós Síntike atu iha hanoin neʼebé hanesan iha Naʼi.+
3 Sin, haʼu mós husu ó, nuʼudar haʼu-nia maluk serbisu-naʼin neʼebé loos, atu kontinua ajuda feto sira-neʼe. Sira hakaʼas an* ona ho haʼu hodi fó sai liafuan diʼak hamutuk ho Clemente no mós haʼu-nia maluk serbisu-naʼin sira seluk, neʼebé sira-nia naran hakerek ona iha livru moris nian.+
4 Haksolok nafatin bá iha Naʼi. Dala ida tan haʼu dehan, haksolok bá!+
5 Halo ema hotu haree katak imi la ulun-toos.+ Naʼi besik hela.
6 Keta hanoin resin kona-ba buat ida,+ maibé iha situasaun hotu husu ajuda husi Maromak liuhusi orasaun no harohan no mós fó agradese,+
7 no Maromak nia dame+ neʼebé aas liu ema nia hanoin hotu sei proteje imi-nia laran+ no imi-nia kbiit atu hanoin* liuhusi Kristu Jesus.
8 Ikusliu, maun-alin sira, kontinua hanoin* kona-ba buat hotu neʼebé loos, buat hotu neʼebé importante, buat hotu neʼebé diʼak tuir Maromak nia haree, buat hotu neʼebé moos, buat hotu neʼebé haburas domin, buat hotu neʼebé merese respeitu, no buat hotu neʼebé santu no buat hotu neʼebé merese hahiʼi.+
9 Halo tuir buat sira neʼebé imi aprende, simu, rona no haree ona iha haʼu+ no Maromak dame nian sei hamutuk ho imi.
10 Haʼu haksolok tebes iha Naʼi tanba agora imi hanoin fali kona-ba haʼu.+ Maski imi hanoin kona-ba haʼu, maibé imi ladún iha oportunidade atu hatudu ida-neʼe.
11 Haʼu koʼalia ida-neʼe laʼós tanba haʼu falta buat ruma. Tuir loloos iha situasaun naran deʼit haʼu aprende ona atu sai kontente ho buat neʼebé haʼu iha.+
12 Haʼu hatene ona oinsá moris ho sasán uitoan+ no sasán barak. Iha buat hotu no iha situasaun hotu haʼu aprende ona segredu kona-ba oinsá moris kontente maski bosu ka hamlaha, iha sasán barak ka la iha sasán.
13 Tanba iha situasaun hotu haʼu hetan forsa liuhusi nia neʼebé fó kbiit mai haʼu.+
14 Maski nuneʼe, imi halo diʼak hodi ajuda haʼu iha haʼu-nia susar.
15 Tuir loloos, imi ema Filipe sira, imi mós hatene katak foufoun bainhira imi aprende tiha liafuan diʼak, no bainhira haʼu sai husi Masedónia, la iha kongregasaun ida mak ajuda haʼu ka simu haʼu-nia ajuda, só imi deʼit mak fó ajuda.+
16 Tanba bainhira haʼu iha Tesalónika, imi haruka buat ruma ba haʼu hodi ajuda haʼu laʼós dala ida deʼit maibé dala rua.
17 Neʼe laʼós katak haʼu buka prezente ruma, maibé haʼu hakarak katak imi-nia hahalok diʼak sira halo imi sai riku liután.*
18 Maibé, haʼu iha ona buat hotu neʼebé haʼu presiza no barak liután. Agora haʼu la falta buat ida tanba haʼu simu ona buat neʼebé imi haruka liuhusi Epafrodito.+ Prezente neʼebé imi haruka mai haʼu mak hanesan sakrifísiu neʼebé morin,+ neʼebé Maromak simu no monu loos ba Maromak nia laran.
19 Nuneʼe mós, haʼu-nia Maromak sei fó buat hotu neʼebé imi presiza+ tuir ninia rikusoin glória nian liuhusi Kristu Jesus.
20 Fó glória ba ita-nia Maromak no Aman tinan ba tinan nafatin. Amen.
21 Fó haʼu-nia kumprimentus ba santu sira hotu neʼebé ida deʼit ho Kristu Jesus. Maun-alin sira neʼebé hamutuk ho haʼu haruka sira-nia kumprimentus ba imi.
22 Ema santu* hotu, liuliu sira neʼebé iha César*+ nia umakain, haruka sira-nia kumprimentus ba imi.
23 Haʼu hein katak Naʼi Jesus Kristu nia laran-diʼak neʼebé boot sei hamutuk ho espíritu* neʼebé imi hatudu.
Nota-rodapé
^ Ka “luta makaʼas”.
^ Ka “imi-nia neon”.
^ Ka “medita”.
^ Neʼe refere ba rikusoin espirituál.
^ Haree “Ema santu” iha Glosáriu.
^ Ka “hanoin no atitude”. Haree “Pneuma” iha Glosáriu.
